Loos 1:16-17
Nqe cim zaj kawm:
“Kuv yeej tsis txajmuag qhia txojmoo zoo li; txojmoo zoo yog Vajtswv lub hwjchim uas cawm tau txhua tus uas ntseeg dim. Txojmoo Zoo ntawd, xub qhia rau cov Yudais thiab tom qab ntawd mam li qhia rau lwm Haivneeg” (Loos 1:16).
Lus nug rau sawvdaws xav:
– Yog ua cas timthawj Paulus tsis txajmuag rau txoj Moo Zoo?
– Yuav ua cas thiaj tau txais txoj kev cawmdim hauv Tswv Yexus?
– Koj kawm tau dabtsi txog lub plag ntawm txoj Moo Zoo?
Xaulus yog ib tus neeg Falixais uas coj cov Yudas txoj kevcai ntseeg nruj, nws tau ntsib Tswv Yexus thaum tab tom taug kev mus rau pem lub nroog Damaxes thiab tau dhau los ua Tswv Yexus ib tus thwjtim, tom qab ntawd nws tau txais lub luag haujlwm tshwjxeeb coj txoj Moo Zoo mus qhia rau lwm haivneeg (Tes Haujlwm 9:1-19). Ncua sijhawm ntawd cov ntseeg tseem tsawg, tsis muaj leejtwg yuav muaj meejmom tseemceeb nyob rau hauv lub tebchaws, cov ntseeg raug tibneeg ntiajteb hem, ua saib tsis taus, thiab raug tsimtxom tawg khiav mus nyob thoob plaws qhov txhia chaw. Muaj coob tus raug kaw hauv tsev lojcuj, raug plawm, raug muab pob zeb ntaus thiab raug lim hiam ua rau lawv txajmuag nrog Tswv Yexus tus uas raug muab ntsia saum ntoo Khaublig. Tiamsis timthawj Paulus qhia paub meej hais tias nws tsis txajmuag rau txoj Moo Zoo uas yog Tswv Yexus tuag thiab sawv rov los, qhov ntawd yog Vajtswv lub hwjchim uas yuav cawm tau txhua tus uas ntseeg dim txim, ua ntej yog cov Yudas tom qab ntawd yog cov Kilis uas yog lwm haivneeg.
Txoj Moo Zoo uas hais txog kev cawmdim, tsis yog los ntawm tibneeg los tiamsis yog los ntawm Vajtswv lub hwjchim thiab Nws txoj kev hlub los. Nyob rau tiam Vajluskub qub Vajtswv tau qhia Nws txoj kev hlub rau tibneeg, dhau los ntawm txoj kev coglus rau haivneeg Yixalayees thiab pub rau lawv tau txais ntau yam koob hmoov tshaj lwm haivneeg. Dhau los ntawm haivneeg uas Vajtswv xaiv, Vajtswv npaj tseg txoj kev cawmdim rau txhua haivneeg (nqe 16). Txoj Moo Zoo yog Vajtswv lub hwjchim, cov ntseeg Yexus thiaj tsis txajmuag qhia Tswv Yexus txoj Moo Zoo rau txhua tus.
“Rau qhov txhua tus puavleej ua txhaum thiab tu ncua Vajtswv lub tshwjchim lawm” (Loos 3:23), yog li ntawd tsis muaj ib tus twg yuav ua tau ncaj ncees mus txog qib uas haum Vajtswv siab. Vim Vajtswv yog tus uas ncaj ncees, Nws ntxub kev txhaum thiab yuav rau txim rau tus neeg ua txhaum. Tiamsis Vajtswv yog kev hlub, Nws tsis xav muab Nws txhais tes los rau txim rau tibneeg. Yog li ntawd, Vajtswv thiaj nrhiav haukev los tuag hloov tibneeg lub txim txhaum: Tswv Yexus yog Vajtswv thiab los yug muaj cev nqaij daim tawv ua neeg, yog haivneeg Yixalayees, Nws twb ua tiav txoj kev cawmdim pub rau tibneeg saum tus ntoo khaublig lawm. Tsis hais leejtwg, yog los ntseeg txais yuav Tswv Yexus tus uas tuag txhiv tibneeg lub txim, Vajtswv yuav suav hais tias tus ntawd yog tibneeg ncaj ncees tabmeeg Vajtswv. Vajtswv txoj haukev npaj tseg ncaj ncees thiab phim raws li Vajtswv tus yam ntxwv, qhib kev rau tibneeg tau cawm dim los ntawm qhov uas lawv ntseeg Yexus thiab txoj kev ntseeg ntawd yuav loj hlob ib hnub zuj zus mus txog thaum uas peb paub Vajtswv txoj kev ncaj ncees uas yog kev hlub tseeb. Thiab kuj yog los ntawm kev ntseeg, cov ntseeg kev ua neej ua rau tibneeg ntiajteb pom kom rub tau lawv tig los nrhiav Vajtswv. Ib tus ntseeg ciaj sia yuav coj tau lwm tus los ntseeg, thiab tus neeg ncaj ncees yeej ua neej los ntawm txoj kev ntseeg (nqe 17).
Thov Vajtswv
Vajtswv, nyuam yaus ua tsaug rau Koj txoj kev ncaj ncees thiab kev hlub! Los ntawm kev ntseeg, nyuam yaus tau txais kev cawm dim hauv Koj txoj Moo Zoo. Thov pab nyuam yaus muaj kev ntseeg ciaj sia, ua rau coob tus pom thiab paub Vajtswv kom lawv los ntseeg txais yuav txoj Moo Zoo, lawv thiaj tau cawm dim ib yam li nyuam yaus. Nyuam yaus tuav Tswv Yexus Khetos lub npe thov, Amees.
Peb paub txog txoj Moo Zoo uas yog Vajtswv lub hwjchim li cas?
Nyeem Vajluskub hauv peb xyoos: 2 Kauleethaus 7:2-8:15
Kênh Youtube BHKTHN:
