Klei Aê Diê Blŭ: I Têsalônik 3:10-13
Êlan kliăng: “Drei khăp kyuadah Ñu khăp leh kơ drei êlâo.” (I Y-Yôhan 4:19)
Klei êmuh ksiêm mĭn: Ya klei Khua ƀĭng kna Y-Pôl akâo kơ Khua Yang brei thiăm kơ phung đăo ti Sang Aê Diê Têsalônik ? Ya ngă ñu akâo msĕ snăn ? Si diih bi êdah klei khăp Khua Yang hdơ̆ng pô ?
Khua ƀĭng kna Y-Pôl leh anăn phung mă bruă mbĭt bi êdah klei êpa mhao dưi lŏ wĭt čuă čhưn phung đăo ti Têsalônik mơ̆ng klei wah lač akâo kơ Aê Diê leh anăn Khua Yang Yêsu atăt êlan kơ ñu leh anăn phung găp nao hŏng ayŏng adei (êlan 10-11). Wăt tơdah hlăm boh klei bŏ hŏng dleh dlan ƀiădah klei đăo leh anăn klei khăp phung đăo ti Sang Aê Diê Têsalônik ăt mâo thiăm leh anăn êbeh dlai, đru kơ Khua ƀĭng kna Y-Pôl hŏng ƀĭng găp mơak bi mni kơ Aê Diê, diñu lŏ dơ̆ng myơr klei wah lač, “Leh anăn akâo kơ Khua Yang bi mđĭ êbeh dlai klei diih bi khăp hdơ̆ng diih leh anăn kơ jih jang mnuih, msĕ si hmei khăp kơ diih” (êlan 12). Ñu čang hmăng phung ƀuôn sang Aê Diê ti Têsalônik hŏng klei khăp êbeh dlai hlăm klei hdĭp, diñu srăng dưi dôk kjăp leh anăn kluôm ênŭm ti anăp Aê Diê hlăm hruê Khua Yang Yêsu lŏ hriê (êlan 13).
Klei mdê leh anăn ăt jing klei siam amâo dưi mkă ôh phung mkăn thâo ƀuh hlăm găp djuê prŏng Aê Diê – anôk phung anak Aê Diê, phung ayŏng adei wăt tơdah amâo sa êrah ôh ƀiădah mâo sa klei đăo, dưi bi tui kyua êrah yuôm bhăn mơ̆ng Khua Yang Yêsu Krist, jing knuih hdĭp bi êdah klei khăp hdơ̆ng pô amâo djŏ knŏng hŏng klei blŭ ƀiădah wăt “hŏng klei ngă leh anăn hŏng klei sĭt.” (I Y-Yôhan 3:18). Anăn jing mta phŭn Khua ƀĭng kna Y-Pôl akâo kơ Aê Diê đru ayŏng adei phung đăo Têsalônik ƀrư̆ đĭ leh anăn bŏ hŏng klei khăp. Tơdah klei khăp hlăm Khua Yang dưi đĭ, klei khăp anăn amâo djŏ knŏng dưi bi êdah hŏng phung ayŏng adei sa klei đăo ôh ƀiădah lŏ bi êdah hŏng jih jang mnuih.
Khua ƀĭng kna Y-Yôhan mtô leh: “Drei khăp kyuadah Ñu khăp leh kơ drei êlâo.” (I Y-Yôhan 4:19). Phung ƀuôn sang Aê Diê brei mâo knuih hdĭp bi êdah klei khăp kyua Khua Yang bi hmô leh čiăng kơ drei tui hlue Ñu, leh anăn kyua Khua Yang khăp leh kơ drei êlâo, klei khăp anăn êbeh dlai hlăm drei tơl truh kơ grăp čô mnuih drei bi tuôm. Kyua knuih mnuih hđăp ăt dôk hlăm phung drei snăn lu blư̆ drei ƀuh dleh snăk khăp kơ phung riêng gah pô, hlăk anăn, brei drei nao kơ Aê Diê jing Phŭn Klei Khăp čiăng akâo kơ Ñu brei klei khăp leh anăn êbeh dlai čiăng kơ drei dưi kjăp ai tiê klei mĭn, kluôm ênŭm hlăm klei hdĭp doh jăk ti anăp Aê Diê leh anăn dưi hdĭp mâo klei khăp msĕ si Aê Diê khăp leh kơ drei. Akâo kơ Khua Yang đru drei mâo knuih hdĭp bŏ hŏng klei khăp hdơ̆ng pô čiăng mâo lu mnuih thâo kơ klei khăp Aê Diê.
Drei dôk akâo wah lač kơ Aê Diê čiăng dưi mâo ya klei hlăm klei hdĭp?
Wah lač: Ơ Aê Diê mơ̆ng klei khăp! Akâo kơ Ih brei kơ kâo dưi mâo thiăm leh anăn êbeh dlai klei khăp Ih čiăng kâo dưi khăp kơ ayŏng adei leh anăn grăp čô kâo bi tuôm, mơ̆ng anăn kâo bi guh kơang Anăn Ih leh anăn lu phung thâo kral klei khăp Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
