II Kevcai 27:11-26
Nqe cim:
“Nej cia li nyob twjywm thiab mloog kuv hais. Hnub no nej tau ua tus Tswv uas yog nej tus Vajtswv haivneeg lawm; yog li ntawd, nej yuav tsum mloog tus Tswv lus, thiab ua raws li Vajtswv tej kevcai uas hnub no kuv qhia rau nej lawm” (II Kevcai 27:9b-10).
Lus nug rau sawvdaws xav:
– Thaum hla tus dej Yauladees lawm, cov Yixalayees yuav tsum ua tej kevcai twg?
– Lo lus teb “Amees” tomqab uas cov Levis nyeem nrov txhua nqe kevcai qhia tshwm dabtsi txog tus Tswv haivneeg kev txiav txim siab?
– Peb yuav tsum ua lubneej licas kom txais tau tej koob hmoov zoo uas tus Tswv pub?
Nyob hauv tej tshooj yuav kawg ntawm phau II Kevcai, cov Yixalayees tsis yog tsuas tau mloog tej zaj qhia txog kevcai xwb, tiamsis lawv tseem mus deb ntxiv thiab, yog qhov uas lawv yuav tsum muaj kev txiav txim siab xaiv yam tseemceeb rau lawv lubneej tshiab nyob hauv lub Tebchaws Coglus Tseg. Nyob hauv ntu Vajluskub no, Vajtswv samhwm rau Nws haivneeg thaum hla tus dej Yauladees lawm yuav tsum ua kevcai coglus tseg saum lub Roob Kelixees thiab lub Roob Enpales. Ob lub roob no ua yamntxwv rau koob hmoov thiab lus foom tsis zoo. Nyob hauv kevcai coglus tseg, cov xeem tau muab faib ua ob pab, sawv saum ob sab roob Kelixees thiab Enpales sib teb tej lus foom hmoov thiab lus foom phem. Cov Levis tau txib ua tes haujlwm nyeem nrov nrov tej lus foom hmoov thiab lus foom phem, uas yog tej kevcai ua zoo nyob hauv Kaum nqe Kevcai thiab qee yam kevcai uas Mauxes sau. Tomqab uas nyeem ib nqe twg, cov pejxeem yuav tsum tib txhij teb hais tias “Amees”. Lo lus teb tib txhij no zoo li tej lus txiav txim siab ntawm txhua tus hais tias, yog lawv tsis mloog tus Tswv lus, ua txhaum tej nqe nyob hauv tej kevcai ntawd ces tej lus foom phem yuav raug lawv.
Ua ntej hla tus dej Yauladees pib lub neej tshiab hauv lub Tebchaws Coglus Tseg, Vajtswv tau npaj thiab qhuab ntuas Nws haivneeg txhua yam ntxaws heev, thiab lawv yog cov uas yuav tsum muaj kev xaiv. Yuav tau txais koob hmoov tus Tswv pub lossis yuav raug tej lus foom tsis zoo ces nyob txij ntawm nyias tus kheej lubneej puas ua raws lossis tsis ua raws Vajtswv tej lus cogtseg, tshuav Vajtswv ces yog tus ncaj ncees, Nws yeej yuav ua raws nraim li tej lus cogtseg ntawm Nws thiab Nws haivneeg.
Muaj ib qhov teebmeem tshwm muaj nimno, yog qhov uas coob leej xav tau lubneej koob hmoov, ntsib kev noj qab nyob zoo tiamsis ho tsis ua lubneej raws li tej lus cogtseg ntawm tus Tswv thiab yus tus kheej, uas yog tej lus qhia txaus nkaus thiab tseeb meej hauv phau Vajluskub. Ntawd yog lubneej ntawm cov neeg “muaj ob lub siab” rau kev ntseeg thiab rau ntiajteb, tsis muaj kev txiav txim siab tu nrho hauv lubneej, pom qhov twg zoo rau yus ces mus ua, tsis quavntsej hais tias tej ntawd puas txhaum tus Tswv tej kevcai. Zaj kawm hnub no qhuab ntuas peb hais tias, lub neej koob hmoov uas tus Tswv pub tsis yog qhov uas muaj ntau nyiaj kub, khoom siv, tsis ntsib teebmeem hauv lubneej, tiamsis yog “ib puas tsav yam koob hmoov saum ntuj ceebtsheej los” (Efexus 1:3) rau txhua tus uas mloog Vajtswv Txojlus thiab khaws cia, ua raws.
Thov Vajtswv,
Tus Tswv, thov Koj hlub, zam txim rau nyuam yaus tej kev qaug zog. Thov pab nyuam yaus ua neej raws li Koj Txojlus qhia txhua hnub kom pom Koj tej koob hmoov uas Koj foom saum ntuj ceebtsheej los. Nyuam yaus tuav Yexus Khetos lub npe thov, Amees.
Peb puas tau txais tus Tswv tej koob hmoov thaum ua raws li Nws Txojlus qhia lawm tau?
Nyeem Vajluskub hauv peb lub xyoo: Levis Kevcai 7
Kênh Youtube BHKTHN:
