Loos 1:18-23
Nqe cim zaj kawm:
“Vajtswv tus uas nyob saum ntuj ceebtsheej chim rau tej kev txhaum thiab kev phem uas neeg ua, rau qhov lawv tej kev phem ntawd ua rau neeg tsis paub qhov tseeb lawm” (Loos 1:18).
Lus nug rau sawvdaws xav:
– Vajtswv Txojlus qhia paub dabtsi txog Nws kev chim?
– Lub vimchiv twg ua rau tibneeg dhau mus tawmtsam Vajtswv?
– Koj thov Vajtswv yam dab tsi dhau zaj kawm hnub no?
Vajtswv tus uas nyob saum ntuj ceebtsheej chim rau tej kev txhaum thiab kev phem uas tibneeg ua, rau qhov lawv tej kev phem ntawd ua rau neeg tsis paub qhov tseeb lawm (nqe 18). Ua Vajtswv tsaug vim Nws ntxub txoj kev txhaum uas tibneeg ua tiamsis Nws hlub tibneeg kawg nkaus rau qhov Nws yog tus tsim neeg los. Vajtswv yog tus uas ncaj ncees yog li ntawd Vajtswv yeej tsis chim li tibneeg chim, tiamsis nws chim los ntawm txoj kev ncaj ncees, Vajtswv npautaws rau txhua yam uas tibneeg ua tsis ncaj ncees los tawmtsam Vajtswv tus yam ntxwv ncaj ncees. Vajtswv twb qhia tibneeg paub Nws dhau los ntawm Nws tsim ib puas tsav yam thaum chivkeeb los, dhau los ntawm yus lub siab qhia, los ntawm txhua tiam tibneeg ua peb ntej qhia, tshwj xeeb yog los ntawm Tswv Yexus yug kiag ua tibneeg qhia thiab dhau los ntawm phau Vajluskub qhia. Los ntawm txhua yam qhia no Vajtswv hais tias txhua tus tibneeg yuavtsum tau zeem paub muaj Vajtswv tus tsim ib puas tsav yam. Nws yog tus uas tsim thiab tswj rawv txhua yam kom ciaj sia nyob. Txawm yog li ntawd los, tibneeg tseem tsis hwm Vajtswv thiab tsis ua Nws tsaug (nqe 19-21). Lawv tsis pehawm Vajtswv tus uas muaj sia nyob mus ibtxhis, tiamsis lawv ho mus pe tej mlom uas zoo li neeg, zoo li noog, zoo li tsiaj lossis zoo li nab (nqe 22-23). Tibneeg cim civ rov ua rau tibneeg tso Vajtswv tseg thiab ua rau Vajtswv chim rau lawv.
Lub vimchiv ua rau Vajtswv chim yog qhov uas tibneeg khav theeb thiab tsis paub ua Vajtswv tsaug. Tim ib, tibneeg xav hais tias tibneeg yog neeg ntse, tiamsis tseeb tiag lawv yog neeg vwm thiab ruam kawg li, lawv feeb tsis tau qhov yog thiab qhov txhaum, lawv poob Vajtswv lub tshwjchim uas Vajtswv pub rau lawv lawm. Hnub thaud, Vajtswv tus thawj timtswv uas yog lub hnub qub ci kawg nkaus, nws kuj ua poob lub tshwjchim uas Vajtswv pub rau nws ib yam nkaus. Vim tus thawj timtswv ntawd khav theeb thiab xav ua tus uas loj ib yam li Vajtswv, nws thiaj dhau los ua tus tawmtsam Vajtswv. Peb poj koob yawm txwv kuj coj lub neej mus raws nraim li Dab tus qauv ntawd thiab. Vajtswv Txojlus qhia hais tias “Tus uas muaj tswvyim yog tus uas paub hwm tus TSWV. Yog koj paub Vajtswv tus uas Dawbhuv, koj thiaj yog tus totaub tiag” (Pajlug 9:10). Tim ob, tibneeg yuav tsum zeem paub tus Tswv yog leejtwg thiab yus yog dab tsi, ces thaum ntawd yuav txo hwjchim, muab siab pehawm thiab ua rau Vajtswv ib leeg tau ntsej muag xwb. Tim peb, lub siab uas tsis paub ua Vajtswv tsaug, ua rau tibneeg ntsia tsis pom Vajtswv yog tus uas pub txojsia, pub kev hlub thiab pub txhua yam rau tibneeg, vim li ntawd tibneeg ib txhia thiaj tsis paub ua Vajtswv tsaug, tsis muaj kev sib txuas nrog rau Vajtswv. Thov Vajtswv pab kom peb paub txo hwjchim los pehawm Vajtswv thiab muaj lub siab paub ua Vajtswv tsaug tsis tu tsis tseg Vajtswv thiaj yuav tsis chim rau peb.
Thov Vajtswv
Vajtswv, thov zam nyuam yaus lub txim uas khav theeb thiab lub siab uas tsis paub ua Koj tsaug. Thov pab kom nyuam yaus paub hwm Koj kom txawjntse, ua lub neej ncaj ncees pehawm Koj kom Koj lub npe tau qhuas. Nyuam yaus tuav Tswv Yexus Khetos lub npe thov, Amees.
Peb pehawm Vajtswv los ntawm lub siab zoo li cas thiab tus cwjpwm twg?
Nyeem Vajluskub hauv peb xyoos: 2 Kauleethaus 8:16-9:15
Kênh Youtube BHKTHN:
