Klei Aê Diê Blŭ: Y-Mathiơ 24:3-14
Êlan kliăng: “Leh anăn Yêsu lač kơ diñu, “Nao bĕ tar ƀar lăn ala leh anăn mtô klei mrâo mrang jăk kơ jih jang găp djuê mnuih.” (Y-Markôs 16:15)
Klei êmuh ksiêm mĭn: Ya klei phung khua ƀĭng kna êmuh Khua Yang? Ya klei Khua Yang hưn êlâo brei răng? Ya jing bruă jao kơ Phung Sang Aê Diê leh anăn grăp čô drei brei ngă bi jêč?
Phung ƀĭng kna hriê kơ Khua Yang hjăn hŏng sa klei êmuh yuôm snăk, akâo kơ Khua Yang hưn brei hbĭl leh anăn ya klei bi knăl kơ klei Khua Yang lŏ hriê leh anăn kơ hruê knhal tuč ênuk; kơ anôk phung ƀĭng kna êmuh djŏ snăk kyua jing ti dlông čư̆ Ôliwơ (êlan 3). Khua pô hưn êlâo Y-Sakari hưn leh Yang Mêsi srăng dôk dơ̆ng ti dlông čư̆ anei hlăk mkŏ mjing Ƀuôn Ala Mtao Ñu (Y-Sakari 14:4).
Hlăm klei wĭt lač, Khua Yang Yêsu bi êdah kơ phung ƀĭng kna lu klei hưn êlâo brei răng. Ñu hưn kơ lu klei truh prŏng êlâo kơ hruê knhal tuč ênuk, mâo: klei mgưt anăn Krist, klei bi blah, klei ư̆ êpa, klei ktư̆ yơ̆ng lăn ala, klei arăng bi mdjiê kyua klei đăo, klei rŭng răng djăp anôk, klei jhat ƀai đĭ lar. Ñu hưn brei thâo, klei bi knăl anei knŏng jing mphŭn dơ̆ng kơ ênuk knap mñai prŏng kyuadah klei knhal tuč ăt ka truh ôh. Khua Yang mñă kơ phung ƀĭng kna snei, amâo guôn čiăng thâo klă hbĭl hruê mmông knhal tuč ôh, ƀiădah brei mđing dlăng kơ jih klei bi knăl dôk truh čiăng kăp dôk răng leh anăn ngă bruă jao hiu hưn bi lar Anăn Khua Yang, hmiêt mkăp kơ hruê Khua Yang lŏ hriê.
Khua Yang klah čŭn: “Hlei pô gĭr tơl knhal tuč srăng tlaih” (êlan 13). Anei jing sa klei mñă kơ grăp čô anak ƀuôn sang Aê Diê brei djă pioh kjăp klei đăo leh anăn dôk gĭr tơl knhal tuč wăt tơdah mâo klei dleh dlan truh dưn. Dôk hdĭp hlăm ênuk knhal tuč, sĭt nik phung đăo kơ Krist srăng tlă anăp hŏng lu klei lông dlăng, klei arăng ngă jhat leh anăn klei knap mñai êjai ngă bruă hiu hưn Klei Mrâo Mrang Jăk. Ƀiădah brei grăp čô drei dôk mdih leh anăn kăp răng kơ jih jang klei truh jŭm dar drei, čiăng kơ drei djă păn kjăp kơ klei Khua Yang ƀuăn leh anăn dôk kjăp ai tiê klei mĭn tơl truh kơ hruê Khua Yang lŏ hriê. Klei mtă prŏng mơ̆ng Khua Yang êlâo kơ Ñu đĭ wĭt ti adiê, “Kyuanăn nao bĕ diih mjing phung ƀĭng kna hlăm jih jang găp djuê mnuih, ngă ƀaptem kơ diñu hlăm anăn Ama, anăn Anak, leh anăn anăn Yang Mngăt Jăk; bi hriăm diñu brei gưt jih jang klei Kâo mtă leh kơ diih. Leh anăn nĕ anei, Kâo dôk mbĭt hŏng diih nanao tơl knhal tuč lăn ala.” (Y-Mathiơ 28:19-20). Klei mtă anei hlăm hdruôm hră Klei Mrâo Mrang Jăk Y-Markôs čih klah čŭn “Nao bĕ tar ƀar lăn ala leh anăn mtô klei mrâo mrang jăk kơ jih jang mnuih” (Y-Markôs 16:15). Grăp čô phung đăo kơ Krist brei thâo săng bruă klam anei leh anăn ngă bruă anei hŏng jih ai tiê. Ƀuh lu klei bi knăl kơ ênuk knhal tuč, drei mâo klei mñă leh anăn mtrŭt hĭn kơ bruă hiu hưn Klei Mrâo Mrang Jăk leh anăn uêñ mĭn duh kơ bruă anei, bi mđĭ ai phung anak Aê Diê ngă. Khua Yang Yêsu lač klă klei knhal tuč srăng truh hlăk Klei Mrâo Mrang Jăk hưn leh kơ jih tar ƀar lăn ala (êlan 14). Phung Sang Aê Diê leh anăn drei pô yơh brei gĭr duh kơ bruă hiu hưn Klei Mrâo Mrang Jăk êlâo kơ hruê Khua Yang lŏ hriê.
Si ngă Phung Sang Aê Diê drei leh anăn drei pô thâo săng mơ̆ kơ klei jêč hlăm bruă hiu hưn Klei Mrâo Mrang Jăk bi mtlaih mnuih?
Wah lač: Ơ Khua Yang, akâo Ih pap brei kơ klei soh kâo leh anăn Phung Sang Aê Diê kyua ka uêñ mĭn kơ bruă jêč bi mtlaih mnuih. Akâo Khua Yang mñă kâo brei thâo yua bi jăk mmông găl pioh hưn Anăn Khua Yang, leh anăn brei Phung Sang Aê Diê uêñ mĭn lu hĭn kơ bruă bi mtlaih mnuih.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 15:35-16:15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
