Klei Aê Diê Blŭ: Rôm 1:18-23
Êlan kliăng: “Kyuadah klei Aê Diê ngêñ bi êdah leh mơ̆ng adiê bi kdơ̆ng hŏng jih klei amâo mpŭ kơ Aê Diê leh anăn kơ klei wê mnuih ngă, hŏng klei wê anăn diñu kơ̆ng ghă klei sĭt nik” (Rôm 1:18)
Klei êmuh ksiêm mĭn: Ya Klei Aê Diê Blŭ brei thâo kơ klei Aê Diê ngêñ? Ya ngă anak mnuih jing hĕ pô bi kdơ̆ng hŏng Aê Diê? Mơ̆ng klei hriăm anei, ya klei ih akâo kơ Khua Yang?
Mơ̆ng adiê, klei Aê Diê ngêñ bi êdah čiăng bi kdơ̆ng hŏng jih jang klei amâo mpŭ kơ Aê Diê leh anăn klei wê mnuih ngă (êlan 18). Bi mni kơ Aê Diê kyuadah Ñu bi êmut kơ klei soh anak mnuih ngă ƀiădah Ñu khăp kơ anak mnuih jing mnơ̆ng Ñu hrih mjing. Knuih Aê Diê jing knuih kpă ênô kyuanăn klei Ñu ngêñ jing klei ngêñ kpă ênô, amâo djŏ klei bi kdjưng ai bhiâo msĕ si klei păt čiăng jih jang mnuih ngêñ ôh. Aê Diê ngêñ kơ jih jang klei bi kdơ̆ng hŏng knuih kpă ênô Ñu. Aê Diê bi êdah leh Ñu pô kơ anak mnuih hŏng klei klă mngač mơ̆ng mphŭn hrih lăn ala găn hŏng jih jang mnơ̆ng Ñu hrih mjing leh, ai tiê kpă Ñu dưm hlăm grăp čô mnuih, găn hŏng klei phung ênuk êlâo mtô bi hriăm kơ phung ênuk êdei, boh nik găn hŏng Khua Yang Yêsu hŏng asei mlei mnuih, dôk ti krah anak mnuih, leh anăn găn hŏng Klei Ñu Blŭ jing Hdruôm Hră Klei Aê Diê Blŭ. Aê Diê lač brei jih jang mnuih thâo kral Pô Hrih Mjing, Pô brei leh anăn djă pioh klei hdĭp jih jang mnơ̆ng êbat ban. Wăt tơdah snăn, anak mnuih amâo mpŭ kơ Gơ̆ jing Aê Diê ôh, kăn bi mni kơ Gơ̆ rei (êlan 19-21). Diñu amâo kkuh mpŭ kơ Aê Diê guh kơang jing Pô năng kơ klei kkuh mpŭ ôh ƀiădah diñu ruah klei kkuh mpŭ kơ rup krah hơăi mang mơ̆ng mnuih djiê leh, tơl diñu kkuh mpŭ wăt kơ rup čĭm, kơ hlô mnơ̆ng, kơ mnơ̆ng êbat ban (êlan 22-23). Anak mnuih yơh lui wir leh Pô Hrih Mjing leh anăn mčhur ai ngêñ Ñu.
Phŭn kơ Aê Diê bi êdah klei ngêñ jing kyua klei mgao leh anăn klei anak mnuih amâo thâo hdơr knga. Tal sa, anak mnuih lač kơ diñu pô jing thâo mĭn, ƀiădah boh sĭt gơ̆ diñu jing pô mluk mgu, amâo thâo kral klei soh klei djŏ ôh, bi luč klei guh kơang Aê Diê brei. Phŭn dô khua kơ phung dĭng buăl jăk Aê Diê, mtŭ tur mtrang aguah, ăt hŏng klei mgao čiăng mđơr hŏng Aê Diê mơh kyuanăn jing hĕ pô bi kdơ̆ng hŏng Aê Diê, leh anăn phung aê anak mnuih ăt tui kru pô mgao anăn mơh. Klei Aê Diê Blŭ čih: “Klei huĭ mpŭ kơ Yêhôwa jing klei kčưm kơ klei thâo mĭn, leh anăn klei thâo kral Pô Doh Jăk jing klei thâo săng” (Klei Bi Hriêng 9:10). Sa čô mnuih thâo kral sĭt hlei Aê Diê jing leh anăn si ñu pô jing srăng êbat hŏng klei luă gŭ ti anăp Aê Diê, hur har kkuh mpŭ leh anăn bi guh kơang kơ Anăn Aê Diê. Tal dua, klei amâo thâo hdơr knga ngă kơ anak mnuih amâo thâo kral ôh Aê Diê jing Pô brei klei hdĭp, Pô khăp leh anăn brei jih jang klei anak mnuih čiăng, mơ̆ng klei anăn diñu amâo thâo bi mni kơ Aê Diê, amâo bi mguôp sĭt suôr hŏng Aê Diê ôh. Akâo kơ Khua Yang đru drei thâo luă gŭ, bi luă drei pô kkuh mpŭ kơ Khua Yang jing Aê Diê hŏng ai tiê hdơr knga bi mni kơ Ñu.
Si ai tiê leh anăn hŏng ya knuih drei dôk kkuh mpŭ kơ Aê Diê?
Wah lač: Ơ Khua Yang, akâo Ih pap brei kơ kâo leh anăn kơ phung ayŏng amai adei kâo kyua klei soh mgao leh anăn amâo hdơr knga bi mni kơ Ih. Đru kâo leh anăn phung ayŏng amai adei kâo thâo huĭ mpŭ kơ Ih čiăng kơ hmei mâo klei thâo mĭn leh anăn mâo klei hdĭp kpă ênô, jăk mơak, leh anăn bi guh kơang kơ Anăn Ih. Kâo wah lač hlăm Anăn Yêsu Krist. Amen.
Dlăng Klei Aê Diê Blŭ hlăm tlâo thŭn: II Kôrantô 8:16-9:15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
