I Timautes 4:11-16
Nqe cim:
“Thaum nej thov Vajtswv, nej yuav tsum thov nws qhib kev rau peb qhia Txojmoo Zoo uas hais txog Yexus Khetos zaj uas yav tas los tsis muaj neeg paub…” (Kaulauxais 4:3).
Lus nug rau sawvdaws xav:
– Timthawj Paulus twb qhia rau tus xibhwb hluas Timautes cov haujlwm tseemceeb twg ntawm tes haujlwm yug Vajtswv pab yaj?
– Cov ntseeg Tswv Yexus kawm paub tej yam no ua dabtsi?
– Vim li cas peb yuav tsum hmov tshua txog tes haujlwm cob qhia ntawm tus neeg saib Vajtswv pab yaj hauv Pawg Ntseeg thiab thov Vajtswv pab lawv?
Qhib thawj cov lus ntuas ua Vajtswv haujlwm rau tus xibhwb hluas Timautes, Timthawj Paulus hais tias: “Koj yuav tsum cob thiab qhia tej no rau sawvdaws.” (nqe 11 – phau txhais tshiab). Qhov no yog ob tes haujlwm tseemceeb ntawm ib tug xibhwb nyob hauv Pawg Ntseeg. “Cob thiab qhia” cov xibhwb yuav tsum rau siab ntso ua, vim qhov no yog lub tswvyim zoo heev pab kom cov ntseeg tus Tswv loj hlob sab ntsujplig thiab Pawg Ntseeg vammeej.
Timthawj Paulus hais rau Timtautes hais tias, “Koj yuav tsum niaj hnub nyeem Vajtswv Txojlus rau sawvdaws mloog, qhuab qhia thiab cob qhia lawv mus txog thaum kuv tuaj.” (nqe 13). Nyeem Vajtswv Txojlus, qhuab qhia thiab cob qhia yog tes haujlwm uas tus neeg yug Vajtswv pab yaj yuav tsum tau rau siab ntso ua. Xibhwb kuj yog ib tug ntseeg Tswv Yexus, yog Vajtswv ib tug menyuam tiamsis nws tau Vajtswv cob ua tes haujlwm yug Pawg Ntseeg sab ntsujplig, yog li xibhwb yuav tsum “nquag” muab Vajtswv Txojlus los yug pab yaj. Tseeb tiag tes haujlwm ntawm tus neeg yug Vajtswv pab yaj yog nyeem Vajtswv Txojlus, qhuab qhia thiab cob qhia. Dua li ntawd, muaj 5 seem uas nws yuav tsum tau ua qauv yog “tej lus uas koj hais, tej haujlwm uas koj ua, hlub lwm tus, muab siab rau ntseeg thiab ua neeg zoo” (nqe 12).
Xibhwb yog tus uas tau tus Tswv hu, pub koob hmoov thiab txib kom mus qhia. Tes haujlwm yug Vajtswv pab yaj no kuj tau hauvpaus koomhaum tsa ua haujlwm hauv Pawg Ntseeg (nqe 14). Yog li ntawd, xibhwb yuav tau siv zog ua feem xyuam raug txib, ua tib zoo tswj tus kheej thiab yus kev cob qhia kom nws thiab pab yaj puavleej loj hlob sab ntsujplig thiab dim txim (nqe 16).
Cov ntseeg Tswv Yexus cheemtsum kawm paub tej yam hais saum no kom totaub hais tias tes haujlwm yug Vajtswv pab yaj ntawm cov xibhwb yog tes haujlwm tau tus Tswv hu tshwjxeeb (Efexus 4:11-13), tau Pawg Ntseeg pom zoo thiab koomhaum xa. Vajtswv cov menyuam txhua tus yuav tsum paub tej kev nyuaj hauv kev ua haujlwm thiab nco ntsoov thov Vajtswv pab kom xibhwb lub neej sab ntsujplig loj hlob thiab ua tib zoo qhuab qhia thiab cob qhia. Timthawj Paulus sau ntawv mus rau cov ntseeg hauv Pawg Ntseeg Kaulauxais hais tias: “Thaum nej thov Vajtswv, nej yuav tsum thov Nws qhib kev rau peb qhia Txojmoo Zoo uas hais txog Yexus Khetos zaj...” (Kaulauxais 4:3). Thaum cov ntseeg thov Vajtswv pab rau xibhwb ces tus Tswv yuav foom koob hmoov rau xibhwb cob qhia kev ntseeg rau cov yaj kom ua tau lub neej raws li Vajtswv Txojlus qhia hauv Phau Vajluskub, ua li no Pawg Ntseeg yuav loj hlob thiab cawm tau ntau leej.
Thov Vajtswv,
Tus Tswv, thov Koj qhia kom nyuam yaus paub hmov tshua txog xibhwb tes haujlwm yug Koj pab yaj thiab thov Koj pab, koom tes kom xibhwb ua tau tes haujlwm Koj muab tiav, ua rau Koj lub Pawg Ntseeg vammeej. Amees.
Peb puas thov Vajtswv pab rau xibhwb tes haujlwm hauv Pawg Ntseeg?
Nyeem Vajluskub hauv peb lub xyoo: Tes Haujlwm 17
Kênh Youtube BHKTHN:
