Klei Aê Diê Blŭ: Klei Čŏk Hia 3:39-54
Êlan kliăng: “Si ngă sa čô mnuih hdĭp srăng blŭ dŭñ dŭñ kơ klei bi kmhal klei soh ñu? Brei drei lông dlăng leh anăn ksiêm êlan drei, leh anăn lŏ wĭt kơ Yêhôwa!”(Klei Čŏk Hia 3:39-40)
Klei êmuh ksiêm mĭn: Si ngă phung ƀuôn sang Aê Diê ruah ngă tơdah tlă anăp hŏng klei Yêhôwa bi kmhal? Khua pô hưn êlâo Y‑Yêrêmi mtă kơ phung ƀuôn sang Aê Diê si ngă tơdah tuôm hŏng klei dleh dlan? Si drei khăng ngă tơdah tuôm hŏng klei truh?
Phung ƀuôn sang Aê Diê dôk hlăm boh klei dleh dlan, arăng dlăng msĕ si
“mnơ̆ng čhŏ leh anăn djah”, grăp čô mâo klei bi kdơ̆ng hŏng diñu, diñu hdĭp hlăm klei huĭ hyưt, bi rai, jhat snăk msĕ si Aê Diê amâo hmư̆ ôh klei wah lač leh anăn amâo dlăng diñu ôh (êlan 45-54). Dlăng kơ klei knap mñai phung ƀuôn sang pô, Khua pô hưn êlâo Y‑Yêrêmi hia pap leh kơ diñu. Hlăm pruê̆ blŭ “Ală kâo ƀlĕ êa ală lu msĕ si hnoh êa”, “Ală kâo srăng ƀlĕ êa amâo mdei ôh” (êlan 48-49) bi êdah klei ñu pap mñai snăk kơ phung ƀuôn sang. Ñu amâo ngă ngơi mang ôh ti anăp boh klei djuê ana dôk tuôm, ƀiădah ñu ruă mbĭt hŏng klei ruă djuê ana, klei ruă prŏng prĭn, pap mñai anăn ngă kơ ñu ƀuh msĕ si amâo thâo bi êwa ôh. Hlăk anăn, amâo djŏ knŏng hjăn Khua pô hưn êlâo Y‑Yêrêmi ôh ƀiădah phung ƀuôn sang Ñu ăt thâo Yêhôwa “Ih guôm ih pô hŏng knam tơl klei wah lač amâo dưi găn truh kơ ih ôh” (êlan 44).
Hlăm boh klei anăn, phung ƀuôn sang Aê Diê lač kơ klei pô dôk tuôm. Ƀiădah Khua pô hưn êlâo Y‑Yêrêmi ktrâo lač kơ phung ƀuôn sang Aê Diê ƀuh klei bi kmhal diñu dôk tŭ jing kdrêč brei diñu tŭ kyua klei soh diñu ngă leh hŏng Aê Diê, kyua anăn, amâo blŭ duñ duñ ôh. Amâodah lŏ lač, hrô kơ blŭ duñ duñ jing knuih đăm brei mâo ôh, phung ƀuôn sang Aê Diê brei “lông dlăng leh anăn ksiêm êlan drei, leh anăn lŏ wĭt kơ Yêhôwa!” (êlan 40). Ksiêm dlăng pô čiăng kmhal leh anăn lŏ wĭt hŏng Aê Diê jing knuih djŏ mơ̆ng phung ƀuôn sang Ñu ti anăp boh klei dôk găn.
Tơdah tuôm hŏng sa bruă amâo djŏ msĕ si pô čiăng, klei dleh dlan, amâodah knap mñai, lu phung drei knŏng čiăng duah hdră čiăng kbiă đuĕ, amâodah duah hdră tuh kơ boh klei kơ pô mkăn… ƀiădah amâo đei mĭn ôh kơ klei soh pô čiăng mkra mlih.Tăp năng drei lŏ wĭt dlăng kơ Aê Diê čiăng blŭ duñ duñ kyua Ñu amâo mđing hmư̆ klei drei wah lač čiăng đru mtlaih. Phung ƀuôn sang Ñu hmư̆ leh klei Khua pô hưn êlâo Y‑Yêrêmi mtô, hrô kơ blŭ duñ duñ, diñu lŏ ksiêm dlăng êlan pô leh anăn ƀuh, “Hmei ngă soh leh anăn bi kdơ̆ng leh, leh anăn ih amâo pap brei ôh” (êlan 42), leh anăn diñu ăt thâo săng anei jing mta phŭn ngă kơ Aê Diê wĭr ƀô̆ mta, amâo mđing hmư̆ ôh klei diñu wah lač hŏng Aê Diê (Y‑Yêrêmi 14:12). Anei jing klei bi hmô jăk kơ drei, grăp blư̆ tuôm hŏng klei dleh dlan hlăm klei hdĭp, brei jih ai tiê lông dlăng leh anăn ksiêm êlan drei, leh anăn lŏ wĭt kơ Yêhôwa!” (êlan 40).
Drei “lông dlăng leh anăn ksiêm êlan pô” mơ̆ tơdah tuôm hŏng klei dleh dlan?
Wah lač: Ơ Aê Diê Pô Doh Jăk, Kpă Ênô! Kyua klei soh anak mnuih ngă kơ klei wah lač amâo mâo Ih hmư̆ leh anăn wĭt lač ôh. Akâo kơ Khua Yang đru kâo thâo ksiêm dlăng êlan pô čiăng thâo kmhal, lŏ wĭt hŏng Aê Diê. Akâo kơ Ih đru kâo amâo khăng ai tiê ôh, ƀiădah klă sĭt lŏ dlăng wĭt kâo pô čiăng mâo Ih pap brei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôsuê 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
