Philêmôn câu 8-12
“Inh apinh ih gah Ônêsim. Sư pơm kon inh boih kơlih kơ sư lui kơ Kră Yang Yêsu Krist đơ̆ng inh bơtho oei lăm hnam phak.” (Philêmôn trong 10).
Nơ̆r jet tơchĕng pơwao:
– Yua kơ kiơ ‘bok Pôl jơ̆ bơngai pơgơ̆r bơih ră mă lei sư oei apinh ‘bơbel ‘bok Philêmôn?
– Sư apinh yua kơ tơdrong kiơ?
– Lu bơ̆n kăl kơ pơm tơdrong kiơ wă kơ ba ăn tơdrong hiôk hơiă dih băl?
‘Bok Pôl sư jơ̆ bơngai ‘lŏ lui adrol, sư jơ̆ jơ̆ng ‘bang Kră Yang kŭm dai bơngai buŏl juăt hăm ‘bok Philêmôn, bok Pôl sư gơh mơ̆n mă sư gơh khan athei ‘bok Philêmôn pơm tơdrong mă thoi nơ̆r ‘Bok Kei-Dei đei bơtho noh jơ̆ mơnat ăn kơ bơngai mă đich đam sư đei klĕnh anăn sư Ônêsim: “Na dang ei inh đei tơdrong wă apinh ih. Inh gơh athei ih năm hloi tơ tơdrong ‘noh dah inh wă yua kơ inh jơ̆ng ‘bang Yêsu Krist. Mă-lei inh ưh kơ wă athei ih ôh”. (trong 8). Mă trŏ kơ sư pơm thoi noh ră, mă lei sư đei apinh ‘bok Philêmôn pơm tơdrong trŏ yua kơ tơdrong ‘mêm, na sư đei pơma thim: “Kơlih inh băt kơ ih đei đon ‘mêm mơnat kơ bôl buăl boih na inh roi kơ ih thoi noh đĕch. Mă-lei ih băt kơ inh kră boih păng inh oei lăm hnam phak yua kơ inh lui kơ Kră Yang Yêsu” (trong 9). “Apinh” lăm nơ̆r Grĕk noh jơ̆ krao apinh, bơbel, maih wă. Noh jơ̆ minh jơhngơ̆m đon gĭt kăl dêh kơ minh ‘nu bơngai pơgơ̆r. ‘Bok Pôl ưh kơ athei iŏk tơdrong mă sư pơgơ̆r wă pơgŏ kơ Philêmôn pơm kiơ̆ thoi sư wă mă lei sư iŏk đon hơla, tơjruh akâu jăn sư wă ba ăn tơdrong hiôk hơiă lăm ‘nhŏng oh bơngai lui kơ Kră Yang.
‘Bok Pôl đei apinh ‘bok Philêmôn yua kơ tơdrong thoi âu: Mă mônh, ‘bok Philêmôn đei tơdrong mă đe ư-ang noh jơ̆ bơngai “đei tơdrong ‘mêm mơnat” thoi noh na yua kơ tơdrong ‘mêm na sư apinh wă mơnat kơ minh ‘nu bơngai đĭch sư noh Ônêsim. Mă ‘Bar, ‘Bok Pôl tơbăt sư jơ̆ kră bơih păng oei lăm hnam phak yua kơ anăn Kră Yang, yua kơ sư kră bơih na sư apinh Philêmôn hơnat kơ wă sơngah. Mă Pêng, ‘bok Ônêsim “Inh apinh ih gah Ônêsim. Sư pơm kon inh boih kơlih kơ sư lui kơ Kră Yang Yêsu Krist đơ̆ng inh bơtho oei lăm hnam phak” (trong 10), Mă Puăn, yua kơ đei tơdrong tơplih mă tih dêh đơ̆ng Ônêsim, “Sơ̆ sư đĭch ih tơpă mơ̆n, na đơ̆ng noh sư kơdâu jăk đơ̆ng ih jing ưh pă yua kơ ih. Na dang ei sư yua kơ inh păng wă yua kơ ih dơ̆ng.” (trong 11). Mă pơđăm, tơdrong Ônêsim đei kơdâu klĕnh đơ̆ng ‘bok Philêmôn noh jơ̆ kŭm lăm tơdrong mă ‘Bok Kei-Dei đei pơgơ̆r, wă kơ sư đei tơ’bơ̆p ‘bok Pôl, na lui kơ Kră Yang păng wă wih brŏk tơ yŏng tơ’ngla sư. Đơ̆ng noh, ‘bok Philêmôn gô sơng iŏk Ônêsim nhen thoi minh ‘nu bơngai lăm nhŏng oh bơngai lui.
‘Bok Pôl jơ̆ bơngai mă Kră Yang yua lăm tơdrong ba ăn tơdrong hiôk hơđơ̆ng kơ minh ‘nu bơngai đĭch Ônêsim hăm Kră Yang ‘Bok Kei-Dei. Đơ̆ng noh sư kŭm dai apinh tơdrong hiôk hơđơ̆ng kơ bre Philêmôn hăm Ônêsim. Na chăl dang ei, Kră Yang kŭm yua bơ̆n thoi noh mơ̆n. Mă lăm tơdrong jang kiơ, yua kơ jơhngơ̆m ‘mêm kơ Kră Yang, athei tơjur akâu jăn bơ̆n iŏk đon hơla na athei ‘nhŏng oh bơ̆n hiôk hơiă dih băl păng hơmet dôm tơdrong ưh kơ ‘lơ̆ng lăm ‘nhŏng oh. Yua kơ tơdrong ‘mêm mơnat, ‘nĕ kơ pơm ăn kơ minh ‘nu bơngai ‘nao lui kơ Kră Yang na achăng lê̆ khŭl bơngai lui yua kơ tơdrong ưh kơ hiôk kiơ, kŭm ‘nĕ kơ ăn bơngai lui weh ataih đơ̆ng tơpôl bơngai lui yua kơ đơ̆ng tơdrong ưh kơ hiôk dih băl. Apinh Kră Yang ‘Bok Kei-Dei ăn kơ bơ̆n đei jơhngơ̆m iŏk đon ala pơm bơngai ‘long sơlam kơ Kră Yang.
Kơkuh kơ Kră Yang mă ‘mêm kơ eng, Inh bơnê kơ Ih yua kơ ih đei lôch tang yua kơ tơdrong yoch inh wă kơ inh hơmet tơdrong ưh kơ tơproh inh hăm Ih. Apinh Ih tơgŭm inh đĭ jơhngơ̆m, tơgŭm ‘nhŏng oh mơnat băl lăm tơdrong yoch glăi, wă kơ minh jơhngơ̆m đon lăm khŭl bơngai lui wă kơ rai đunh rai wơ̆ tŏk. Yua anăn Kră Yang Yêsu Krist, Amen.
Lu bơ̆n hăm đei iŏk đon ala wă tơgŭm kơ nhŏng oh bơ̆n mơnat băl lăm tơdrong yoch glăi ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Êsai 60
Kênh Youtube BHKTHN:
