Klei Aê Diê Blŭ: II Kôrantô 12:1-6
Êlan kliăng: “Gơ̆ srăng jing prŏng hĭn, ƀiădah kâo srăng jing điêt hĭn.” (Y-Yôhan 3:30)
Klei êmuh ksiêm mĭn: Ya klei jăk Khua ƀĭng kna Y-Pôl tuôm mâo găn leh? Ya ngă ñu lŏ yăl dliê klei anei? Ya klei bi hmô Khua ƀĭng kna Y-Pôl lač hlăm klei mă bruă? Si drei mă bruă kơ Aê Diê čiăng Anăn Ñu mâo klei mpŭ mni nanao?
Wăt tơdah amâo lač klă ôh anăn mnuih hlăm klei yăl dliê ƀiădah drei thâo klă Khua ƀĭng kna Y-Pôl dôk lač kơ ñu pô. Hlăk êjai phung khua pô mtô soh hưn kơ lu mta klei, boh nik blŭ jhat kơ gơ̆ čiăng bi mni kơ diñu pô, snăn tinei Khua ƀĭng kna Y-Pôl lač bi mni kơ pô amâo mâo klei tŭ dưn ôh, ƀiădah ñu čiăng lač kơ phung đăo ti Kôrantô thâo ñu tuôm găn leh klei jăk mơak yuôm bhăn kơ “klei bi ƀuh leh anăn klei bi êdah mơ̆ng Khua Yang” (êlan 1). Pluh pă thŭn êlâo, Aê Diê ba ñu ti tal adiê tal tlâo, truh kơ Paradi, jing Ƀuôn Ala Mtao, ăt jing anôk phung jing dŏ Aê Diê tơdah djiê dưi hdĭp jăk mơak hŏng Ñu (Y-Luk 23:43), leh anăn ñu dưi “ñu hmư̆ klei amâo dưi lŏ yăl dliê ôh, klei mnuih amâo dưi lŏ blŭ ôh” (êlan 4).
Ya ngă Khua ƀĭng kna Y-Pôl lač bi mni kơ pô amâo mâo klei tŭ dưn ôh, ƀiădah ñu hưn kơ “klei bi ƀuh leh anăn klei bi êdah mơ̆ng Khua Yang”? Kyua ti anăp klei phung khua pô mtô soh ngă, mâo leh lu phung đăo ti Sang Aê Diê Kôrantô mgei klei đăo (II Kôrantô 11:19), tơdah ñu amâo blŭ snăn phung khua pô mtô soh srăng lŏ dơ̆ng bi rai phung biăp Aê Diê kjham hĭn. Ñu lač klei anăn amâo djŏ čiăng bi mni kơ pô ôh ƀiădah kyua klei tŭ dưn kơ phung đăo ti Sang Aê Diê Kôrantô. Ñu ăt lŏ dơ̆ng bi mklă klei mĭn ñu jing tơdah bi mni kơ pô snăn ñu knŏng bi mni kơ klei êdu awăt pô đuč (êlan 5). Ñu amâo čiăng mjhua ôh klei bi ƀuh anăn čiăng bi mni kơ pô, ñu amâo čiăng ôh arăng srăng bi mni kơ ñu mơ̆ng klei găn yuôm bhăn snăn, ƀiădah knŏng čiăng digơ̆ srăng thâo kral djŏ klei Khua Yang bi mtlaih mơ̆ng ya klei digơ̆ ƀuh hlăm ñu leh anăn klei ñu blŭ (êlan 6).
Sa čô mnuih msĕ si Khua ƀĭng kna Y-Pôl mâo Khua Yang iêô leh anăn yua čiăng mkŏ mjing lu Phung Sang Aê Diê, dưi pŭ ba truh tal adiê tal tlâo jing Paradi, tơdah ñu bi mni kơ pô leh anăn hưn kơ ya klei ñu dưi ngă leh kơ Aê Diê snăn ăt kăn mâo klei ƀuah mơh. Khădah snăn, mdê hŏng phung khua pô mtô soh, Khua ƀĭng kna Y-Pôl amâo bi mni hưn kơ klei tŭ pô ôh, ăt kăn blŭ jhat kơ pô mkăn rei čiăng mđĭ pô, ñu knŏng čiăng hdĭp mă bruă msĕ si Y-Yôhan pô ngă Ƀaptem,“Gơ̆ srăng jing prŏng hĭn, ƀiădah kâo srăng jing điêt hĭn.” (Y-Yôhan 3:30). Ñu čang hmăng grăp čô mnuih thâo kral Khua Yang leh anăn bi mni kơ Khua Yang mơ̆ng klei hdĭp ñu mă bruă. Klei bi hmô mơ̆ng Khua ƀĭng kna Y-Pôl mđĭ ai drei jih ai tiê luă gŭ bi ti gŭ pô hlăm klei mă bruă čiăng kơ Anăn Aê Diê dưi mpŭ mni nanao.
Drei tuôm bi mni kơ pô amâodah blŭ jhat kơ pô mkăn msĕ si phung khua pô mtô soh mơ̆? Ya klei diih ƀuăn rơ̆ng tơdah hriăm klei hriăm hruê anei?
Wah lač: Ơ Aê Diê! Hơêč hmưi kơ Ih jing Aê Diê Kpă Ênô kơ kâo pô leh anăn kơ anak mnuih kkuh mpŭ. Bi mni kơ Ih kyua Ih brei leh klei pap leh anăn yua klei hdĭp kâo mă bruă kơ Ih. Akâo kơ Ih đru klei hdĭp kâo mpŭ mni nanao kơ Anăn Ih.
Dlăng Klei Aê Diê Blŭ hlăm tlâo thŭn: Y-Luk 8:1-25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
