Klei Aê Diê Blŭ: Klei Bi Hriêng 21:7; 22:8
Êlan kliăng: “Hlei pô rah klei amâo kpă srăng wiă klei knap mñai, leh anăn giê hnuăt klei ñu ngêñ srăng joh hĕ.” (Klei Bi Hriêng 22:8)
Klei êmuh ksiêm mĭn: Mtao Y‑Salômôn hưn êlâo brei thâo kơ ya mta klei soh? Ya rup ñu yua čiăng bi klă klei bi kmhal sĭt kyua ngă klei soh anei? Ya ngă brei jih jang phung kiă kriê Phung Sang Aê Diê ngă klei kpă ênô mtăp mđơr?
Hlăm êlan Klei Bi Hriêng anei, mtao Y‑Salômôn hưn klei bi kmhal kơ pô rah klei amâo kpă. “Klei amâo kpă” tinei hlăm klei blŭ phŭn djŏ tuôm hŏng “klei kpă ênô čoh čuăn”, jing klei dôk dơ̆ng ƀơ̆ng huă kpă ênuah, mtăp mđơr hŏng jih jang mnuih amâo yap mdê djuê ana, anôk bruă hlăm ƀuôn sang amâodah klei duah ƀơ̆ng digơ̆ ôh. Čiăng lŏ thiăm klei bi mĭn kơ klei kpă ênô, Klei Bi Hriêng 21:7 lač kơ klei “ngă klei djŏ”, hlăm klei blŭ phŭn mblang jing “ ƀư̆ mkra klei kpă”, čiăng lač dưm jih jang mta klei bi djŏ kơ pô arăng ktư̆ juă. Snăn, bi mguôp jih dua klei mĭn kơ klei kpă, drei thâo kral snei, amâo djŏ klei ngă ƀai kơ mnuih knap mñai hlăm ƀuôn sang kơh jing klei soh, ƀiădah klei ngă amâo kpă, klei dôk dơ̆ng ƀơ̆ng huă amâo mtăp mđơr hŏng pô mkăn jing klei soh yơh, jing klei “amâo kpă”, leh anăn srăng mă tŭ boh jhat yơh.
Mâo sa klei brei mđing, anăn jing “pô rah klei amâo kpă” bi mguôp hŏng “giê hnuăt”, bi ala kơ klei dưi. Snăn, tinei mtao Y‑Salômôn čiăng lač kơ phung khua kiă kriê mjhua klei dưi diñu kăp ktư̆ juă phung dôk ti gŭ klei ñu kiă kriê amâodah phung êdu awăt. Ya ngă phung mâo klei dưi amâodah jing khua kiă kriê ênưih lĕ hlăm klei mplư ngă klei amâo kpă hŏng pô mkăn? Mtao Y‑Salômôn bi mguôp leh “giê hnuăt” leh anăn “klei ngêñ”. “Klei ngêñ” ăt čiăng lač kơ klei mgao mơh. Kyua klei mgao yơh, diñu bi mĭn bi yưng klei jhŏng ktang diñu, amâo thâo kral ôh Pô Phat Kđi ti dlông hĭn, lu diñu yua klei dưi diñu kăp ngă klei soh wê, ngă “klei amâo kpă”, snăn boh diñu mă tŭ amâo mâo ôh klei mkăn êngao kơ “klei knap mñai”, hlăm klei mblang phŭn jing hơăi mang, msĕ klei êpei, amâo mâo ênoh yuôm dôk sui ôh. Hĭn êjai, “giê hnuăt klei ñu ngê̆n” amâo srăng sui ôh kyua “srăng joh hĕ”, hlăm klei mblang phŭn jing tuč ruê̆ amâodah ram rai. Mtao Y‑Salômôn yua leh rup “rah – wiă” jing klei bhiăn si phŭn jing srăng mâo boh anăn yơh, amâo dưi lŏ tlaih ôh kyuadah jih jang mnuih srăng wiă ya klei ñu rah leh, leh anăn wăt srăng wiă lu hĭn mơh (Y‑Ôsê 8:7).
Phung Sang Aê Diê jing anôk kkuh mpŭ kơ Aê Diê Kpă Ênô, kyuanăn jih jang phung kiă kriê Phung Sang Aê Diê brei ngă klei kpă, klei djŏ. Jih jang bruă brei dưm ti dlông atur Klei Aê Diê Blŭ, leh anăn brei dôk dơ̆ng ƀơ̆ng huă hŏng klei kpă hŏng jih jang mnuih. Jih jang klei drei čuăn ngă hlăm gŏ sang amâodah hlăm Phung Sang Aê Diê brei dưm ti dlông atur klei kpă ênô, đăm ôh kyua klei tŭ dưn kơ pô amâodah kơ gŏ sang pô bi hmăi hĕ klei dôk dơ̆ng ƀơ̆ng huă hŏng pô mkăn. Hlăm bruă kiă kriê Phung Sang Aê Diê, akâo Khua Yang brei grăp čô drei mđing hmư̆ leh anăn ngă hlue klei sĭt nik Pô Kpă Ênô.
Si ngă drei dôk dơ̆ng bơ̆ng huă kpă ênô hŏng jih jang mnuih mơ̆?
Wah lač: Ơ Khua Yang, akâo kơ Ih brei kâo dôk hdĭp hlăm Phung Sang Aê Diê hŏng klei huĭ mpŭ kơ Khua Yang, mpŭ kơ klei sĭt nik, dôk dơ̆ng ƀơ̆ng huă hdơ̆ng găp hŏng klei khăp, hŏng klei kpă leh anăn mơ̆ng klei anăn dưi bi guh kơang kơ Anăn Ih. Kâo wah lač hlăm anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 8:1-9:27
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
