Klei Aê Diê Blŭ: II Klei Yăl Dliê 25:14-16
Êlan kliăng: “Ơ dam, đăm ngă klei amâo uêñ ôh kơ klei Khua Yang mkra mjuăt ih, leh anăn đăm êdu ai ôh tơdah Ñu bi kmhal ih” (Hêbrơ 12:5b)
Klei êmuh ksiêm mĭn: Ya ngă Yêhôwa ngêñ kơ Mtao Y-Amasia? Si ngă Mtao Y-Amasia lŏ bi kdơ̆ng wĭt tơdah Aê Diê yua khua pô hưn êlâo ƀuah kơ ñu? Ya boh jhat Mtao srăng mă tŭ? Si ngă knuih drei khăng mâo tơdah Khua Yang bi hriăm drei amâodah phung ayŏng amai adei đru kčĕ kơ drei?
Aê Diê ngêñ kơ Mtao Y-Amasia ngă klei soh kkuh mpŭ kơ rup yang tơdah leh ñu dưi hŏng phung Êđôm. Hrô kơ klei bi kmhal mtam, Aê Diê tiŏ nao sa čô khua pô hưn êlâo êmuh mtao: “Si ngă ih knang kơ yang sa phung ƀuôn sang, yang amâo dưi bi mtlaih phung ƀuôn sang ñu pô ôh mơ̆ng kngan ih?” (êlan 15b). Anei jing sa klei êmuh amâo djŏ brei lŏ wĭt lač ôh ƀiădah jing klei sa klei ƀuah kơ Mtao Y-Amasia ngă bruă hŏng klei mluk. Ƀiădah Mtao amâo čiăng hmư̆ ôh klei khua pô hưn êlâo blŭ kyuanăn ñu găn asăp gơ̆ hŏng sa klei êmuh mkăn snei, ñu amâo tuôm mjing gơ̆ jing pô kčĕ kơ ñu ôh! Ñu ghă brei gơ̆ dôk ñăt tơdah amâo dôk ñăt ôh arăng srăng bi mdjiê gơ̆. Khua pô hưn êlâo amâo lŏ blŭ ôh, tơdah lŏ blŭ ñu thâo sĭt nik mtao srăng bi mdjiê ñu msĕ si ama mtao Y-Jôas bi mdjiê leh khua pô hưn êlâo Y-Sakari, anak Khua ngă yang Y-Jêhôida mphŭn dô (II Klei Yăl Dliê 24:20-21).
Klei dưi hŏng phung Êđôm mjing Mtao Y-Amasia jing sa čô mnuih mgao leh anăn khăng kŏ, hngah kơ klei Aê Diê tiŏ hriê leh khua pô hưn êlâo. Tơdah hngah amâo čiăng hmư̆ ôh klei hưn êlâo mơ̆ng Aê Diê jing hngah amâo čiăng hmư̆ Klei Aê Diê Blŭ mơh. Aê Diê jing Pô jăk brei leh kơ Mtao Y-Amasia mmông myun kmhal hĕ kơ klei soh, ƀiădah ñu lŏ wĭt lač kơ klei ƀuah anăn hŏng klei mgao amâo djŏ hŏng klei bi luă gŭ ñu pô kmhal kơ klei soh ôh, klei anăn bi ktrŏ hĭn kơ klei soh ñu. Ñu čuăn mă leh klei bi kmhal kơ ñu. Khua pô hưn êlâo amâo lŏ mtrŭt mtao kmhal kơ klei soh ôh, ƀiădah hŏng klei jhŏng gơ̆ hưn klei bi kmhal srăng truh kơ mtao, Aê Diê čuăn leh srăng bi rai mtao kyuadah mtao kkuh mpŭ kơ rup yang leh anăn amâo dôk hmư̆ ôh klei khua pô êlâo hưn.
Mâo klei čăt jing hlăm klei hdĭp amâodah hlăm bruă drei ngă kơ Khua Yang ăt dưi mjing drei jing sa čô mnuih mgao mơh, boh jhat kơ klei anăn jing ngă kơ drei amâo čiăng hmư̆ ôh klei Khua Yang ƀuah tơdah drei ngă soh. Klei ƀuah srăng truh kơ drei êjai Khua Yang brei drei tuôm hŏng klei dleh dlan, amâodah êjai drei wah lač, dlăng Klei Aê Diê Blŭ, amâodah mơ̆ng klei Khua Yang mtô bi hriăm, amâodah hŏng klei phung ayŏng amai adei đru kčĕ leh anăn hŏng lu klei mkăn đa đa…Tơdah Aê Diê Pô bŏ hŏng klei pap ƀuah, đăm drei bi khăng ai tiê leh anăn ngă klei amâo uêñ msĕ si Mtao Y-Amasia ôh. Đăm lŏ kkuh mpŭ kơ klei kđeh drei pô čiăng leh anăn hngah kơ Klei Aê Diê Blŭ ôh, tơdah drei ăt ngă klei anăn sĭt nik ti knhal tuč drei srăng tŭ klei Ñu bi kmhal!
Drei tuôm thâo kral leh klei Aê Diê ƀuah hlăm klei hdĭp drei leh anăn bi luă gŭ drei pô kmhal kơ klei soh leh mơ̆?
Wah lač: Ơ Khua Yang, đru kâo thâo kral klei Ih ƀuah kơ ya klei kâo ngă amâo bi mơak ôh kơ Ih hlăm klei hdĭp leh anăn hlăm bruă kâo ngă kơ Ih, đru kâo thâo kmhal hĕ kơ klei soh leh anăn ngă tui si Klei Ih Blŭ čiăng kơ kâo amâo bi luč ôh klei jăk jĭn Ih brei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Yap 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
