Nkauj Quaj Ntsuag 3:39-54
Nqe cim:
“Vim li cas peb pheej yws thaum peb raug txim, vim peb tej kev txhaum? Cia peb tshuaj saib peb lub neej thiab tig rov los cuag tus Tswv.” (Nkauj Quaj Ntsuag 3:39-40)
Lus nug rau sawvdaws xav:
– Tus Tswv haivneeg ua li cas thaum lawv raug txim?
– Tus cevlus Yelemis ntuas tus Tswv haivneeg kom yuav tsum muaj tus cwjpwm li cas thaum ntsib kev txomnyem?
– Peb pheej muaj tus cwjpwm zoo li cas thaum ntsib kev txomnyem?
Tus Tswv haivneeg tabtom nyob rau lub tsamthawj nyuaj kawg nkaus, lawv raug suav zoo ib yam li “tej khoom tsis muaj nqis”, txhua tus yeebncuab puavleej tawmtsam lawv, lawv ua neej muaj kev txhawj ntshai, puastsuaj, piam sij thiab zoo nkaus li Vajtswv tsis mloog lawv tej lus thov thiab tsis saib xyuas lawv (nqe 45-54). Ntsia pom cov pejxeem raug txomnyem, tus cevlus Yelemis quaj ntsuag rau lawv. Cov nqe lus “Kuv kua muag ntws laws”, “Kuv cov kua muag yuav ntws los tsis paub tu ib yam li tus dej ntws” (nqe 48-49) qhia tawm txojkev hlub tshua nws cov pejxeem. Yelemis tsis nyob twjywm thaum pom cov pejxeem tabtom raug tej ntawd, nws kuj nrog lawv raug ib yam thiab, qhov kev tu siab no nyuaj mus txog qib uas Yelemis pom tias nws ua tsis taus pa. Thaum ntawd, tsis yog Yelemis xwb tiamsis tagnrho cov pejxeem zeem paub tias tus Tswv “tauv huab uas yog koj txojkev npautaws tuab heev peb tej lus thov thiaj tuaj tsis txog koj” (nqe 44).
Nyob rau lub tsamthawj ntawd, tus Tswv haivneeg tau yws txog tej uas lawv raug. Tiamsis tus cevlus Yelemis qhia rau nws haivneeg pom tias qhov uas lawv tabtom raug yeej tsimnyog lawv ris vim tej kev txhaum uas lawv tau ua rau Vajtswv, tsis tas yuav yws li. Ua lwm seem lus hais, tsis txhob yog pheej yws, tus Tswv haivneeg yuav tsum ua raws li Vajtswv txoj lus uas hais tias“cia peb tshuaj saib peb lub neej thiab tig rov los cuag tus Tswv” (nqe 40). Tshuaj yus es lees txim thiab tig rov los cuag tus Tswv yog tus cwjpwm cheemtsum tus Tswv haivneeg ua thaum ntsib teebmeem.
Thaum ntsib tej uas tsis haum siab, tawmtsam lossis txomnyem, feem coob peb tsuas xav nrhiav tswvyim khiav tawm, lossis nrhiav tswvyim hais daws yus zaj… tsawg tus thiaj paub xav txog qhov uas yus ua tsis yog thiab kho. Muaj qee zaus peb tseem mus yws Vajtswv hais tias Nws tsis mloog peb tej lus thov pab. Thaum tus Tswv haivneeg hnov tej lus ntuas ntawm tus cevlus Yelemis, lawv tsis yws, lawv tig los tshuaj saib tej uas lawv ua thiab zeem paub tias, “Tus Tswv, peb tau ua txhaum thiab ntxeev siab rau koj lawm, koj tsis tau zam txim rau peb li.” (nqe 42), thiab lawv kuj totaub tias nov yog qhov uas ua rau Vajtswv tsis pab lawv, tsis mloog lawv tej lus thov (Yelemis 14:12). Nov yog ib tug qauv zoo pub rau peb, txhua zaus uas ntsib tej kev nyuaj txomnyem hauv lub neej, cia li “tshuaj saib peb lub neej thiab tig rov los cuag tus Tswv.” (nqe 40).
Thov Vajtswv,
Vajtswv tus uas dawbhuv, ncaj ncees! Vim nyuamyaus tej kev txhaum ua rau Koj tsis teb nyuam yaus tej lus thov. Thov Koj qhia kom nyuam yaus paub tshuaj saib tus kheej lees txim, tig rov los cuag Vajtswv. Thov Koj pab kom nyuam yaus tsis tawv ncauj, tiamsis ua tib zoo saib lub neej kom tau Koj hlub. Nyuam yaus tuav Tswv Yexus lub npe thov, Amees.
Peb puas “tshuaj thiab sim yus” thaum ntsib tej kev nyuaj lawm tau?
Nyeem Vajluskub hauv peb lub xyoo: Yausuas 3
Kênh Youtube BHKTHN:
