Klei Aê Diê Blŭ: Y‑Yêrêmi 47:1-7
Êlan kliăng: “Ơ đao gưm Yêhôwa! Dŭm boh sui tơl ih mdei? Brei ih lŏ mŭt hlăm hrŭm ih, mdei leh anăn dôk êđăp ênang bĕ! Si gơ̆ dưi dôk êđăp ênang, tơdah Yêhôwa mtă kơ gơ̆ leh?” (Y‑Yêrêmi 47:6-7a)
Klei êmuh ksiêm mĭn: Dŭm anôk ƀuôn răk anăn hlăm trăn Klei Aê Diê Blŭ anei? Ya klei Yêhôwa Aê Diê bi kmhal phung Philistin? Ya ngă diñu tŭ klei bi kmhal ? Ya klei hriăm diih thâo kơ klei Aê Diê kiă kriê hlăm klei bi kmhal anei ?
Lŏ čuê klei bi kmhal kơ phung Êjip jing klei hưn êlâo kơ phung Philistin, lăn čar ti nah yŭ Kanaan. Lu anôk dưi mñă anăn srăng tŭ klei bi kmhal kjham snăk mơ̆ng Yêhôwa Aê Diê msĕ si Gasa, Tir, Sidôn, plao ksĭ Kaphtôr, Askêlon. Dŭm anôk anei tơdah amâo djŏ jing ƀuôn phung Philistin snăn ăt jing anôk djŏ tuôm kơ mnuih Philistin leh anăn Phênêsi. Hjăn Gasa dưi lač tal êlâo hlăm trăn Klei Aê Diê Blŭ anei jing sa hlăm êma ƀuôn phung Philistin (Y‑Yôsuê 13:3; I Y‑Samuel 6:17), anei jing anôk dôk phung Anakim, sa êpul mnuih prŏng dlông, ktang adôk. Anôk anei khăng dưi lač hlăm klei yăl dliê mơ̆ng Khua phat kđi Y‑Sam son, anôk phung Philistin plah mmiă.
Tơdah tlă anăp hŏng “êa đĭ mơ̆ng dưr”, čiăng lač kơ phung kahan Ƀaƀilôn, snăn “jih jang phung ƀuôn sang dôk hlăm čar srăng čŏk hia” (êlan 2), thâo kơ klei huĭ hyưt giăm truh ƀiădah “…amĭ ama amâo lŏ wĭr dlăng kơ phung anak diñu ôh, kyuadah kngan diñu awăt đei” (êlan 3). Anei klă sĭt jing klei rŭng răng kluôm ala čar. Klei čih lač mơ̆ng Khua pô hưn êlâo Y‑Yêrêmi kơ krĭng anei leh gưl bi kmhal kjham snăk, “…Ƀuôn Gasa kuêh kla kŏ kyua klei kơŭ kyăm, ƀuôn Askêlon dôk ñăt kriêp leh…”
Êlan 6 mâo sa klei êmuh, “Ơ đao gưm Yêhôwa! Dŭm boh sui tơl ih mdei? Brei ih lŏ mŭt hlăm hrŭm ih, mdei leh anăn dôk êđăp ênang bĕ” Leh anăn êlan 7 msĕ si sa klei wĭt lač bi mklă Aê Diê srăng bi sĭt djăp klei Ñu bi kmhal phung Philistin, “Si gơ̆ dưi dôk êđăp ênang, tơdah Yêhôwa mtă kơ gơ̆ leh? Ñu mtă kơ gơ̆ leh brei ngă kơ ƀuôn Askêlon leh anăn kơ čar hang êa ksĭ.”
Amâo djŏ hơăi mang ôh mnuih Philistin tŭ klei bi kmhal kjham snăn ƀiădah kyua phung ƀuôn sang anei ngă leh ƀai hŏng phung ƀuôn sang Israel, ngă jhat kơ phung ƀuôn sang Aê Diê, brei digơ̆ ngă mnă leh anăn čhĭ digơ̆ kơ Êđom, jing klei čih hlăm hdruôm hră Y‑Amôt 1:6-8. Klă sĭt klei Aê Diê ƀuăn leh Ñu srăng mgang phung ƀuôn sang Ñu msĕ si asăr ală Ñu (Klei Mmuñ Hđăp 17:8), klei êđăp ênang kluôm ênŭm Khua Yang brei nanao kơ hlei pô kơup hlăm siam myang Ñu. Hruê anei, drei leh anăn Sang Aê Diê năng ai tlă anăp hŏng lu klei amâo mtăp mđơr, arăng ktư̆ juă, ƀiădah brei dôk kjăp kyua Pô kiă kriê dlông rŏng lăn anei ngă nanao klei kpă ênô hlue si wưng Ñu. Hlăm hruê Khua Yang, grăp čô mnuih, grăp čô mnuih ƀuôn sang ti lăn ala anei klă sĭt srăng tŭ klei bi kmhal kơ klei soh pô.
Ya klei mđĭ ai drei mơ̆ng klei hriăm hruê anei?
Wah lač: Ơ Yêhôwa Aê Diê Pô Mâo Jih Klei Myang! Kâo bi mni kơ Ih kơ klei kriê dlăng, răng mgang Ih brei kơ hlei pô khăp kơ Ih. Akâo kơ Ih đru kâo mdei êđăp ênang hlăm Klei Ih Blŭ ƀuăn leh wăt tơdah ya boh klei srăng tuôm.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 13:42-14:7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
