Klei Aê Diê Blŭ: Rôm 2:25-29; Klei Mphŭn Dơ̆ng 17:9-14
Êlan kliăng: “Ƀiădah arăng jing sa čô Yuđa sĭt tui si jing hlăm lam, leh anăn klei khăt klĭt sĭt arăng ngă hlăm ai tiê, hlăm mngăt, amâo djŏ ti asei mlei ôh. Sa čô Yuđa msĕ snăn mâo klei bi mni mơ̆ng Aê Diê, amâo djŏ mơ̆ng mnuih ôh” (Rôm 2:29)
Klei êmuh ksiêm mĭn: Ya jing klei hƀuê ênuk leh anăn boh yuôm sĭt kơ klei khăt klĭt? Ya klei dưi mjing sa čô mnuih jing sa čô Yuđa sĭt? Si sa čô mnuih đăo kơ Krist sĭt jing? Ya klei hriăm anei djŏ kơ ih pô?
Tui si Klei Mphŭn Dơ̆ng 17:9-14, klei khăt klĭt jing klei bi knăl kơ klei bi mguôp Aê Diê ngă leh hŏng Y‑Abraham. Hlăm jih jang ênuk, jih jang phung êkei jing anak čô Y‑Abraham leh anăn phung dĭng buăl arăng kkiêng hlăm sang srăng tŭ klei khăt klĭt ti hruê tal sapăn sơăi. Hlei pô amâo tŭ klei khăt klĭt ôh arăng srăng suôt diñu mơ̆ng phung ƀuôn sang Aê Diê kyuadah diñu gao leh klei Aê Diê bi mguôp. Klei Kbiă 4:24-26 čih yăl dliê kơ klei Aê Diê păt čiăng bi mdjiê Y‑Môis kyua klei ñu amâo khăt klĭt kơ anak êkei ñu. Snăn mô̆ ñu khăt mtam klĭt êdŭk dŏ mơiêk anak êkei ñu leh anăn hwiê gơ̆ ti jơ̆ng Y‑Môis. Hŏng klei ngă anăn Aê Diê amâo bi mdjiê ñu ôh. Kyua klei anăn yơh hlăm jih jang ênuk, phung Yuđa dlăng yuôm snăk kơ klei khăt klĭt.
Ƀiădah lĕ, klei hriăm hruê anei brei drei ƀuh boh yuôm sĭt kơ klei khăt klĭt jing tơdah dlăng kơ gru khăt klĭt, brei phung ƀuôn sang Aê Diê hdơr kơ klei bi mguôp diñu hŏng Aê Diê leh anăn Aê Diê čiăng kơ diñu gưt asăp amâo djŏ ngă knŏng rup klei bhiăn ti êngao ôh. Khua ƀĭng kna Y‑Pôl mñă snei: Tơdah sa čô Yuđa knŏng ngă klei khăt klĭt ti êngao snăn klei anăn amâo yuôm ôh ti anăp Aê Diê. Sa čô Yuđa sĭt srăng bi mơak kơ Aê Diê hŏng klei khăt klĭt leh anăn gưt jih kơ klei bhiăn Aê Diê mtă leh. Klei bi knăl kơ sa čô Yuđa sĭt jing klei khăt klĭt hlăm lam ai tiê amâo djŏ klei ngă ti êngao asei mlei ôh. Klei khăt klĭt hlăm lam jing klei mâo Yang Mngăt Jăk dôk hlăm ai tiê leh anăn klei myang Ñu bi êdah hlăm klei hdĭp pô anăn. Phung tue amâo khăt klĭt ôh srăng mă tŭ klei pap leh anăn klei Aê Diê bi mni msĕ si phung Yuđa mơh tơdah digơ̆ mpŭ sĭt kơ Aê Diê leh anăn gưt kơ klei bhiăn Ñu. Amâodah lač snei, jih jang hlei pô mâo klei bi mguôp djŏ hŏng Aê Diê jing sa čô Yuđa sĭt sơăi.
Msĕ snăn mơh, sa čô mnuih ti êngao jing sa čô đăo kơ Krist ƀiădah sĭt nik drei amâo thâo ôh kơ pô anăn jing sa čô đăo kơ Krist sĭt hĕ amâodah hơăi. Sa čô đăo kơ Krist sĭt amâo djŏ knŏng jưh ti klei pô anăn čuôn kơŭt mă tŭ Khua Yang Yêsu, tŭ klei ƀaptem, jing sa čô hlăm Phung Sang Aê Diê, nao bi kƀĭn kkuh mpŭ grăp hruê kăm, djă bruă hlăm Sang Aê Diê ôh…ƀiădah jưh ti klei pô anăn mâo klei bi mguôp sĭt suôr hŏng Aê Diê, dôk dơ̆ng ƀơ̆ng huă huĭ mpŭ kơ Aê Diê khăp kơ mnuih, leh anăn bi êdah boh mơ̆ng Yang Mngăt Jăk. Khua Yang čiăng drei ksiêm mă kơ klei hdĭp drei pô, tơdah mâo mă knŏng bruă ngă tui si klei đăo đuč snăn amâo mâo klei tŭ dưn ôh kơ drei hlăm klei hdĭp anei wăt kơ klei hdĭp hlăm ênuk hlŏng lar.
Klei bi mguôp drei hŏng Aê Diê dôk hlăm si klei jing?
Wah lač: Ơ Khua Yang Pô kâo khăp, đru kâo ksiêm nanao kơ klei hdĭp kâo hŏng klei đăo mâo bruă bi êdah sĭt, mkŏ mjing klei bi mguôp sĭt suôr hŏng Ih grăp hruê, êbat hŏng klei kpă ênô ti anăp Ih hŏng klei đăo leh anăn gưt asăp. Kâo wah lač hlăm anăn Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Êdah 3:7-4:11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
