Klei Aê Diê Blŭ: Hêbrơ 10:19-25
Êlan kliăng: “Brei drei nao giăm Aê Diê hŏng ai tiê sĭt suôr, hŏng klei thâo sĭt mơ̆ng klei đăo, ai tiê drei bi doh leh mơ̆ng ai tiê kpă jing jhat leh, leh anăn asei mlei drei rao leh hŏng êa doh. Brei drei djă pioh kjăp klei hưn kơ klei drei čang hmăng, amâo đing ôh, kyuadah Pô ƀuăn leh jing sĭt suôr. Brei drei bi mĭn si drei dưi mtrŭt hdơ̆ng drei pô kơ klei khăp leh anăn kơ klei ngă bruă jăk” (Hêbrơ 10:22-24)
Klei êmuh ksiêm mĭn: Ya klei Aê Diê brei kơ phung đăo mâo? Ya klei pô čih hră mơĭt kơ phung Hêbrơ mtrŭt brei drei ngă? Si ih dôk ngă jih jang klei anei hlăm klei hdĭp ih?
Wăt tơdah mblang klă leh dưn kơ klei bi mguôp hđăp leh anăn klei bi mguôp mrâo, kơ klei Khua Yang Yêsu Krist ngă yang leh anăn boh yuôm kơ klei bi mguôp mrâo, ƀiădah čiăng kơ phung dlăng hră ñu mơĭt mâo klei jhŏng mă yua sĭt Klei Aê Diê Blŭ, pô čih hră mơĭt kơ phung Hêbrơ lŏ mñă sa blư̆ kơ klei brei phung đăo kơ Krist tuôm mă tŭ leh. Rup čhiăm păng bi kgăn Adŭ Doh Jăk Hĭn hŏng Adŭ Doh Jăk kơhiêk mdua mơ̆ng dlông truh ti gŭ čiăng kñăm kơ klei brei drei mâo klei êngiê dưi mŭt hlăm anôk Aê Diê dôk amâo lŏ mâo klei kăm ghă mơ̆ng klei bhiăn amâodah bruă ngă tui si klei bhiăn ôh (êlan 19-20). Kyuadah mâo Khua Yang Yêsu Krist jing Khua Ngă Yang Prŏng, jing Pô Ti Krah, snăn drei mâo klei bi mguôp leh anăn dưi nao giăm kơ Aê Diê (êlan 21-22). Hŏng jih jang klei brei anăn, pô čih hră mơĭt kơ phung Hêbrơ mâo tlâo klei iêô jak phung anak čô Aê Diê hdĭp năng hŏng klei jing sa čô mnuih mơ̆ng klei bi mguôp mrâo. Klei iêô jak tal êlâo hĭn djŏ kơ ai tiê. Brei drei nao giăm Aê Diê hŏng ai tiê sĭt suôr leh anăn doh. Ai tiê anăn bi êdah kơ klei đăo drei jing klei đăo hdĭp, klei đăo mâo sĭt, mâo klei bi mlih mơ̆ng lam truh ti tač, mơ̆ng ai tiê kpă hlŏng kơ asei mlei (êlan 22). Grăp hruê brei drei dlăng, hriăm, ksiêm mĭn leh anăn ngă tui si Klei Aê Diê Blŭ leh anăn knang kơ Yang Mngăt Jăk mă bruă čiăng kơ ai tiê drei kpă nanao ti anăp Aê Diê.
Klei iêô jak tal dua djŏ kơ klei hưn. Brei drei djă pioh kjăp, bi klă leh anăn bi êdah klei čang hmăng amâo đing ôh mơ̆ng sa čô mnuih mâo leh klei hdĭp hlŏng lar (êlan 23). Bi hrô kơ klei mđing mĭn kơ klei dleh dlan, knap mñai amâodah klei rŭng răng ti lăn ala anei, brei drei dlăng kơ klei sĭt suôr Aê Diê čiăng kơ klei drei hưn jing kjăp sĭt.
Klei iêô jak tal tlâo djŏ kơ knhuah hdĭp, brei phung anak čô Aê Diê hlăm Phung Sang Aê Diê thâo uêñ mĭn bi mtrŭt hdơ̆ng găp hlăm klei bi êdah klei khăp leh anăn kơ klei ngă bruă jăk, sĭt suôr hlăm klei bi kƀĭn kkuh mpŭ kơ Aê Diê leh anăn bi mđĭ ai hdơ̆ng găp hlăm klei đăo (êlan 24-25). Jing jơ̆ng kngan hlăm asei mlei Yang Krist, brei grăp čô drei bi đuôm drei pô mbĭt hŏng phung đăo, knang kơ klei myang Aê Diê čiăng kơ klei hdĭp drei mâo boh sĭt kơ Ñu.
Hruê anei, ya drei srăng ngă čiăng kơ ai tiê drei mâo klei bi doh, čiăng kơ klei drei hưn klei drei đăo mâo klei sĭt, čiăng kơ klei hdĭp drei ba klei bi mđĭ ai kơ lu mnuih?
Wah lač: Ơ Khua Yang, kâo bi mni kơ Ih kyua kâo mâo klei bi knal kơ jih jang klei jăk jĭn hlăm klei bi mguôp hlăm Ih. Akâo kơ Yang Mngăt Jăk mă bruă hlăm kâo, đru kâo thâo ksiêm dlăng kơ ai tiê kâo, leh anăn đru klei hdĭp kâo ba klei bi mđĭ ai kơ lu mnuih. Kâo wah lač hlăm anăn Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 15:35-58
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
