Klei Aê Diê Blŭ: II Klei Yăl Dliê 21:6-7
Êlan kliăng: “Klei anei jing klei bi juh kâo hlăm klei knap mñai: klei Ih ƀuăn brei klei hdĭp kâo” (Klei Mmuñ Hđăp 119:50).
Klei êmuh ksiêm mĭn: Ya ngă Mtao Y‑Jôram ngă klei jhat ƀiădah Aê Diê amâo čiăng bi rai jih ôh sang Mtao Y‑Đawit? Klei anei brei ƀuh ya klei kơ klei sĭt suôr Aê Diê? Si ngă ih srăng hdĭp tơdah hriăm thâo leh kơ Aê Diê sĭt suôr hlŏng lar?
Wăt tơdah Mtao Y‑Jôram ngă leh lu klei jhat ƀai, ƀiădah Aê Diê sĭt suôr leh anăn bŏ hŏng klei pap amâo čiăng bi rai jih ôh sang Y‑Đawit. “Kyua klei bi mguôp Ñu ngă leh hŏng Y‑Đawit…ƀuăn leh čiăng brei sa boh pui kđen kơ Y‑Đawit leh anăn kơ phung anak êkei gơ̆ hlŏng lar” (êlan 7). Phŭn dô dih, Aê Diê ƀuăn leh srăng lui pioh brei sa găp djuê kơ anak êkei Mtao Y‑Đawit čiăng kơ “dĭng buăl Kâo dưi mâo nanao pui kđen ti anăp Kâo” (I Bruă Mtao 11:36). Sa boh pui kđen mtrang mngač hlăm sang brei thâo mâo mnuih dôk hlăm sang anăn, ăt mâo klei hdĭp, msĕ snăn mơh, phung anak čô Mtao Y‑Đawit ăt srăng čuê tơl truh hruê Yang Mêsi jing anak čô Mtao Y‑Đawit hriê leh anăn srăng dôk ti jhưng mtao Ñu nanao hlŏng lar. Aê Diê ƀuăn leh kơ Mtao Y‑Đawit: “Tơdah phung anak ñu lui klei bhiăn Kâo, leh anăn amâo êbat ôh tui si klei Kâo mtă…snăn Kâo srăng bi kmhal hŏng giê klei diñu gao klei bhiăn… Ƀiădah Kâo amâo srăng sua mă klei khăp Kâo…Kăn Kâo srăng lui rei klei Kâo sĭt suôr hŏng ñu…phung anak čô ñu srăng jing mtao hlŏng lar” (Klei Mmuñ Hđăp 89:30-36).
Mơ̆ng hruê ƀuôn ala mtao Israel mâo klei bi mbha, anei jing tal êlâo sang Y‑Đawit anăp kơ klei rai tuč. Yang jhat čiăng bi rai hdră Aê Diê kơ sang Y‑Đawit leh anăn kơ jih jang mnuih hŏng klei ñu yua kngan sang Y‑Ahap jhat ƀai, mčhur mô̆ Mtao Y‑Jôram jing anak mniê Mtao Y‑Ahap ngă klei bi hmăi jhat kơ ung ñu. Mtao Y‑Jôram tui hlue leh mnêč yang jhat bi mdjiê hĕ phung ayŏng adei ñu ngă kơ sang ama ñu păt čiăng rai tuč jih, adôk mă knŏng phung anak čô ñu. Wăt snăn dưn mơh, tui si hdră Aê Diê, sa hruê hlăm ênuk êdei anăp Pô Bi Mtlaih mơ̆ng phung anak čô Mtao Y‑Đawit srăng hriê bi mtlaih lăn ala. Wăt tơdah yang jhat bŏ hŏng klei mnêč, wăt tơdah anak mnuih jhat ƀai snăk sơưn dưn mơh, wăt tơdah Mtao Y‑Jôram amâo gưt ôh kơ klei Aê Diê mtă ƀiădah amâo mâo sa mta mnơ̆ng dưi gang ôh Aê Diê sĭt suôr ngă hdră leh anăn klei Ñu ƀuăn leh. Hŏng klei sĭt suôr leh anăn klei khăp Aê Diê amâo bi rai ôh phung anak čô Mtao Y‑Jôram. Măng ai klei truh mmăt tĭt dưn mơh ƀiădah Aê Diê Pô sĭt suôr ăt răng kriê pui kđen sang Mtao Y‑Đawit trơ̆ng nanao.
Hdĭp ti lăn ala anei, grăp čô drei tuôm găn sơăi klei knap, klei lông dlăng leh anăn tăp năng tuôm hŏng klei dleh dlan knap mñai êdimima. Dôk hlăm klei knap mñai, luč klei čang hmăng ênưih snăk drei êdu ai leh anăn lui jih klei čang hmăng. Akâo kơ Khua Yang đru drei amâo dlăng kơ klei truh ôh ƀiădah hdơr bĕ kơ klei Khua Yang ƀuăn leh anăn čang hmăng kơ Pô sĭt suôr leh anăn hdĭp mơak hlăm klei knap mñai.
Drei đăo mơ̆ kơ Aê Diê srăng bi sĭt klei Ñu ƀuăn leh?
Wah lač: Ơ Khua Yang, đru kâo ăt knang kơ klei Ih ƀuăn hlăm djăp mta klei truh, wăt tơdah klei truh anăn mmăt tĭt dưn mơh. Đru kâo djă pioh kjăp klei čang hmăng hlăm ai tiê kyuadah đăo kơ klei Ih sĭt suôr.
Dlăng Klei Aê Diê Blŭ hlăm tlâo thŭn: Y‑Yôhan 19:1-27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
