Loos 2:25-29; Chivkeeb 17:9-14
Nqe cim
“Tus uas yog neeg Yudais tiag yog tus uas muaj lub siab tshiab, thiab tus uas ua kevcai txiav tiag, yog tus uas ua raws li Vajtswv tus Ntsujplig qhia. Txawm yog neeg tsis qhuas tus uas muaj lub siab tshiab los Vajtswv qhuas tus ntawd.” (Loos 2:29).
Lus nug rau sawvdaws xav:
– Keebkwm thiab lub ntsiab tseeb ntawm kevcai txiav tawv yog dabtsi?
– Yam dabtsi ua tau ib tug neeg Yudais tseeb?
– Yuav ua li cas thiaj ua tau ib tug ntseeg Tswv Yexus tseeb?
– Zaj kawm no ntsig txog dabtsi hauv peb lub neej?
Raws li Chivkeeb 17:9-14, ua kevcai txiav tawv yog lub cim Vajtswv coglus tseg rau Anplahas. Coj ib tiam dhau rau ib tiam, tagnrho txhua tus txivneej uas yog Anplahas xeebntxwv thiab cov tubqhe uas yug hauv lawv lub tsev los puavleej yuav tsum ua kevcai txiav tawv thaum muaj yim hnub. Leejtwg tsis ua kevcai txiav tawv yuav raug rho tawm hauv tus Tswv haivneeg mus vim tsis coj raws li Vajtswv qhia tseg. Khiavdim 4:24-26 hais txog zaj uas tus Tswv xav muab Mauxes tua povtseg vim nws tsis ua kevcai txiav tawv rau nws cov menyuam tub. Tamsim ntawd Mauxes pojniam txawm muab kiag ib lub pobzeb ntse ntse los hlais kiag nws tus tub daim tawv noov mus so zog Mauxes kotaw. Twb yog vim ua li no tus Tswv thiaj tseg Mauxes txojsia nyob. Yog li ntawd, dhau ntau tiam los, cov neeg Yudais saib qhov txoj kevcai txiav tawv no tseemceeb thiab ua raws.
Tiamsis zaj kawm hnub no qhia paub lub ntsiab tseeb ntawm qhov ua kevcai txiav tawv yog thaum ntsia pom lub cim txiav tawv, tus Tswv haivneeg yuav tsum nco ntsoov txog lawv txojkev sib raug zoo nrog tus Tswv thiab Nws xav kom lawv mloog Nws lus, tsis yog lam ua zoo li ib lub kevcai. Timthawj Paulus hais tias: Yog ua ib tug neeg Yudais coj kevcai txiav tawv sab nraud xwb ces tsis muaj nqis dabtsi ntawm tus Tswv xubntiag. Tus neeg Yudais tseeb yog tus uas ua rau tus Tswv zoo siab los ntawm qhov uas nws ua kevcai txiav thiab coj txhua yam kevcai uas tus Tswv tau hais tseg. Tus neeg Yudais tseeb tiag tiag yog muaj lub cim ua kevcai txiav sab hauv lub siab tsis yog sab nraud. Lub cim txiav sab hauv yog muaj Vaj Ntsujplig nyob hauv lub siab thiab qhia tawm kev ua neej. Cov neeg uas yog lwm haivneeg tsis ua kevcai txiav tawv yuav tau txais koob hmoov thiab kev qhuas tus Tswv zoo ib yam li cov neeg Yudais tseeb, yog hais tias lawv txais yuav tus Tswv thiab coj raws li Nws tej kevcai. Ua lwm seem lus hais, tagnrho txhua tus uas muaj kev sib raug zoo nrog Vajtswv puavleej yog neeg Yudais.
Ib yam nkaus li ntawd, tus uas ntseeg Tswv Yexus sab nraud xwb tsis tau yog tus ntseeg tseeb. Ib tug ntseeg Tswv Yexus tseeb tsis yog pom qhov uas tus neeg ntawd txhos caug lees yuav Tswv Yexus, ua kevcai raus dej, tau los ua tswvcuab rau Pawg Ntseeg, tuaj koom kev pehawm txhua thiv, ua ib tes haujlwm hauv Pawg Ntseeg… tiamsis yog saib tus neeg ntawd puas muaj txojkev sib raug zoo nrog tus Tswv, puas ua lub neej hwm tus Tswv thiab puas muaj Vaj Ntsujplig cov cim. Tus Tswv xav kom peb txhua tus cim civ tshuaj saib yus lub neej, yog tsuas muaj tej kevcai ntseeg xwb ces tsis muaj nqis dabtsi rau peb lub neej no thiab yav tom ntej li.
Thov Vajtswv,
Tus Tswv uas yog nyuam yaus Leej Txiv! Thov Koj pab kom nyuam yaus paub tshuaj saib nyuam yaus lub neej ntseeg, txhim kho txojkev sib raug zoo nrog tus Tswv txhua hnub, ua lub neej ncaj ncees tabmeeg Koj los ntawm txojkev ntseeg thiab mloog lus. Nyuam yaus tuav Tswv Yexus lub npe thov. Amees.
Ib tsoom cov mloog uas hmov thiab tshua,
Peb txojkev sib raug zoo nrog tus Tswv tabtom zoo li cas?
Nyeem Vajluskub hauv peb lub xyoo: Tshwmsim 3:7-4:11
Kênh Youtube BHKTHN:
https://www.youtube.com/c/bhkthn
