Klei Aê Diê Blŭ: Klei Mtô Mñă Klei Bhiăn 27:11-26
Êlan kliăng: “Dôk ñăt kriêp leh anăn dôk hmư̆ bĕ, Ơ Israel: Hruê anei diih jing leh phung ƀuôn sang Yêhôwa Aê Diê diih. Snăn brei diih gưt asăp kơ Yêhôwa Aê Diê diih, djă pioh klei Ñu mtă leh anăn klei bhiăn Ñu kâo brei leh kơ diih hruê anei” (Klei Mtô Mñă Klei Bhiăn 27:9b-10).
Klei êmuh ksiêm mĭn: Tơdah găn leh êa krông Yurdan, ya klei brei phung Israel ngă? Klei lŏ wĭt lač: “Amen” tơdah ruê̆ grăp pruê̆ phung Lêwi răk hŏng asăp kraih ktang ya čiăng lač kơ klei phung ƀuôn Aê Diê bi klă? Si ngă drei srăng hdĭp čiăng dưi mă tŭ klei jăk jĭn myang Aê Diê brei?
Hlăm kdrêč giăm knhal tuč hlăm hdruôm hră Klei Mtô Mñă Klei Bhiăn, amâo djŏ phung Israel knŏng hmư̆ mă klei mtô mblang kơ klei bhiăn ôh, ƀiădah nao kbưi hĭn kơ klei anăn mơh jing brei digơ̆ mâo sa klei čuăn ruah yuôm bhăn kơ klei hdĭp mrâo digơ̆ hlăm Čar Aê Diê Ƀuăn. Hlăm trăn Klei Aê Diê Blŭ anei, Aê Diê mtă kơ phung ƀuôn sang Ñu tơdah digơ̆ găn leh êa krông Yurdan brei digơ̆ ngă klei bi klă klei bi mguôp ti čư̆ Garêsim leh anăn ti čư̆ Êbal. Dua boh čư̆ anei bi hmô kơ klei hơêč hmưi leh anăn klei tăm pah. Hlăm bruă bi klă klei bi mguôp, phung găp djuê Israel srăng bi mbha dua êpul, dôk dơ̆ng ti dua boh čư̆ Êbal leh anăn Gêrasim čiăng blŭ leh anăn wĭt lač hdơ̆ng digơ̆ kơ klei tăm pah leh anăn klei hơêč hmưi. Arăng jao kơ phung Lêwi bruă srăng răk hŏng asăp kraih ktang boh blŭ klei hơêč hmưi leh anăn klei tăm pah, klei digơ̆ răk anăn jing klei bhiăn kpă ênô čih hlăm Pluh Mta Klei Bhiăn leh anăn dŭm mta klei bhiăn čih leh hlăm Êma Pŏk Hdruôm Hră Y-Môis čih, leh ruê̆ grăp pruê̆ digơ̆ răk, phung ƀuôn sang srăng lŏ wĭt lač mbĭt mđrăm “Amen”. Klei lŏ wĭt lač mbĭt mđrăm anei jing msĕ si klei grăp čô hưn bi klă snei, tơdah digơ̆ amâo gưt ôh asăp Aê Diê leh anăn ngă klei bi msoh kơ jih jang klei arăng răk leh, snăn klei tăm pah srăng truh kơ digơ̆.
Êlâo kơ digơ̆ găn êa krông Yurdan leh anăn dơ̆ng kčưm kơ klei hdĭp mrâo hlăm Čar Aê Diê Ƀuăn. Aê Diê mprăp leh anăn bi hriăm leh phung ƀuôn sang Ñu klă snăk kơ jih jang klei, leh anăn kdrêč ăt dôk jing tui si klei grăp čô mnuih čuăn mă. Mă tŭ klei jăk jĭn Aê Diê brei amâodah mă tŭ klei tăm pah tui hlue klei grăp čô mnuih dôk dơ̆ng ƀơ̆ng huă gưt hĕ amâodah hơăi kơ klei Aê Diê bi mguôp, bi kdrêč tĭng kơ Aê Diê Pô Sĭt Suôr, sĭt nik Ñu srăng ngă djŏ klei bi mguôp plah Ñu hŏng phung ƀuôn sang Ñu.
Mâo sa klei bi klăk mgar drei khăng ƀuh hlăm klei hdĭp hruê anei jing, mâo lu mnuih čiăng snăk mâo klei hdĭp jăk mơak, êđăp ênang ƀiădah amâo hdĭp djŏ tui si klei ƀuăn rơ̆ng leh ôh hlăm klei bi mguôp plah wah Aê Diê hŏng diñu pô, anăn jing klei mtă ênŭm snăk leh anăn klă leh hlăm hdruôm hră Klei Aê Diê Blŭ. Anei jing klei hdĭp phung “êbat ting ring rang dua nah” plah wah klei đăo hŏng lăn ala, amâo mâo klei čuăn ngă khut khat ôh hlăm klei hdĭp, ƀuh ya klei jing tŭ dưn kơ diñu pô snăn diñu ngă, amâo uêñ ôh kơ klei anăn klei bhiăn leh anăn klei kpă ênô Aê Diê brei ngă hĕ amâodah hơăi. Klei hriăm hruê anei mñă kơ phung drei snei, klei hdĭp jăk mơak Aê Diê ƀuăn brei kơ drei amâo djŏ ôh klei mâo lu prăk kăk, lu dŏ ngăn amâodah jih jang bruă hlăm klei hdĭp anei jing ênưih sơăi, ƀiădah klei jăk jĭn anăn jing “djăp mta klei jăk jĭn myang ti jih anôk hlăm adiê” (Êphêsô 1:3) pioh leh kơ hlei pô hmư̆ Klei Aê Diê Blŭ, gưt leh anăn tui hlue ngă.
Drei tuôm bi knal leh mơ̆ kơ klei jăk jĭn mơ̆ng Aê Diê tơdah drei gưt asăp kơ Ñu?
Wah lač: Ơ Khua Yang, akâo kơ Ih pap brei kơ klei awăt kâo. Đru kâo grăp hruê jhŏng hdĭp tui si klei Ih mtă leh čiăng kơ kâo dưi mă tŭ klei jăk jĭn myang mơ̆ng jih anôk ti adiê Ih brei kơ kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Bruă Lêwi 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
