Henplais 4:1-2
Nqe cim:
“Vajtswv cog lus tseg rau peb hais tias, Nws yuav pub peb mus nrog Nws so. Yog li ntawd, peb sawvdaws yuav tsum ceevfaj, nyob tsam nej cov muaj qee leej tsis tau mus nrog Nws so” (Henplais 4:1).
Lus nug rau sawvdaws xav:
- Tus sau phau Henplais muaj lus ceebtoom li cas?
- Tus Tswv coglus tseg rau leejtwg yuav tau mus nrog Nws so?
- Yuav ua raws tej lus cog tseg ntawd li cas thiaj tau mus nrog Vajtswv so?
Lo lus “qee leej tsis tau mus nrog nws so” hauv nqe 1 kuj txhais tau hais tias “tsis muaj sijhawm mus nrog Vajtswv so”. Lub sijhawm uas av nce nqis, muaj ib txhia noj tsis qab pw tsis tsaug zog vim lawv yuav tsis tau daim av uas yuav coj ua luam kom tau tsam thiab pom luag pheej tshwm nqi siab zuj zus rau daim av ntawd. Muaj tej yam peb tsis tau txais los tsis ua cas, tsis tau zaum no ces lwm zaug yuav tau xwb. Tiamsis muaj tej yam yog peb tsis ceevfaj, thaum ua plam lawm ces yeej nrhiav tsis tau ntxiv li lawm, peb yuav tu siab mus tas simneej thiab tseem yuav raug tej teebmeem txaus ntshai.
Pom Vajtswv haiv neeg Yixalayees lub neej dhau los, tus sau phau Henplais muaj lus ceebtoom xws li: ua tib zoo khaws tej lus ntawd cia (Henplais 2:1), nyob tsam muaj tug muaj lub siab phem thiab tsis ntseeg (Henplais 3:12), thiab hauv tshooj 4 rov ceebtoom ntxiv nyob tsam nej cov muaj qee leej tsis tau mus nrog Vajtswv so (nqe 1). Vajtswv cia haiv neeg Yixalayees los so hauv lub tebchaws Kana-as uas Vajtswv twb cog lus tseg ua ntej lawm. Tiamsis qhov tseemceeb yog lawv tau txais Vajtswv tej lus cog tseg rau lawv yawg koob Anplahas, tau txais lub neej kho dua tshiab thiab tau txais tus Tswv kev pab cawm. Tsis muaj yam yuav zoo siab npaum qhov uas ib haiv neeg tau dim kev ua cev qhev ntau pua xyoo nram tebchaws Iziv los txais lub neej tshiab, yog li ntawd qhov uas tau los nrog Vajtswv so, yog “Txoj Moozoo” rau lawv. Dhau ntawd, cov neeg Yudais tiam Yexus los yug thiab peb cov ntseeg niaj hnub nimno puas muaj yam yuav zoo siab tshaj qhov uas peb tau mus nrog Vajtswv so, tau tus Tswv pab cawm dim ntawm nuj nqis kev txhaum thiab muaj lub neej tshiab nrog tus Tswv?
Txawm li ntawd los, tu siab uas haiv neeg Yixalayees hnub thaud tau hnov Txojmoo Zoo mus nrog Vajtswv so tiamsis tsis muaj nqis rau lawv“rau qhov thaum lawv hnov lawv tsis ntseeg” (nqe 2). Ib phaum neeg uas nyob rau ncua sijhawm ntawd raug tuag tas huv tibsi rau tom tiaj suabpuam. Phaum neeg tom qab ntawd tau mus rau hauv lub Tebchaws Coglus Tseg tiamsis tseem tsis tau saj lub neej so hauv sab ntsujplig. Tej no yog tim lawv tsis txais yuav los ntawm kev ntseeg. Lawv tau hnov Txojmoo Zoo, lawv totaub tej lus cogtseg thiab tej lus ceebtoom tiamsis lawv tsis ntseeg thiab tsis ua raws. Kev ntseeg tsis yog tsuas hnov, tsuas ntseeg hais tias muaj Txojmoo Zoo xwb, tiamsis yuav tsum txais yuav tej ntawd tas siab tas ntsws.
Txojmoo Zoo uas hais txog Tswv Yexus yeej tseem qhia tshwm nrov ncha rau txhua qhov, tseem muaj sijhawm rau txhua tus los ntseeg thiab rau txhua tus kho lub neej ntseeg kom phim. Peb yuav tsum muab haiv neeg Yixalayees lub neej kev ntseeg los ua zaj kawm rau peb lub neej ntseeg. Txhua tus tig rov saib nyias tus kheej lub neej saib peb puas yog tus tas siab txais yuav Txojmoo Zoo lawm, peb puas yog tus ntseeg tiag, puas tas siab tas ntsws tso siab rau Vajtswv tej lus cogtseg lawm tau?
Thov Vajtswv,
Tus Tswv, thov pab nyuam yaus txhob yog tus txais yuav Txojmoo Zoo los ntawm kev paub thiab lees hais tias muaj tseeb xwb, tiamsis yuav tsum yog tus tas siab ntsws ntseeg Tswv Yexus los ntawm ua lub neej paub lees kev txhaum thiab muaj lub neej tshiab qhia tshwm ua rau Vajtswv tau ntsej muag. Amees.
Peb txais yuav Txojmoo Zoo uas hais txog Tswv Yexus zoo li cas?
Nyeem Vajluskub hauv peb lub xyoo: Yelemis 2:4-25
Kênh Youtube BHKTHN:
