II Timautes 4:1-5
Nqe cim:
“Tiamsis koj tsis txhob ua li lawv. Koj yuav tsum tswj koj lub siab txhua lub sijhawm, ua siab ntev nyiaj tej kev txomnyem mus qhia Txojmoo Zoo thiab muab siab rau ua txhua yam haujlwm uas Vajtswv muab rau koj ua lawm kom tiav.” (II Timautes 4:5).
Lus nug rau sawvdaws xav:
– Timthawj Paulus qhia tus xibhwb hluas Timautes yuav tsum ua li cas rau tes haujlwm nws tau txais?
– Nws yuav tsum ua li cas rau tej uas nws tabtom ntsib?
– Vim li cas tej lus qhia no kuj yog tej lus qhia rau tus Tswv cov menyuam txhua tus thiab?
– Peb txaus siab hlo tiv kev txomnyem mus qhia Txojmoo Zoo li cas?
Ntawm no yog tshooj kawg hauv tsab ntawv thib ob Timthawj Paulus sau xa mus rau nws tus menyuam sab ntsujplig uas yog xibhwb Timautes. Tomqab uas qhia thiab ntuas, Timthawj Paulus cob tes haujlwm qhia Txojmoo Zoo rau Timautes ua.
Timthawj Paulus tso tes haujlwm mus qhia Txojmoo Zoo rau Timautes tabmeeg Vajtswv thiab Yexus Khetos (nqe 1). Paulus hais meej rau xibhwb Timautes hais tias koj yuav tsum ua tabmeeg ntawm Yexus Khetos tus uas yuav los txiav txim rau txhua tus tes haujlwm uas tau ua. Yog li, xibhwb Timautes yuav tsum muab siab rau qhia “Vajtswv Txojlus”, txhais tau hais tias “tshaj qhia Vajtswv Txojlus” lossis “qhia Txojmoo Zoo” rau txhua lub sijhawm, txawm yog tau zoo thiab txomnyem los tsis txhob cia lub sijhawm dhau mus. Rau qhov yuav muaj tej lub sijhawm neeg tsis nyiam mloog Vajtswv Txojlus, tej uas nyob hauv lub ntiajteb no rub lawv tsis ua raws li qhov tseeb. Lo lus “Vajtswv Txojlus” ntawm no kuj yog lo lus “qhia” hauv II Timautes 3:16. Lo lus no qhia paub Vajtswv Txojlus “tau Vajtswv tshoov neeg lub siab kom neeg sau thiab qhia qhov tseeb”. Yuav muaj tej lub sijhawm neeg tsis xav mloog qhia qhov tseeb thiab qhov yog. Lawv tsuas xav mloog tej uas lawv pom hais tias tseeb thiab xav ntseeg xwb, lossis tej lus uas zoo mloog, haum siab. Thaum kawg, lawv yuav tsis nyiam mloog Vajtswv Txojlus, lawv tsuas nyiam mloog tej dab neeg xwb (nqe 4). Yog li ntawd, qhov tseemceeb yog yuav tsum siv txhua lub sijhawm, txaus siab hlo tiv kev txomnyem qhia Txojmoo Zoo.
Txhua tus ntseeg Tswv Yexus puavleej tau tus Tswv muab Nws cov ntshav ntxuav, cawm dim ntawm dab txhais tes los ua tubtxib rau tus Tswv, peb yuav tsum ua ib tug tubtxib ncaj ncees thiab zoo rau tus Tswv. Thaum txiav txim siab nrog tus Tswv mus thiab ua Nws haujlwm, xibhwb Timautes kuj zoo ib yam li peb txhua tus thiab, yuav tsum txaus siab them tus nqi txomnyem vim Tswv Yexus Txojmoo Zoo. Qhov no yog yam uas khiav tsis dhau, vim tes haujlwm tshaj qhia Moo Zoo cawm tibneeg yog kob tsovrog sab ntsujplig, txeeb neeg txhaum tus ntsujplig ntawm dab Ntxwgnyoog txhais tes los.
Yog li ntawd, tes haujlwm tseemceeb ntawm txhua tus ntseeg Tswv Yexus, txij xibhwb mus txog tus ntseeg, tus hluas mus txog tus laus yuav tau qhia Txojmoo Zoo cawm tibneeg “tsis hais lub sijhawm twg los koj yuav tsum qhia.” Cia li “ua siab ntev qhuab qhia. Koj yuav tsum ua siab ntev qhuab ntuas sawvdaws, yaum sawvdaws los ntseeg thiab txhawb sawvdaws lub zog.” (nqe 5). Thov tus Tswv pab kom peb ua taus siab ntev, tiv txomnyem thiab siv txhua lub sijhawm tshaj qhia Txojmoo Zoo kom ua tiav tes haujlwm tus Tswv muab.
Thov Vajtswv,
Tus Tswv, thov Koj pub kom nyuam yaus muaj lub siab tawv thiab ua siab ntev ua Koj tes haujlwm, tshwjxeeb yog tes haujlwm qhia Txojmoo Zoo. Nyuam yaus txaus siab hlo tiv txomnyem vim tus Tswv lub npe. Amees.
Peb puas txaus siab tiv txomnyem mus qhia Txojmoo Zoo cawm tibneeg?
Nyeem Vajluskub hauv peb lub xyoo: Tes Haujlwm 18:1-19:7
Kênh Youtube BHKTHN:
