Henplais 10:1-4
Nqe cim:
“Cov Yudais txoj Kevcai tsuas yog tej tseemceeb uas yuav los tom ntej no tus duab xwb, yeej tsis yog tej ntawd tiag tiag…” (Henplais 10:1a).
Lus nug rau sawvdaws xav:
– Vim li cas txoj kevcai “tsuas yog tus duab”?
– Yog fij khoom raws li txoj kevcai daws tsis tau kev txhaum yog li qhov muaj nqis yog dabtsi?
– Piv rau cov Yixalayees tiam Vajluskub Qub, cov ntseeg Tswv Yexus tabtom tau txais “txojkev zoo” li cas?
Thaum hais txog Mauxes txoj kevcai “yog tej tseemceeb uas yuav los tom ntej no tus duab xwb”, tus uas sau phau ntawv Henplais xav hais txog txoj kevcai qhia ua ntej hais txog tej koob hmoov ntawm Tswv Yexus tej lus cog tseg tshiab pub. Tej kevcai ua ntawm txoj kevcai qhia tsuas yog qhia paub qhov cheemtsum yuav muaj qhov “tiag” (tus duab tiag) ntawm Tswv Yexus tes haujlwm ua Povthawj Hlob. Raws li lwm lub ntsiab lus, peb tseem tos kom tau txais txojkev cawm dim puv ntoob (Henplais 9:28; 13:14).
Ncaj rau hnub ua Kevcai Daws Txim, cov ntshav tsiaj nchos rau saum lub hau Phijxab uas muaj ob daim txiag zeb sau Kaum Nqe Kevcai. Vajtswv tsis muab txoj kevcai los ntsia tibneeg tej kev txhaum, tiamsis Nws ntsia cov ntshav tsiaj thiab zam lawv tej kev txhaum. Qhov kev tua tsiaj fij ntawd tsuas yog muaj qabhau ib ntus, “tej ntshav heev nyuj thiab ntshav tshis yeej ntxuav tsis tau neeg tej kev txhaum mus ib zaug li.” (nqe 4). Nov yog lub vimchiv tus povthawj yuav tsum niaj zaug tua tsiaj fij txhua lub xyoo. Dhau los ntawm qhov kev tua tsiaj fij, cov Yixalayees muaj feem los cuag tau Vajtswv tus uas dawbhuv. Txawm yog twb muaj cov ntshav tsiaj, los lawv lub siab tsis kaj vim tej uas lawv ua yuam kev, thiab tsis muaj leejtwg, txawm yog cov povthawj los twb sawv tsis taus ntawm Vajtswv tus uas muaj hwjchim loj kawg nkaus lub xubntiag.
“Qhov uas lawv theej lawv lub txhoj ntawd ua rau lawv niaj xyoo nco ntsoov lawv tej kev txhaum” (nqe 3). Tes haujlwm uas niaj zaug tua tsiaj fij yog qhov uas ua kom txhua tus nco ntsoov yus yog neeg txhaum, cheemtsum Vajtswv txojkev zam txim, qhov ntawd ua rau muaj lub siab ntshaw “tej yam zoo uas tseem yuav los tom ntej no”, nws yog qhov khoom fij zoo txaus nkaus muaj peevxwm daws tau teebmeem kev txhaum, tsis yog “npog cia” tiamsis yog “tshem mus”. Thiab qhov no yog qhov uas Yauhas Npatitus tawm lus thaum nws qhia neeg los cuag Tswv Yexus: “Tus no yog Vajtswv tus menyuam Yaj uas yuav ris neeg ntiajteb lub txim!” (Yauhas 1:29).
Cov ntseeg Tswv Yexus nimno tabtom nyob hauv “tej yam zoo uas tseem yuav los tom ntej no” (nqe 1). Vamkhom tus Tswv Yexus cov ntshav tsimtxiaj ntws saum tus ntoo khaublig theej neeg ntiajteb lub txhoj, txhua yam kev rau txim rau peb tej kev txhaum twb raug zam tagnrho. Nimno, peb muaj feem tau los cuag Vajtswv txhua hnub, txuas lus nrog Nws, thov Nws zam tej uas peb ua yuam kev thiab pub lub zog kom peb kovyeej tej kev sim siab. Tseem muaj yam dabtsi zoo thiab tseemceeb tshaj qhov uas peb muaj lub neej tshiab nyob hauv tus Tswv Yexus Khetos!
Thov Vajtswv,
Tus Tswv Yexus, ua tsaug uas Koj cov ntshav tsimtxiaj ntws saum tus ntoo khaublig. Koj tuag txhiv ib zaug xwb txaus lawm, Koj muaj hwjchim ntxuav tau nyuam yaus tej kev txhaum thiab pub lub zog rau nyuam yaus ua neej tawg paj txi txiv rau Koj. Amees.
Peb ua dabtsi kom tuav tau txojkev sib raug zoo nrog tus Tswv thiab tau txais yam zoo nyob hauv Nws txoj koob hmoov hlub?
Nyeem Vajluskub hauv peb lub xyoo: Tes Haujlwm 26
Kênh Youtube BHKTHN:
