Yelemis 47:1-7
Nqe cim:
“Nej cia li qw hais tias,‘Tus TSWV rab ntaj! Thaum twg koj mam li tseg tsis tua neeg? Cia li rov mus rau hauv koj lub hnab thiab so! Tiamsis yuav ua li cas rab ntaj thiaj so tau thaum kuv tseem kom nws ua haujlwm?” (Yelemis 47:6-7a).
Lus nug rau sawdaws xav:
– Ntu Vajluskub no hais txog tej thaj tsam teb chaw twg?
– Tus Tswv txoj kev rau txim rau cov Filitees yog dabtsi?
– Ua cas lawv yuav raug rau txim li ntawd?
– Koj kawm tau dab tsi txog Vajtswv lub hwjchim dhau ntawm txoj kev rau txim no?
Tom qab uas cov Iziv raug rau txim tas lawm, txuas ntxiv yog cov Filitees. Filitees yog lub tebchaws uas nyob npuab lub tebchaws Kana-as sab hnub poob. Ntau thaj tsam lossis qhov chaw uas hais txog, yuav raug Vajtswv rau txim hnyav heev rau xwsli: Nkaxas, Tiles, Xidoos, Keletes nyob npuab ntug hiavtxwv thiab Asekeloos. Tej qhov chaws ntawd txawm tsis yog cov Filitees li nroog los kuj muaj kev ntsigtxog cov Filitees thiab cov Faunikias. Nkaxas raug hais npe ua ntej hauv ntu Vajluskub no, vim nws yog cov Filitees ib lub nroog (Yausuas 13:3; I Xamuyees 6:17), uas yog cov neeg Anakees qhov chaw nyob, lawv yog haivneeg uas loj thiab siab uas tseem seem ua neej nyob. Thaj chaws ntawd kuj pheej hais txog hauv zaj xwm ntsisgtxog tus thawj tswj Xaxoos thiab cov Filitees pheej ua tsov ua rog nyob thaj chaw ntawd.
Kev puastsuaj yuav tuaj raug uas yog, “Dej yuav nphau nphwv sab qaumteb tuaj thiab yuav kuav ib yam li dej nyab” yog hais txog Npanpiloos cov tub rog txoj kev rhuav tshem, ces “tej neeg yuav quaj qw thov kev pab” (nqe 2). Paub hais tias kev puastsuaj twb los ze ze lawm “tej niam tej txiv yuav khiav tsis tig saib lawv tej menyuam; lawv tej npab yuav tsaug dai vias” (nqe 3). Txoj kev puastsuaj no yuav los npog nkaus lub teb chaws huv tibsi ua rau txhua tus yuav khiav tsis dim. Tus cev lus Yelemis qhia hais tias, tom qab uas lub teb chaws raug txim tas lawm, pom tej nujnqis uas tseg cia txaus ntshais heev, “cov neeg uas nyob hauv Nkaxas yuav quaj ntsuag, cov neeg uas nyob hauv Asekeloos puastsuaj tas lawm. Cov Filitees yuav quaj ntsuag mus txog thaum twg?”
Nqe 6 tau muab hais ua ib lo lus nug, “Tus TSWV rab ntaj! Thaum twg koj mam li tseg tsis tua neeg? Cia li rov mus rau hauv koj lub hnab thiab so!” Thiab nqe 7 yog ib lo lus teb meej hais tias, Vajtswv yuav ua tiav li Nws tau hais rau cov neeg Filitees lawm hais tias, “Tiamsis yuav ua li cas rab ntaj thiaj so tau thaum kuv tseem kom nws ua haujlwm? Kuv samhwm kom nws tua cov neeg uas nyob hauv lub nroog Asekeloos thiab cov neeg uas nyob raws ntug hiavtxwv”.
Tsis yog cov neeg filitees tsis tau ua txhaum dabtsi, tiamsis Vajtswv cia li rau txim hnyav npaum li ntawd rau lawv. Qhov tseeb vim lawv tau ua phem heev rau Vajtswv haivneeg, quab yuam Vajtswv haiv neeg, ntes lawv mus ua cev qhev thiab muag lawv mus rau cov Edoos, raws li tus cev lus Amaus tau sau tseg lawm (Amaus 1:6-8). Muaj tseeb li Vajtswv tau coglus tseg lawm tiag, Nws yuav tiv thaiv Nws haivneeg ib yam li Nws txuag Nws ob lub qhov muag (Phau Ntawv Nkauj 17:8). Vajtswv txoj kev tiv thaiv zoo kawg nkaus, yog leejtwg nyob hauv Nws lub xubntiag yuav nyob tso siab plhuav. Niaj hnub nimno peb cov uas yog Vajtswv pawg ntseeg yuav ntsib ntau yam kev sim siab; raug ua tsis ncaj ncees, raug quab yuam, thiab raug saib tsis taus, tiamsis peb cia li ruaj siab rau Vajtswv, vim Nws yog tus uas muaj hwjchim tswj tas nrho lub ntiajteb no thiab Nws yuav txiav txim ncaj ncees raws li lub sijhawm uas Nws teem tseg lawm. Hnub uas Vajtswv txiav txim txhua tus tibneeg, txhua haiv neeg nyias yuav raug txim raws li nyias tau ua los lawm.
Thov Vajtswv
Thov fwm Vajtswv Tus uas muaj Hwjchim loj kawg nkaus! Nyuam yaus ua Koj tsaug rau Koj txoj kev saib xyuas, tiv thaiv txhua tus uas fwm Koj. Txawm yog ntsib kev txomnyem lossis tau zoo, thov pab nyuam yaus ua neej nyob tso siab plhuav rau hauv Koj tej lus cogtseg. Amees
Dhau zaj kawm hnub no, peb txais tau kev txhawb zog li cas?
Nyeem Vajluskub hauv peb lub xyoos: Tes Haujlwm 13:42-14:7.
Kênh Youtube BHKTHN:
