Klei Aê Diê Blŭ: Hêbrơ 4:1-2
Êlan kliăng: “Kyuanăn êjai ăt mâo klei ƀuăn dưi mŭt hlăm klei Ñu mdei, brei drei huĭ đăm brei sa čô hlăm phung diih Aê Diê ksiêm ƀuh amâo dưi mŭt ôh” (Hêbrơ 4:1)
Klei êmuh ksiêm mĭn: Ya klei pô čih hră Hêbrơ hưn êlâo brei răng? Klei ƀuăn dưi mŭt mdei Khua Yang pioh kơ hlei pô? Si drei mă tŭ klei ƀuăn anei čiăng đăm bi kpêč hĕ ôh mmông găl?
Pruê̆ blŭ “huĭ đăm brei sa čô hlăm phung diih” hlăm êlan 1 ăt dưi mblang “bi luč klei myun”. Hlăk mmông ngăn ala lăn “đĭ hlơr”, lu pô amâo huă amâo pĭt kyua phưi lui hĕ mmông myun blei kdriêk lăn leh anăn dlăng kơ ênoh ñu đĭ amâo mdei, tơl đa đĭ lu blư̆ hĭn knŏng hlăm ƀiă hruê mmông. Hlăm đa kdrêč bruă, mmông myun anei găn gao, tăp năng ăt lŏ mâo mmông myun mkăn. Ƀiădah mâo đa kdrêč bruă tơdah amâo hmao djă păn mmông myun, srăng hƀlŏk jih klei hdĭp, đa tơl tŭ klei jhat truh kjham kjhuê̆.
Dlăng kơ rup bi hmô Israel phung ƀuôn sang Aê Diê ruah, pô čih hră Hêbrơ hưn mdah lu klei hưn êlâo brei răng, msĕ si huĭdah drei srăng klah đuĕ mơ̆ng klei anăn (Hêbrơ 2:1), huĭdah sa čô hlăm phung diih mâo ai tiê jhat amâo đăo ôh (Hêbrơ 3:12), leh anăn hlăm kdrêč 4, ñu ăt lŏ hưn êlâo brei răng huĭ đăm brei sa čô hlăm phung diih Aê Diê ksiêm ƀuh amâo dưi mŭt hlăm klei Ñu mdei (êlan 1). Klei Ñu mdei pioh kơ phung ƀuôn sang Israel, êlâo hĭn jing klei hdĭp jăk mơak hlăm Čar Aê Diê Ƀuăn Kanaan. Ƀiădah klei yuôm hĭn, anăn jing klei hơ̆k mơak dưi mă tŭ klei Aê Diê ƀuăn brei kơ aê đưm diñu jing Y‑Abraham, dưi dưn hdră bruă lŏ bi mrâo, hdră bruă klei Ñu bi mtlaih. Ya klei mkăn jing jăk hĭn kơ phung ƀuôn sang tuôm jing hlŭn dŭm êtuh thŭn leh ti čar Êjip, ară anei dưi dôk hdĭp hlăm klei jing mrâo mrang, kyuanăn klei ƀuăn kơ klei mdei anei, sĭt nik jing “Klei Mrâo Mrang Jăk” kơ diñu. Bi hŏng phung Israel dlăng hră čih anei hlăm gưl thŭn tal êlâo leh anăn hŏng jih jang phung drei hruê anei, ya klei mrâo mrang mkăn hơ̆k mơak hĭn hŏng klei Khua Yang brei klei myun kơ drei dưi mŭt hlăm klei Ñu mdei, dưi tlaih mơ̆ng boh tŭ jhat leh anăn knhuah hdĭp soh jhat čiăng dưi bi knal klei hdĭp mrâo hlăm Khua Yang.
Ƀiădah klei sĭt jing ênguôt êdi kơ phung ƀuôn sang Israel đưm, “kyuadah phung hmư̆ klei anăn amâo mă tŭ ôh hŏng klei đăo” (êlan 2). Sa ênuk kyua klei amâo đăo snăn djiê leh hlăm kdrăn tač. Ênuk lŏ čuê wăt tơdah dưi mŭt dôk hdĭp hlăm Čar Aê Diê Ƀuăn ƀiădah ăt kăn bi knal rei klei mdei myang. Jih jang klei anăn truh kyua mơ̆ng klei amâo wĭt ngă hŏng klei đăo yơh. Diñu hmư̆ leh, thâo săng leh kơ jih jang klei ƀuăn mbĭt hŏng jih jang klei hưn êlâo brei răng ƀiădah amâo ngă hlue ôh. Klei đăo amâo djŏ ôh knŏng hjăn hmư̆, thâo săng leh anăn tŭ ư kơ Klei Mrâo Mrang Jăk, ƀiădah brei wĭt ngă hŏng ai tiê đup gưt.
Klei Mrâo Mrang Jăk ăt dôk hiu hưn, mtô mblang, mmông găl ăt dôk pioh kơ jih jang mnuih, ƀiădah brei dlăng kơ rup bi hmô mơ̆ng phung ƀuôn sang Israel leh anăn “brei thâo huĭ”, ksiêm dlăng wĭt si ngă drei lŏ wĭt lač hŏng Klei Mrâo Mrang Jăk jih ai tiê mơ̆? leh anăn mă tŭ hŏng klei đăo đup gưt amâodah ka?
Si drei dôk wĭt lač hŏng Klei Mrâo Mrang Jăk?
Wah lač: Ơ Khua Yang, akâo Ih đru kâo mă tŭ Klei Mrâo Mrang Jăk amâo djŏ ôh knŏng hŏng klei thâo săng, tŭ ư, ƀiădah đăo sĭt êmĭt, bi êdah hŏng knuih kmhal sĭt kơ klei soh, leh anăn klei hdĭp mlih mrâo, bi guh kơang kơ Anăn Ih.
Dlăng Klei Aê Diê Blŭ hlăm tlâo thŭn: Y‑Yêrêmi 2:4-25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
