Klei Aê Diê Blŭ: II Y-Timôthê 4:1-5
Êlan kliăng: “Ƀiădah bi kơ ih, brei ih jing djŏ hnơ̆ng hlăm jih jang mnơ̆ng, gĭr tŭ klei knap mñai, mă bruă sa čô hiu hưn klei mrâo mrang jăk, bi leh klă bruă ih.” (II Y-Timôthê 4:5)
Klei êmuh ksiêm mĭn: Ya klei khua ƀĭng kna Y-Pôl mtă kơ khua pô mtô Y-Timôthê brei ngă hlăm bruă ñu dôk djă? Ya boh klei sĭt ñu dôk tlă anăp? Ya ngă klei mtô lač anei ăt pioh wăt kơ grăp čô phung anak ƀuôn sang Aê Diê mơh? Si klei ih hmiêt mkăp tŭ klei knap čiăng hiu hưn Klei Mrâo Mrang Jăk?
Anei jing kdrêč tuč ruê̆ hlăm hră khua ƀĭng kna Y-Pôl čih mơĭt kơ anak ñu hlăm mngăt, jing khua pô mtô Y-Timôthê. Leh lu mta klei blŭ mtô lač mtă mtăn, knhal tuč khua ƀĭng kna jao kƀong pui bruă hiu hưn klei mrâo mrang jăk kơ khua pô mtô hlăk ai Y-Timôthê.
Khua ƀĭng kna jao bruă hiu hưn Klei Mrâo Mrang Jăk ti anăp Aê Diê leh anăn ti anăp Krist Yêsu (êlan 1). Ñu lač klă mngač hŏng khua pô mtô Y-Timôthê snei, ih srăng dôk ti anăp Yang Krist pô, jing Pô srăng phat kđi jih jang mnuih kơ bruă pô djă. Kyuanăn, brei khua pô mtô Y-Timôthê hmiêt mkăp nanao “mtô mblang”, čiăng lač “mtô Klei Aê Diê Blŭ” amâodah “hiu hưn Klei Mrâo Mrang Jăk”, gĭr thâodah mông găl amâodah amâo găl čiăng đăm bi luč myun ôh. Kyuadah srăng truh sa ênuk arăng amâo lŏ čiăng hmư̆ ôh klei mtô sĭt, kyua lu mta klei tluh mơ̆ng lăn ala ktŭng hrip diñu đuĕ kbưi mơ̆ng êlan klei mtô sĭt nik. Boh blŭ “klei đăo jăk” tinei mblang jing klei “mtô bi hriăm” hlăm II Y-Timôthê 3:16. Boh blŭ hưn mdah Klei Aê Diê Blŭ “kbiă hriê mơ̆ng klei Aê Diê ƀhur êwa leh anăn jing yuôm pioh mtô bi hriăm”. Srăng truh ênuk phung mnuih hngah amâo čiăng hmư̆ klei mtô sĭt kpă leh anăn djŏ ôh. Hrô kơ klei anăn, diñu knŏng čiăng hmư̆ klei mơak diñu pô ruah. Ti knhal tuč diñu kđăl ƀăng knga amâo lŏ čiăng hmư̆ klei sĭt nik ôh ƀiădah wir tui hlue klei yăl dliê đưm amâo sĭt ôh (êlan 4). Kyuanăn, mta klei yuôm brei thâo yua mông bi jăk, hmiêt mkăp tŭ klei knap mñai čiăng hiu hưn Klei Mrâo Mrang Jăk.
Grăp čô phung đăo kơ Krist mâo leh klei bi tui mơ̆ng Khua Yang Yêsu blei hŏng êrah Ñu pô, čiăng ba drei mơ̆ng klei jing dĭng buăl kơ yang jhat dưi jing dĭng buăl kơ Khua Yang, brei drei jing sa čô dĭng buăl kpă ênô leh anăn sĭt suôr hŏng Khua Yang. Tơdah čuăn ruah tui hlue Khua Yang leh anăn mă bruă kơ Ñu, khua pô mtô Y-Timôthê wăt grăp čô drei brei tŭ ư tla sa ênoh srăng tŭ klei knap mñai kyua Klei Mrâo Mrang Jăk bi mtlaih mơ̆ng Khua Yang Yêsu Krist. Klei truh anei amâo dưi weh đuĕ ôh, kyuadah bruă hiu hưn Klei Mrâo Mrang Jăk bi mtlaih mnuih, jing bruă mmiă mă mngăt mnuih soh mơ̆ng kngan yang jhat hlăm kdrăn bi blah klei hdĭp mngăt.
Snăn bruă jao yuôm bhăn kơ grăp čô phung đăo, dơ̆ng mơ̆ng khua pô mtô wăt jih jang phung đăo, dơ̆ng mơ̆ng hđeh truh kơ mduôn, jing klei hiu hưn Klei Mrâo Mrang Jăk bi mtlaih mnuih “thâodah mông găl amâodah amâo găl ôh”. Brei drei “tŭ klei knap mñai, mă bruă sa čô hiu hưn klei mrâo mrang jăk ” (êlan 5). Akâo kơ Khua Yang brei drei mâo klei gĭr, tŭ klei knap mñai leh anăn thâo yua mông jih jang mông găl hiu hưn Klei Mrâo Mrang Jăk čiăng bi leh klă bruă Khua Yang jao.
Si ngă drei hmiêt mkăp tŭ klei knap mñai čiăng hiu hưn Klei Mrâo Mrang Jăk bi mtlaih mnuih mơ̆?
Wah lač: Ơ Khua Yang, akâo Ih brei kơ kâo ai tiê jhŏng leh anăn klei gĭr hlăm bruă Khua Yang jao, boh nik hlăm bruă hiu hưn Klei Mrâo Mrang Jăk. Akâo Ih đru kâo hmiêt mkăp tŭ klei knap mñai kyua Anăn Khua Yang čiăng bi mtlaih lu mnuih.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 18:1-19:7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
