I Samuel 15:13-24
“Chu yom kiơ̆ nơ̆r ‘lơ̆ng hloh kơ tơmam soi, mơ̆ng pơm kiơ̆ ‘lơ̆ng hloh kơ rơmă triu tơno. Hơngah ưh kơ pơm kiơ̆ noh kư̆m yoch thoi bơngai pơjâu hơlĕnh; Pơ-ang kư̆m yoch thoi kơkuh kơ rup yang…” (I Samuel 15:22b-23a)
Nơ̆r jet tơchĕng pơwao:
– Pơtao Sôl pơrơ̆ng pơm glăi kơ nơ̆r Kră Yang thoi yơ?
– Kơplah Samuel jet sư, na sư tơl thoi yơ?
– Lĕch đơ̆ng tơbral ưh kơ tơpă noh kiơ?
– Lu bơ̆n pơhrăm iŏk tơdrong kiơ đơ̆ng tơdrong hơ’mon ‘nâu?
Iŏk đơ̆ng Samuel ‘bok khan lê̆ adrol tuh đak rơmă pơm pơtao Isơrael Pơtao Sôl tơblah hăm đĭ đăng lu bơngai ayăt jum dăr, pơtao năm tơblah tă kơ jei sư ngăl. (I Samuel 14:47-48). Mălei đơ̆ng rŏng kơ noh jơhngơ̆m pơtao Sôl đei tơplih. Lăm minh năr, đơ̆ng Samuel ‘bok khan lê̆ adrol, Kră Yang athei pơtao pơlôch đĭ đăng kon pơlei Amalĕk păng đĭ đăng sem dơrong lu sư, yua kơ lu sư khĕnh kơnê̆ dêh pơgăn păng blah kon pơlei Isơrael kơplah lu sư lĕch đơ̆ng dêh Êyiptơ (LĐ Êyiptơ 17:8-16). Pơtao Sôl blah kon pơlei Amalĕk jei sư, rôp arih pơtao Agak, pơlôch đĭ kon pơlei, mălei ưh kơ pơlôch pơtao Agak păng iŏk lu sem dơrong mă ‘lơ̆ng hloh.
Kơplah Samuel jet, Pơtao Sôl ưh kơ wă chu iŏk sư glăi. ‘Bar wơ̆t sư pơma hăm Samuel khan: “Inh pơm kiơ̆ bơih dôm nơ̆r đơ̆ng Kră Yang tơtă” (trong 13) păng “Sôl tơl nơ̆r Samuel: Mă-lei inh pơm kiơ̆ nơ̆r Kră Yang khan, inh năm pơm keh boih nơ̆r tơtă Kră Yang wơh inh năm pơm; inh chĕp ba Agak, pơtao bơngai Amalek păng pơlôch pơđĭ lu kon pơlei Amalek.” (trong 20). Tơplih kơ chu iŏk sư glăi, mălei sư pơtă ăn kơ kon pơlei khan iŏk lu sem dơrong ‘lơ̆ng hloh wă pơyơ̆r kơ ‘Bok Kei-Dei! Nơ̆r tơdŏng kơdih akâu ‘lơ̆ng dêh! Yua kơ Kră Yang păng kon pơlei đĕch ưh kơ trŏ kơ ih ôh! Samuel ‘bok khan lê̆ adrol pơma chrih khan; chu yom kiơ̆ nơ̆r ‘lơ̆ng hloh kơ tơmam soi, yua kơ pơtao achăng lê̆ nơ̆r Kră Yang, lei na Kră Yang kư̆m achăng tŭk lê̆ pơtao hloi. Kơplah ưh pă đei nơ̆r wă pơjah dơ̆ng, na pơtao chă chu chăi khan kơdih yoch hăm nơ̆r Kră Yang, mălei sư kư̆m oei pơjăng khan sư “hli kơ kon pơlei, na mơ̆ng kiơ̆ nơ̆r lu sư đĕch” (trong 24) ưh kơ đei dơ̆ng ‘bơ̆t noh đĕch na pơtao Sôl oei apinh Samuel, “Sôl apinh lung: Inh đei yoch; mă-lei apinh ih pơyom kơ inh ‘bơ̆t anăp lu đe kră wei-lăng kon pơlei inh păng ‘bơ̆t anăp lu bơngai Isơrael; apinh ih wih jơ̆ inh dơ̆ng na inh gô kơkuh kơ Kră Yang ‘Bok Kei-Dei ih.” (I Samuel 15:30).
Samuel sơ’ngon dêh, pă hơmĕng bơih yua kơ pơtao Sôl tơbral ưh kơ đĭ jơhngơ̆m ưh kơ tơbral tơpă na đơ̆ng jơ noh sư ưh pă ‘maih tơ’bơ̆p pơtao Sôl bơih. Đơ̆ng rŏng kơ noh, bơngai Philitin tơblah hăm bơngai Isơrael, bơngai Isơrael thuơ kơdâu klĕnh ôn lăm năr noh pêng ‘nu kon drŏnglo Sôl đe pơlôch, na pơtao kư̆m pơlôch kơdih akâu. (I Samuel 31:6) Kơplah Sôl tơbral yoch ưh kơ đĭ jơhngơ̆m wă kơ Kră Yang mơnat. Tuch luch lăm tơdrong jang anih pơgơ̆r sư răm đĭ kiơ̆ kơ nơ̆r Samuel pơkă.
Dang ei, Kră Yang yua Yang Bơhngol ‘Lơ̆ng chrih bơtho rim ‘nu lu bơ̆n. Apinh Kră Yang tơgŭm kơ bơ̆n băt kơnăl Yang Bơhngol ‘Lơ̆ng bơtho chrih chu iŏk bơ̆n glăi, tơbral mă tơpă đĭ jơhngơ̆m na Kră Yang mơnat yoch bơ̆n.
Ơ Kră Yang mă ‘mêm, ‘bĕnh tơdrong mơnat, inh bơnê kơ ih mưh inh tơbral tơpă đĭ jơhngơ̆m, achăng tơdrong kơnê̆, na ih gô sŭt rơgoh đĭ yoch inh, ih ưh pă ‘blŏk bơih dôm yoch inh. Apinh Ih tơgŭm ‘nĕ pơma dŏng kơdih akâu, na tơbral ưh kơ tơpă kơplah Yang Bơhngol ‘Lơ̆ng ih chrih bơtho, krao khan yua anăn Kră Yang Yêsu Krist, Amen!
Hăm đei tơdrong yoch kiơ bơ̆n kăl kơ tơbral hăm Kră Yang dang ei ưh?
Đŏk Sơ̆p Hla bơar ‘Bok Kei-Dei lăm pêng sơnăm: III Yôhan
Kênh Youtube BHKTHN:
https://www.youtube.com/c/bhkthn
