Pajlus 21:7; 22:8
Nqe cim zaj kawm:
“Yog koj tseb tej uas tsis ncaj ncees, koj yuav tau sau kev puastsuaj, thiab qhov uas koj ua limhiam rau lwm tus yuav kawg mus” (Pajlug 22:8).
Lus nug rau sawvdaws xav:
– Vajntxwv Xalumoos ceebtoom txog txoj kev txhaum twg?
– Xalumoos siv tus duab twg qhia txog yam kev txhaum ntawd yuav raug txiav txim?
– Vim li cas txhua tus uas tswj Pawg Ntseeg yuavtsum coj kom ncaj ncees?
Nyob rau hauv nqe pajlug no vajntxwv Xalumoos qhia hais tias, tus uas tseb txoj kev tsis ncaj ncees mas yuav raug txim. “Kev tsis ncaj ncees” lub ntsiab hnub thaum yog hais txog “Tej kevcai ua ncaj uas txhua tus puavleej paub” ntuas kom txhua tus yuavtsum muaj kev ncaj ncees, saib taus txhua tus sib txig sib luag, ntawm txhua tus tibneeg thiab hauv txhua tes haujlwm huv tibsi. Pajlug 21:7 vajntxwv Xalumoos hais ntxiv tias, “kev ua ncaj” rau “kevcai ncaj ncees” lub ntsiab yog “ kho dua tej kevcai ncaj ncees” thiab rov muab kev ncaj ncees rau cov neeg raug quab yuam caij tsuj, raug tsim txom raws li txoj kevcai ncaj ncees. Yog li ntawd, dhau tej kevcai no peb pom hais tias, tsis yog ua saib tsis taus cov neeg pluag txomnyem ces kev txhaum xwb, tiamsis yog txhua yam uas peb ua tsis ncaj rau lwm tus puavleej yog kev txhaum huv tibsi thiab yuav raug Vajtswv rau txim.
Peb pom “tus uas tseb txoj kev tsis ncaj ncees” nws muaj ib “rab plawm” nrog nraim thiab, ntawd yog piv txog tus uas muaj hwjchim tswj kav. Vajntxwv Xalumoos thiaj qhia hais tias, txhua tus thawj coj ntawd nyiam siv lub hwjchim thiab txoj kev ua tsis ncaj ncees tswj cov uas nyob hauv qab yus thiab cov uas tsis muaj hwjchim dab tsi. Yog vim li cas cov uas muaj hwjchim thiab ua thawj coj yuav yoojyim poob rau txoj kev txhaum li ntawd? Vim lawv kev khav theeb ua rau lawv xav hais tias yus muaj hwjchim, thiab tsis nco qab txog tus hwjchim loj dua thiab yuav txiav txim rau yus. Lawv thiaj siv lawv lub hwjchim ua ntau yam raws li lawv nyiam “tsis ncaj ncees”. Qhov uas lawv yuav tau txais yog txoj kev “puastsuaj”. Tes haujlwm uas lawv ua tsis muaj qab hau thiab lawv txoj kev ua “limhiam” yuav kawg mus sai sai. Vajntxwv Xalumoos siv tus duab “cog thiab sau” hais txog tej nuj nqis uas tsis muaj leejtwg yuav khiav dhau yam uas yus twb tseb lawm thiab qee zaus tseem yuav sau ntau dua tej uas twb tseb lawm thiab (Hauxeyas 8:7).
Pawg Ntseeg yog cov neeg uas pehawm Vajtswv tus uas ncaj ncees, yog li ntawd, txhua tus uas tswj Pawg Ntseeg yuav tswj los ntawm txoj kev ncaj ncees. Txhua tes haujlwm yuavtsum muab Vajtswv Txojlus los ua chaw tiag taw thiab yuavtsum ua ncaj ncees rau txhua tus huv tibsi. Txhua yam uas peb yuav txiav txim siab ua tsis hais hauv peb tsev neeg lossis hauv Pawg Ntseeg, peb yuavtsum muab txoj kev ncaj ncees los ua lub chaw tiag taw, tsis txhob ntshaw ib yam dabtsi twg rau peb tus kheej lossis rau peb tsev neeg, ho ua tsis ncaj rau lwm tus. Yog li ntawd, hauv peb tes haujlwm uas tswj Pawg Ntseeg, thov Vajtswv pab kom peb txhua tus paub tig pob ntseg mus mloog thiab ua raws li Vajtswv tus uas ncaj ncees Txojlus tseeb qhia, peb thiaj yuav dhau mus ua tau ib tus tswj saib Vajtswv Pawg Ntseeg ntawm txoj kev ncaj ncees.
Thov Vajtswv
Vajtswv, thov pab kom nyuam yaus nyob rau hauv Koj Pawg Ntseeg, paub ua lub neej ntshai Koj, hwm Koj, kom nyuam yaus thiaj paub hlub Koj Pawg Ntseeg thiab ua ncaj ncees rau txhua tus huv tibsi, thiaj ua rau Vajtswv Koj tau ntsej muag. Nyuam yaus tuav Tswv Yexus Khetos lub npe thov, Amees.
Peb puas ua ncaj ncees rau txhua tus huv tibsi?
Nyeem Vajluskub hauv peb xyoos: I Kauleethaus 8:1-9:27
Kênh Youtube BHKTHN:
