Rôm 15:22-33
Kơkuh kơ đĭ đăng bơngai mă mơ̆ng,
Năr ‘nâu lu bơ̆n gô tơchĕng pơwao ‘bai pơhrăm đei kơ̆l ‘bai: ‘Bok Pôl Dan Hơmet Jơ Năr Tơdrong Jang kiơ̆ kơ Sơ̆p Hla bơar ‘Bok Kei-Dei Rôm 15:22-33.
22 Đĭ lơ ‘măng boih inh wă năm ngôi hơpong păng iĕm, mă ưh kơ yĕng, yua kơ inh oei hăt kơ bơtho lu bơngai mă tam mă kơtơ̆ng tam mă hlôh. 23 Na dang ei inh bơtho jơ̆p-jang boih tơ rim teh đak âu, na inh wă năm tơ iĕm boih. 24 Inh năm tơ iĕm hơdrol, đơ̆ng noh na inh năm tơ dêh Aspanhol. Inh tơchĕng wă ngôi hơpong păng iĕm ‘biơ̆ păng inh wă kơ iĕm tơgŭm inh gơh năm tơ dêh Aspanhol noh. 25 Mă-lei dang ei inh năm tơ Pơlei Jêrusalem hơdrol ‘mơ̆i yua kơ đe ată jên athei ăn kơ lu bơngai lui tơ noh. 26 Jên noh đơ̆ng lu bơngai tơmoi mă ưh kơ khul Juđê tơ dêh Masêđôn păng dêh Grĕk mơnat ăn kơ lu bơngai lui dơnuh hin tơ Pơlei Jêrusalem wă kơ lu sư chă asong băl jên noh. 27 Lu bơngai mă tơgŭm jên noh lu sư lăp đon kơ tơgŭm tơpă, yua kơ lu sư dang hre kơ lu bơngai Juđê, đơ̆ng lu bơngai Juđê bơtho lu sư tơdrong ‘Bok Kei-Dei sơ̆, noh na lu sư tơgŭm lu bơngai Juđê jên. 28 Đang inh pơjao kơ lu bơngai noh jên boih, na inh năm tơ iĕm, đơ̆ng noh na inh năm hloi tơ dêh Aspanhol. 29 Inh băt mơ̆n mưh truh tơ iĕm kơnh, Yêsu Krist gô tơgŭm inh, wă kơ inh tơgŭm iĕm dơ̆ng. 30 Ơ lu ‘nhŏng oh, yua kơ bơ̆n lui kơ Kră Yang bơ̆n Yêsu Krist păng yua kơ Yang Bơhngol ‘Lơ̆ng ăn kơ bơ̆n đei đon ‘mêm mơnat dih băl tơduă bơ̆n bơngai lui, na inh apinh iĕm adrin krao khan kơ ‘Bok Kei-Dei tơgŭm inh hŏ, 31 wă kơ lu bơngai ưh kơ lui tơ dêh Juđê huay kơ pơm kơnê̆ kơ inh. Păng inh wă kơ iĕm krao khan kơ ‘Bok Kei-Dei wă kơ lu bơngai lui tơ Pơlei Jêrusalem gơh iŏk jên noh. 32 Thoi noh dah ‘Bok Kei-Dei ăn kơ inh yĕng năm truh tơ iĕm tơpă lei jơhngơ̆m inh hiôk dêh, inh tơchĕng gơh pơdơh ngôi păng iĕm ‘biơ̆. 33 ‘Bok Kei-Dei đĕch gơh ăn kơ bơ̆n hiôk-hian, na inh apinh Sư oei hơdai đĭ đăng kơ iĕm. A-men.
Trong tơm ‘bai pơhrăm ‘nâu:
“Ơ lu ‘nhŏng oh, yua kơ bơ̆n lui kơ Kră Yang bơ̆n Yêsu Krist păng yua kơ Yang Bơhngol ‘Lơ̆ng ăn kơ bơ̆n đei đon ‘mêm mơnat dih băl tơduă bơ̆n bơngai lui, na inh apinh iĕm adrin krao khan kơ ‘Bok Kei-Dei tơgŭm inh hŏ” (Rôm 15:30)
Nơ̆r jet tơchĕng pơwao:
– ‘Bok Pôl roi ăn kơ lu bơngai lui tơ đe Rôm tơdrong sư dan hơmet jơ năr, tơdong jang thoi yơ?
– Sư kơnhăm wă pơm ‘bơ̆t sư roi ăn kơ lu bơngai lui tơdrong sư dan hơmet jơ năr tơdrong jang sư ‘noh?
– Bơ̆n đei hŏk iŏk tơdrong kiơ đơ̆ng ‘bai pơhrăm năr ‘nâu?
Kơkuh kơ đĭ-đăng,
‘Bok Pôl, hơdrol hloh, sư ‘măn jơ chă bơtho Tơdrong ‘Nao ‘Lơ̆ng tơ lu anih tam mă kơtơ̆ng gah tơdrong Kră Yang Yêsu dŏng pơklaih huai iŏk kon bơngai. ‘Bok Pôl hlôi bơtho bơih kơ lu bơngai lui Tơdrong ’Nao ‘Lơ̆ng păng pơdơ̆ng tơiung lu bơngai pơgơ̆r wei lăng tơdrong arih gah bơhngol tơ anih, pơlei lu sư kơdih wă kơ kơdih lu sư gơh pơdơ̆ng tơiung păng pơih să khul lui tơ char đe Rôm (Rôm 15:14-21). Jơ ‘nâu, sư ră roi tơdrong sư đei dan hơmet kơ bơngai lui tơ pơlei Rôm. Adrol hloh sư gô năm tơ pơlei Jêrusalem wă gơih tơmam ăn kơ bơngai lui đơ̆ng dêh Grĕk păng dêh Masêđôn bơngai tơmoi ưh kơ khul Juđê mơnat ăn kơ bơngai lui dơnuh hin tơ Jêrusalem. Sư pơm kơmĭl ‘lơ̆ng gah tơdrong ‘mêm mơnat băl, sư hơlăng tơpă chă tơgŭm băl tơmam lăm ‘nhŏng oh bơngai lui tơ lăm Juđê. Tơdrong ‘nâu tơ’blŏk kơ bơngai lui Rôm athei asong dih băl tơdrong kiơ bơ̆n đei kơplah ‘nhŏng oh tơ’bơ̆p tơdrong gleh anat, ưh kơ trŏ hiơ̆k kơ bơngai lui bơ̆n đĕch (trong 25-27). Sư kăl kơ bơngai lui krao khan tơgŭm dih băl wă kơ lui kiơ̆ kơ bơngai Juđê ưh kơ lui păng tơdrong tơgŭm băl tơmam gơh tơ proh ‘lơ̆ng. Sư lui ngeh nơ̆r krao khan lu bơngai lui ‘lơ̆ng tơpăt Kră Yang tơl tơwih (Yakơ 5:16). ‘Bok Pôl chu iŏk dôm tơdrong gleh anat kơplah sư mơ̆t tơ pơlei Jêrusalem wă pơkeh tơdrong Kră Yang pơjao kơ sư. Sư chĕp tơmam truh tơ Jêrusalem hăm jơhngơ̆m hiôk, sư hơpơi wă kơ bơngai lui tơ Jêrusalem hiôk sơng iŏk tơmam noh.
Kiơ̆ kơ sư đei dan hơmet, ‘bok Pôl gô năm ngôi tơ bơngai lui Rôm păng pơkă wă tơgŭm lu sư tơdrong lui kơ Yêsu Krist ngôi hơdai lu sư ‘biơ̆ (trong 29, 32). Sư ưh kơ đei pơkă khan sư oei tơ âu dôm năr, yua kơ jơ ‘nâu sư oei tơ lăm pơlei Rôm. Đơ̆ng rŏng, sư wă kơ tơgŭm sư năm tơ Aspanhol wă ră roi tơdrong Kră Yang. ‘Bok Pôl sư bơngai lăng ’bôh tơ anăp păng jơ̆p jang. Sư pơm tơ’bôh gah tơdrong pơjing hơmet lê̆ adrol, kăl kơ hơbĕch hơbal kiơ̆ kơ Yang Bơhngol ‘Lơ̆ng chông anhăk wă chă dan hơmet tơdrong bơ̆n jang. Rim ‘nu kơ lu bơ̆n Kră Yang đei ăn kơ bơ̆n 24 jơ minh năr lei lăi băl, tơdrong jang bơ̆n proh hơmet lê̆ adrol tơgŭm lu bơ̆n băt kơ jang tơdrong kiơ gĭt kăl adrol, đei tơdrong kiơ tih kăl adrol păng huay kơ đei tơdrong ưh kơ gan kăl kiơ pơgăn bơ̆n. ‘Moi kiơ̆ kơmĭl ‘bok Pôl, lu bơ̆n kư̆m kăl kơ ră roi dih băl tơdrong bơ̆n đei tơchĕng proh hơmet lê̆ adrol wă kơ bôl buăl wang krao khan tang păng tơgŭm.
Lu bơ̆n pôm jơhngơ̆m đon lăm tơdrong krao khan,
Ơ Kră Yang, inh bơnê kơ Ih ăn kơ inh ‘bôh kơmĭl ‘bok Pôl bơ̆jang, păng tơdrong ‘lơ̆ng sư đei jơhngơ̆m hơlăng klah asong lu bơngai lui tơ dêh Masêđôn păng dêh Grĕk. Apinh Ih tơgŭm inh lăng ‘bôh tơdrong jang tơ anăp păng jơ̆p jang wă kơ inh đei jơhngơ̆m tơgŭm păng krao khan tang lu ‘nhŏng oh lăm khul bơngai lui oei tơ’bơ̆p tơdrong anat anot, mă loi sư tơ anih ataih. Yua anăn Kră Yang Yêsu Krist, Amen.
Ơ đĭ đăng lu bơngai mơ̆ng mă ‘mêm kơeng,
Lu bơ̆n hăm đei tơmang lăng ataih wă kơ hlôh ‘bôh tơdrong gĭt kăl tơ anih ataih, dơnuh hin păng wang tơgŭm dih băl ưh?
‘Mêm mơnat krao khan kơ lu ‘nhŏng oh
Proh hơmet đon lui kơjăp rim năr
Tơchĕng dan hơmet, krao khan tang
Wang tơgŭm tơiung, tơ’bôh tơdrong ‘mêm Yang ‘Bă
Đŏk Sơ̆p Hla bơar ‘Bok Kei-Dei lăm pêng sơnăm: Êphêsô 5
Kênh Youtube BHKTHN:
