Tĭt 3:2-5
“Sơ̆ bơ̆n ưh kơ băt tơpă tơdrong ‘Bok Kei-Dei, na bơ̆n ưh kơ chu Sư. Bơ̆n tơchĕng akâu kơdih khan pơm trŏ, mă bơ̆n pơm ưh kơ trŏ ôh. Bơ̆n hưch-hanh lơ tơdrong kư̆ kă ưh kơ băt pơm tơdrong ‘lơ̆ng thoi yơ. Bơ̆n ‘maih chă tơdrong tơhil păng đe. Bơ̆n ‘nhĕng đe, areh kơ đe păng đe areh kơ bơ̆n mơ̆n.” (Tĭt 3:3)
Nơ̆r jet tơchĕng pơwao:
– Bơngai lui kăl kơ băt ‘bar tơdrong kăl hơyơ wă kơ gơh arih trŏ kơ Nơ̆r Kră Yang bơtho?
– Băt tơdrong noh tơgŭm kơ bơ̆n arih sa thoi yơ hăm rim bơngai?
– Băt kăl kơ arih thoi yơ wă kơ trŏ hăm jơhngơ̆m iơ̆m dim Kră Yang?
Bơngai lui athei arih pơm hơdah Anăn Kră Yang lăm tôm tơdrong jang ‘lơ̆ng, iơ̆m dim hăm rim bơngai mă khan rim bơngai ưh kơ lui yua kơ sơ̆ bơ̆n đêl arih thoi noh. Lăp jing bơngai lui đĕch, bơ̆n băt tơdrong mă ưh kơ băt ‘noh tơdrong bơ̆n ưh kơ băt gah bơhngol. Yua kơ đơ̆ng ưh kơ băt ‘noh pơm kơ bơ̆n oei hơnơ̆ng druh kiơ̆ lăm chăl ‘nâu, chă trong kư̆ kă pơm dôm tơdrong ưh kơ ‘lơ̆ng, pơm đĭch kơ tơdrong yoch. Arih thoi noh trŏ kơ đe areh, păng bơ̆n kơdih kư̆m arih lăm tơdrong areh dih băl. Thoi noh jing bơngai lui kơ Kră Yang bơih, đei bơih tơdrong hlôh băt gah bơhngol, kơplah bơ̆n lăng lơ tơdrong arih lu bơngai tam mă lui kơ Kră Yang, bơ̆n ‘nĕ kơ areh păng sek tơlang. Noh bơih tơdrong blŭng a bơ̆n kăl kơ băt wă kơ arih kiơ̆ trŏ thoi Nơ̆r Kră Yang bơtho lăm arih sa dih băl.
Tơdrong mă ‘bar kăl kơ băt noh mă khan bơ̆n ưh kơ băt, pơm yoch thoi noh mă-lei ‘Bok Kei-Dei đei tơ’bôh jơhngơ̆m iơ̆m dim Sư hăm kon bơngai đơ̆ng tơdrong wơh Kon Pôm Sư noh bơih Kră Yang Yêsu Krist jur tơ teh wă dŏng bơ̆n klaih đơ̆ng tơdrong ‘maih wă păng tơdrong pơgơ̆r, “Mă-lei ‘Bok Kei-Dei khan tơbăt ăn kơ bơ̆n Sư ‘mêm mơnat tơpă kơ bơ̆n na Sư pơklaih bơ̆n đơ̆ng tơdrong yoch…” (trong 4). Kră Yang dŏng bơ̆n “ Na dang ei Sư pơklaih bơ̆n đơ̆ng tơdrong yoch tơpă. Sư pơklaih bơ̆n, ưh kơ sĭ bơ̆n pơm tơdrong ‘lơ̆ng ‘mơ̆i na sư pơklaih. Sư pơklaih bơ̆n bơngai yoch yua kơ Sư ‘mêm mơnat kơ bơ̆n tơpă…” (trong 5). Thoi noh jơhngơ̆m iơ̆m dim Kră Yang đei tơ’bôh kiơ̆ kơ tơdrong Sư ‘mêm mơnat wă dŏng lu bơngai arih ưh kơ trŏ păng tơplih jing bơngai arih trŏ thoi Kră Yang. ‘Nĕ kơ pơ ang yua kơ bơ̆n gơh klaih bơih yua kơ jơhngơ̆m iơ̆m dim păng tơdrong ‘mêm mơnat Kră Yang hăm lu bơngai mă kơ hlôh ưh kơ băt thoi bơ̆n.
Kơplah bơ̆n jing bơngai lui, bơ̆n băt tơdrong yoch bơ̆n lăm tơdrong arih adrol sơ̆, păng băt ‘mêm mơnat Kră Yang ‘Bok Kei-Dei tih dêh, lei na athei arih mă trŏ thoi tơdrong dŏng pơklaih Sư. Jơ̆ kon Kră Yang ‘Bok Kei-Dei, bơ̆n ling lang đei jơhngơ̆m dim, arih sa dih băl mă ‘lơ̆ng păng weh đơ̆ng tơdrong arih “ kơ hlôh ưh kơ băt” adrol sơ̆. ‘Nĕ kơ pơm plơ̆, ‘nĕ kơ mơ̆ng đe hơlĕnh, na đơ̆ng noh pơm dôm tơdrong yoch rai jrŭ, hăm tơdrong kơnê̆, hưch ham.
Kơkuh kơ Kră Yang ‘Bok Kei-Dei iơ̆m dim, ‘mêm mơnat. Bơnê kơ Ih đei dŏng inh klaih đơ̆ng pŭng tơdrong yoch, apinh tơgŭm kơ inh băt hiơ̆k tơgŭm ‘mêm mơnat păng ba lơ lu bơngai oei hiong răm năm tơ Kră Yang. yua Anăn Kră Yang Yêsu Krist. Amen!
Bơ̆n hăm tam arih trŏ hăm tơdrong băt kơdih păng tơdrong Kră Yang mơnat ăn đĕch ưh?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Pơđơ̆k 23
Kênh Youtube BHKTHN:
