Klei Aê Diê Blŭ: Klei Mtô Mñă Klei Bhiăn 23:15-16, 19-20, 24-25
Êlan kliăng: “Jăk mơak yơh phung thâo pap, kyuadah Aê Diê srăng pap kơ diñu” (Y-Mathiơ 5:7).
Klei êmuh ksiêm mĭn: Ya jih jang klei bhiăn hlăm tlâo trăn Klei Aê Diê Blŭ anei mtă kơ phung ƀuôn sang Aê Diê ngă? Hŏng klei anăn, drei thâo si Pô Aê Diê jing? Hruê anei, si drei bi êdah klei thâo pap kơ phung ayŏng amai adei drei?
Jih jang klei bhiăn hlăm tlâo trăn Klei Aê Diê Blŭ anei čiăng bi hriăm phung ƀuôn sang Aê Diê bi êdah klei pap kơ tlâo phung: Tal sa, hŏng phung “hlŭn” jing phung tue dôk jưh; tal dua, hŏng phung kƀah knap hlăm klei hdĭp; leh anăn tal tlâo, hŏng phung ư̆ êpa, kƀah mnơ̆ng ƀơ̆ng huă hlăm ƀuôn sang pô.
Hŏng sa čô hlŭn jing mnuih tue đuĕ mơ̆ng khua gơ̆ leh anăn hriê dôk hlăm čar Israel, phung ƀuôn sang Aê Diê amâo dưi atăt wĭt leh anăn jao gơ̆ kơ khua gơ̆ ôh, kăn dưi čhĭ gơ̆ brei lŏ jing hlŭn sa blư̆ dơ̆ng rei. Amâo mâo pô dưi duah klei tŭ dưn kơ ñu pô mơ̆ng klei knap mñai phung anei ôh. Kyuadah phung Israel ăt tuôm jing hlŭn leh mơh hlăm čar Êjip, kdlưn hĭn kơ phung mkăn, brei diñu thâo săng kơ klei knap leh anăn thâo đru mnuih mkăn msĕ si Klei Aê Diê Blŭ mtă leh, amâo dưi ktư̆ juă digơ̆ ôh (êlan 15-16).
Hŏng phung tuôm hŏng klei dleh dlan hlăm klei duah ƀơ̆ng huă čiăng čan lĭng, Aê Diê brei mnuih mdrŏng brei mnuih ƀun ƀin čan ƀiădah amâo dưi ƀơ̆ng mnga ôh, knŏng dưi ƀơ̆ng mnga phung tue hdĭp ti krah phung ƀuôn sang Aê Diê đuč. Klei anei brei ƀuh, brei jih jang klei bi čan lĭng hdơ̆ng phung ƀuôn sang kbiă hriê mơ̆ng ai tiê jăk leh anăn bŏ hŏng klei thâo pap, kyuadah klei jăk jĭn kbiă hriê mơ̆ng Aê Diê amâo djŏ kbiă hriê mơ̆ng prăk kăk kyua klei ƀơ̆ng đĭ ôh (êlan 19-20).
Phung tal tlâo Aê Diê čiăng kơ phung ƀuôn sang Ñu đru jing phung dôk ư̆ êpa. Klei bhiăn Aê Diê mtă brei đang boh kriăk leh anăn hma grăp boh sang pŏk nanao kơ phung dôk êpa, mhao amâodah wơr êlan jing msĕ si sa klei ƀuăn rơ̆ng čiăng hlăm čar amâo mâo sa čô mnuih srăng tŭ klei knap kyua klei ư̆ êpa ôh (êlan 24-25). Jih jang klei bhiăn anei brei drei ƀuh Aê Diê jing Pô bŏ hŏng klei thâo pap, wăt kơ phung ƀun ƀin, knap mñai hlăm klei hdĭp.
Brei phung đăo kơ Krist mâo knhuah hdĭp bi êdah klei thâo pap leh anăn đru phung ayŏng adei hlăm Phung Sang Aê Diê wăt kơ phung ka thâo kral Khua Yang ôh msĕ si Khua Yang jing Pô bŏ hŏng klei thâo pap. Jih jang phung khua jing phung đăo kơ Krist đăm ngă klei ktư̆ juă leh anăn klih ôh kơ phung mă bruă. Kăn brei sa čô duah klei mdrŏng hŏng klei ƀơ̆ng mnga lu rei, amâodah knŏng khăp kuan mă kơ pô, khăp mă tŭ hĭn kơ brei. Jing anak Pô bŏ hŏng klei thâo pap, brei drei bi uêñ mĭn hdơ̆ng drei, hdĭp bi êdah klei khăp leh anăn klei thâo pap kơ phung ayŏng amai adei tuôm hŏng lu klei dleh dlan. Hŏng klei anăn, amâo djŏ knŏng bi mơak kơ Khua Yang ôh ƀiădah wăt hưn kơ phung riêng gah thâo kơ Aê Diê jing Pô bŏ hŏng klei thâo pap mơh. Hdơr bĕ, Aê Diê brei klei jăk jĭn nanao kơ mnuih thâo pap (Y-Mathiơ 5:7).
Hlei pô Khua Yang čiăng drei đru tơdah leh hriăm klei hriăm hruê anei?
Wah lač: Ơ Aê Diê, jing Pô bŏ hŏng klei thâo pap. Bi mni kơ Ih bi mtlaih leh kâo leh anăn brei kâo jing jơ̆ng kngan hlăm asei mlei Ih jing Phung Sang Aê Diê. Đru kâo thâo uêñ mĭn hdơ̆ng găp, bi êdah klei thâo pap kơ phung ayŏng adei msĕ si Khua Yang pap leh kơ kâo.
Dlăng Klei Aê Diê Blŭ hlăm tlâo thŭn: Rôm 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
