Lukas 8:40-56
Nqe cim
“Koj tsis txhob ntshai; cia li ntseeg, koj tus ntxhais yeej yuav ciaj!” (Lukas 8:50b).
Lus nug rau sawvdaws xav:
- Yailus tus ntxhais tabtom zoo licas?
- Tus muaj kev ntseeg thiab tus tsis muaj kev ntseeg saib pom Yailus tus ntxhais sib txawv licas?
- Peb tau qhuab ntuas licas thaum ntsib cov txheeb ze raug tej teebmeem ua rau tas kev cia siab?
Thaum Yailus tuaj cuag Tswv Yexus, nws tib tug ntxhais uas muaj kaum ob xyoos “twb yuav tuag” (nqe 42). Thiab thaum Tswv Yexus tabtom nrog tus pojniam coj khaubncaws sibtham, ces tus ntxhais ntawd “twb tuag lawm” (nqe 49). Yog li ntawd, tus uas tuaj tom tsev tuaj thiaj hais rau Yailus kom “tsis txhob tabkaum xibhwb ntxiv lawm”. Thaum Tswv Yexus tuaj txog hauv Yailus tsev, ces pom “cov neeg uas nyob hauv tsev, quaj nyiav tus ntxhais ntawd ntsoog qees”. Sawvdaws tas kev cia siab rau tus ntxhais ntawd lawm, lawv thiaj nyuaj siab thiab quaj nyiav. Txawm yog, thaum Tswv Yexus hais kom cov neeg ntawd txhob quaj vim tus ntxhais tsis tuag, los lawv tseem thuam “luag Yexus”.
Yog cov ua niam ua txiv, tshwjxeeb yog cov niam txiv uas muaj menyuam twb loj hlob li Yailus tus ntxhais lawm, ntau zaug peb yooj yim poob mus rau tej kev xav zoo ib yam li cov uas nyob hauv Yailus lub tsev. Tej zaum peb tsuas quaj nyiav vim tsis pom muaj kev cia siab rau peb tej menyuam lawm. Tej zaum peb cia cov neeg sab nraud tej kev xav thiab tej lus hais tsis zoo ua rau peb tas kev cia siab rau tus Tswv. Los ntawm cov neeg tsis muaj tus Tswv saib pom, mas Yailus tus ntxhais yeej tuag lawm tiag, tiamsis cov neeg uas muaj kev ntseeg saib pom hais tias “nws pw tsaug zaug xwb”. Ua Vajtswv tsaug, Yailus saib los ntawm txojkev ntseeg, nws lub tsev neeg thiaj pom tej txujci tseemceeb. Thaum pib, Yailus txhos caug taij thov rau nws tus menyuam. Tomqab ntawd, nws xaiv tsis tig rov thaum pom zoo li uas tus Tswv tsis mloog thiab tsis quavntsej txog nws tej lus taij thov. Thaum muaj neeg hais kom txhob ua tabkaum tus Tswv, thiab thaum pom cov neeg nyob hauv tsev quaj nyiav, los nws yeej tsis tas kev cia siab tiamsis nws coj tus Tswv los hauv nws tsev, nrog tus Tswv mus hauv txaj, nws thiaj pom tej uas nws taij thov tau muaj tiav, thiab pom tus Tswv ua tau tej uas tibneeg ua tsis tau.
Ncaj rau Niam Txiv Hnub, peb tig xav los rau peb lub tsev neeg. Thaum peb sawv tabmeeg peb cov txheeb ze uas zoo li tsis muaj kev cia siab lawm vim kev mob nkeeg lossis vim ua neeg tsis tsimtxiaj, peb muaj ob txojkev xaiv: Quaj nyiav ib yam li cov neeg nyob hauv Yailus tsev, lossis ntseeg tus Tswv tej lus hais tias “Koj tsis txhob ntshai; cia li ntseeg” (nqe 50b). Tej zaum zoo li uas tus Tswv tsis hnov, tsis quav ntsej peb tej lus taij thov. Tiamsis Tswv Yexus, tus uas ua txuj ua li tsis quav ntsej Yailus tej lus taij thov, tau tig los saib Yailus ua rau nws muaj kev cia siab. Tus Tswv kuj mus hauv Yailus tsev raws li nws thov, thiab hu tus me ntxhais uas “twb tuag lawm”, twb tsis muaj tshuaj kho tau lawm, twb tas kev cia siab lawm sawv rov qab los. Tus uas naghmo, hnub no thiab mus ibtxhis tsis txawj hloov kuj yuav ua tej yam ntawd rau peb, yog li ntawd peb “tsis txhob ntshai; cia li ntseeg xwb”.
Ncaj rau Niam Txiv Hnub, peb ua tus Tswv tsaug txog yam dabtsi ntawm peb cov txheeb ze uas peb hlub?
Thov Vajtswv
Tus Tswv, nyuam yaus tsev neeg lubneej tsis tsawg tej teebmeem, thov pab nyuam yaus tuav kev ntseeg ruaj khov rau ntawm Koj, tsis tas kev cia siab tiamsis ua siab ntev taij thov pub rau cov txheeb ze uas nyuam yaus hlub. Amees.
Nyeem Vajluskub peb lub xyoos: Ntawv Nkauj 9
Tshooj Youtube BHKTHN: https://www.youtube.com/c/bhkthn
