Klei Aê Diê Blŭ: Hêbrơ 12:12-13
Êlan kliăng: “Snăn, Ơ anak êkei kâo, jing ktang bĕ hŏng klei pap hlăm Krist Yêsu” (II Y-Timôthê 2:1)
Klei êmuh ksiêm mĭn: Rup “yơr kngan awăt”, “bi ktang kơŭt êun” leh anăn “bi kpă êlan kơ jơ̆ng” si ngă mblang? Ya ngă pô čih hră mơĭt mtă brei ngă klei anăn lĕ? Si ngă drei mă yua klei mtă anei hlăm klei drei tui hlue Khua Yang?
Hlăm dua êlan Klei Aê Diê Blŭ anei, pô čih hră mơĭt kơ phung Hêbrơ bi êdah kơ rup sa čô mnuih bi lông êran amâo lŏ mâo ai ôh. “Kngan awăt” jing rup phưi dua nah kngan amâo lŏ hdai ôh êjai êran. “Kơŭt êun” jing kơŭt bi ktư̆ amâo lŏ mâo klei mơai ôh. Hlăm klei jing msĕ snăn, jơ̆ng srăng êran đŏng dlơt mơh, amâo lŏ êran kpă ôh ti êlan bi lông êran. Anei jing rup sa čô mnuih bi lông êran dơ̆ng lĕ buh leh. Jing phung tuôm hmư̆ leh klei sĭt nik, mă tŭ leh klei sĭt nik. Phung đăo phung Hêbrơ mâo klei bi mđĭ ai brei djă pioh kjăp klei sĭt nik, gĭr hlăm klei bi lông êran tui knuih phung jhŏng ktang klei đăo, boh nik nak knuih Khua Yang Yêsu. Êlan bi lông êran hlăm mngăt amâo mâo ênưih ôh. Mâo nanao klei lông dlăng prŏng, ai tiê ktrŏ ngă kơ arăng ênưih srăng êgah êmăn leh anăn kdŭn. Thâo klă kơ klei anăn, pô čih hră mơĭt kơ phung Hêbrơ jing msĕ si sa čô pô bi hriăm dôk ur mjan kơ phung dôk bi lông êran, “yơr kngan, hdai ktang bĕ! Yŏng kơŭt, dôk kjăp bĕ! Dlăng kơ jơ̆ng, êran bi kpă! Răng bĕ, huĭdah lĕ êbuh!” Klei kñăm čiăng kơ klei mtô, klei mjan anei jing čiăng kơ amâo mâo pô srăng lĕ êbuh ôh ƀiădah ăt êran phă anăp. Mbĭt hŏng klei anăn, ăt brei drei mđing mơh kơ klei anei, ti êlan bi lông êran myang drei amâo êran hjăn păn ôh. Tơdah drei dôk kjăp, brei drei đru mơh phung awăt hlăm klei đăo čiăng kơ digơ̆ dôk kjăp, mâo klei bi hlao leh anăn lŏ bi mrâo ai ktang digơ̆ čiăng kơ digơ̆ lŏ dưi êran.
Jih jang drei dôk bi lông êran sơăi hlăm mngăt, leh anăn čiăng sơăi srăng truh ti anôk bi kčah hŏng klei jăk êjai hur har djă pioh klei đăo tơl knhal tuč. Drei mâo klei bi mđĭ ai: “jing ktang bĕ hŏng klei pap hlăm Krist Yêsu” (II Y-Timôthê 2:1). Klei hriăm anei brei kơ drei mâo dŭm hdră êlan pioh yua hlăm klei hdĭp klei đăo drei. Tal sa, đăm mdei ôh bi mđĭ klei suaih pral klei hdĭp mngăt drei čiăng kơ drei dôk kjăp hlăm klei bi lông êran hŏng klei wah lač, hriăm Klei Aê Diê Blŭ, kkuh mpŭ kơ Khua Yang leh anăn bi mguôp hŏng Phung Sang Aê Diê. Tal dua, bi dap bĕ êlan êran hŏng klei lui jih mnơ̆ng bi gun jing klei soh hlăm klei hdĭp. Pioh mmông ksiêm dlăng kơ drei pô grăp hruê, hŏng klei sĭt hưn leh anăn kmhal hĕ kơ klei soh, nao kơ pô kčĕ klei hdĭp mngăt drei dưi knang čiăng hưn bi êdah leh anăn mâo klei bi mđĭ ai. Tal tlâo, hlăm klei êran klei đăo, drei amâo knŏng êran mă kơ drei pô ôh, ƀiădah brei drei uêñ mĭn mơh kơ pô mkăn, duah êlan đru bi mđĭ ai phung awăt čiăng jih jang dưi dôk kjăp êran truh ti anôk bi kčah sơăi.
Drei tuôm bi mđĭ ai mơ̆ phung awăt jŭm gah găn drei?
Wah lač: Ơ Khua Yang, kâo lač jăk kơ Ih kyuadah Ih thâo jih klei awăt kâo leh anăn Ih ƀuăn srăng thiăm ai ktang, leh anăn đru hlei pô knang kơ Ih. Đru kâo dôk sĭt suôr nanao hlăm klei kâo bi lông êran, amâo êun kơŭt êgah jơ̆ng tơl lĕ êbuh ôh čiăng kâo dưi êran truh kơ anôk bi kčah hŏng klei jăk. Kâo wah lač hlăm Anăn Yêsu Krist. Amen.
Dlăng Klei Aê Diê Blŭ hlăm tlâo thŭn: Bruă Lêwi 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
