Klei Aê Diê Blŭ: I Y‑Pêtrôs 4:10-11
Êlan kliăng: “Tui si grăp čô mă tŭ leh klei brei mơ̆ng Aê Diê, yua klei anăn bi đru hdơ̆ng găp, msĕ si phung dĭng buăl kiă jăk bi mbha klei Aê Diê pap.” (I Y‑Pêtrôs 4:10)
Klei êmuh ksiêm mĭn: Ya jing klei brei mơ̆ng Aê Diê? Si klei khua ƀĭng kna Y‑Pôl mtô brei grăp čô kiă kriê leh anăn yua klei brei mơ̆ng Aê Diê? Hŏng ya klei kñăm čiăng? Si klei ih đru mguôp hlăm bruă kiă kriê Phung Sang Aê Diê?
Čiăng dưi kiă kriê jăk Phung Sang Aê Diê, Khua Yang brei kơ grăp čô mâo sa amâodah lu mta klei brei mdê mdê. Khua ƀĭng kna Y‑Pôl hlăm hră čih mơĭt Rôm 12:6-8; I Kôrantô 12:8-10, 27-28; leh anăn Êphêsô 4:11 čih răk dŭm mta klei brei ƀiădah amâo djŏ jing hră čih djăp ênŭm jih ôh. Msĕ si hlăm hră Klei Kbiă 35:30-35 hưn kơ dua čô pô mă bruă “Ñu bi bŏ gơ̆ leh hŏng Mngăt Myang Aê Diê, hŏng klei knhâo, klei thâo săng, klei thâo mĭn, leh anăn klei mbruă hlăm jih jang bruă ngă”. Diñu mâo klei brei klei knhâo klei mbruă dưi ngă hlăm bruă mdơ̆ng Sang Yang. Grăp čô anak buôn sang Aê Diê mâo Yang Mngăt Jăk brei sơăi klei brei, ƀiă êdi ăt mâo sa mta mơh (I Kôrantô 12:11), amâo mâo pô hơăi ôh. Msĕ si hlăm sa asei mlei mâo lu kdrêč, snăn mơh hlăm Phung Sang Aê Diê mâo lu klei brei mdê mdê čiăng pioh bi đru ba klei tŭ dưn hdơ̆ng găp.
Khua ƀĭng kna Y‑Pêtrôs mtô, “Tui si grăp čô mă tŭ leh klei brei mơ̆ng Aê Diê, yua klei anăn bi đru hdơ̆ng găp, msĕ si phung dĭng buăl kiă jăk bi mbha klei Aê Diê pap.” (êlan 10). Ñu hưn klă grăp čô anak ƀuôn sang Aê Diê knŏng jing pô kiă kriê klei brei ƀiădah Khua jing Khua Yang pô brei. Klei Khua Yang čiăng kơ pô kiă kriê jing klei sĭt suôr thâo yua bi jăk klei brei tui si Khua Yang čiăng, bi mơak kơ Ñu, amâo djŏ tui si klei mĭn drei pô ôh, amâo djŏ yua pioh hưn ktưn kơ pô ôh. Brei hdơr kơ klei kñăm Khua Yang brei klei brei jing pioh “bi đru hdơ̆ng găp” amâo djŏ ôh pioh dưn kơ hjăn pô dê.
Khua ƀĭng kna Y‑Pêtrôs bi klhak mta klei brei hlăm Phung Sang Aê Diê hŏng dua mta: klei blŭ leh anăn klei mă bruă. Pô mâo klei brei kơ klei blŭ jing phung khua pô mtô, phung nai pô klei hriăm hrue kjuh, phung hiu hưn, pô kah mbha Klei Aê Diê Blŭ…, grăp čô brei mblang amâodah mtô hŏng klei răng, amâo dưi blŭ tui si klei mĭn pô ôh, ƀiădah brei blŭ djŏ tui si klei Khua Yang čiăng bi êdah leh hlăm Klei Aê Diê Blŭ, brei đăo kơ Klei Aê Diê Blŭ jing klei Aê Diê lač mtă, amâo dưi brei klei pô khăp čiăng, klei mĭn pô dê bi weh hĕ klei Khua Yang čiăng ôh (I Têsalônik 2:13). Pô mâo klei brei mă bruă, đru mnuih mkăn brei thâo knang kơ klei ktang Khua Yang brei čiăng dưi mă bruă hŏng jih ai tiê (Philip 4:13), sĭt suôr mă bruă, “čiăng kơ hlăm jih jang klei Aê Diê dưi mâo klei guh kơang hlăm Yêsu Krist.” (êlan 11b).
Klei brei jing mnơ̆ng brei mơ̆ng Aê Diê brei kơ grăp čô anak ƀuôn sang Aê Diê, čiăng mđrăm mbĭt bi mguôp hlăm bruă kiă kriê Phung Sang Aê Diê, bi đru hdơ̆ng găp đĭ hriê kơ prŏng hlăm klei hdĭp mngăt, čiăng rŭ mdơ̆ng, bi mđĭ hĭn Phung Sang Aê Diê. Grăp čô phung đăo kơ Krist brei hmiêt mkăp myơr kơ Aê Diê ya mta klei thâo, klei knhâo, klei mbruă pô msĕ si đa đa mmuñ, yua đĭng brô̆, bi mđung asăp, bi mngač… Yang Mngăt Jăk srăng brei klei brei klei blŭ amâodah mă bruă čiăng kơ drei yua klei thâo anăn hlăm klei kkuh mpŭ leh anăn mă bruă kơ Khua Yang.
Si ngă drei yua djŏ hdră kñăm mơ̆ jih jang klei Khua Yang brei?
Wah lač: Ơ Khua Yang, akâo Ih lŏ bi trơ̆ng hlăm kâo klei Ih brei leh kơ kâo, čiăng kơ kâo dưi jing pô kiă kriê sĭt suôr đru mguôp rŭ mdơ̆ng klei hdĭp mngăt hdơ̆ng hmei leh anăn bi mđĭ Phung Sang Aê Diê Ih. Kâo wah lač hlăm anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
