Klei Aê Diê Blŭ: Klei Mphŭn Dơ̆ng 2:8-17
Êlan kliăng : “Khua Yang Aê Diê dưm êkei anăn hlăm war djam Êđen brei ñu mkra leh anăn kiă kriê.” (Klei Mphŭn Dơ̆ng 2:15)
Klei êmuh ksiêm mĭn: Ya Aê Diê dưm Y‑Ađam hlăm war djam Êđen pioh ngă? Ya klei čiăng lač “Mkra leh anăn kiă kriê”? Jing sa čô pô kiă kơ Khua Yang, si hdră êlan brei drei kiă kriê ngăn dŏ Khua Yang jao?
Klei Mphŭn Dơ̆ng kdrêč 1 čih yăl dliê kơ bruă Aê Diê hrih mjing êngĭt adiê lăn ala leh anăn jih jang mnơ̆ng, êdei tinăn Aê Diê hrih mnuih hŏng bruă kñăm brei mnuih kiă kriê jih jang mnơ̆ng Aê Diê hrih mjing, yua leh anăn dưn boh tŭ jing mơ̆ng bruă kiă kriê. Hlăm kdrêč 2 mơ̆ng êlan 8 čih hưn klei Aê Diê hrih mjing war djam Êđen siam tloh ênoh hŏng lu mta ana kyâo siam dlăng leh anăn ƀơ̆ng jăk, mâo êa krông đoh bi ktlah jing pă bĭt hnoh jum war djam čiăng bi msah ana kyâo rơ̆k tơ̆k. hlăm war djam mâo anôk mâo mah, boh tâo yuôm guh mngač ƀlêč ƀlir. Sĭt nik anei jing sa anôk war djam jăk siam êdimi. Tơdah mprăp leh jih jang djăp mta mnơ̆ng dhơ̆ng, Aê Diê ba Y‑Ađam, êkei tal êlâo hĭn Aê Diê hrih mjing, dưm hlăm war djam Êđen pioh “mkra leh anăn kiă kriê”. Hlăm klei blŭ phŭn Hêbrơ, boh blŭ “mkra” (שׁמר shāmar) mblang jing “ksiêm dlăng, răng mgang leh anăn kiă kriê”. Klei kñăm Aê Diê dưm Y‑Ađam hlăm war Êđen čiăng pioh kiă kriê war djam, čiăng kơ ana boh kroh mboh lu. Anăn yơh jing bruă klam leh anăn bruă sa čô pô kiă kriê, brei kiă kriê bi jăk sĭt suôr jih ngăn dŏ khua jao leh anăn lŏ ba lu boh mnga hĭn kơ khua.
Kčưm mơ̆ng hruê mphŭn dơ̆ng, Aê Diê jao leh bruă klam kiă kriê kơ mnuih leh anăn Aê Diê čiăng kơ mnuih ngă bi jăk sĭt suôr bruă kiă kriê, răng mgang, yua mnơ̆ng hŏng klei thâo mĭn leh anăn lŏ bi mđĭ boh mnga lu hĭn mnơ̆ng kiă kriê. Jih jang mnơ̆ng ti lăn ala jing dŏ Aê Diê sơăi, Aê Diê jing Khua kơ jih jang mnơ̆ng hlăm adiê leh anăn ti lăn ala (Klei Mmuñ Hđăp 24:1; Kôlôs 1:16-17). Ƀiădah Aê Diê jao bruă kiă kriê kơ mnuih. Kyuanăn, brei anak mnuih thâo săng klă bruă yuôm Aê Diê jao leh anăn bi leh bruă klam kiă kriê. Truh hruê Khua Yang lŏ hriê, grăp čô srăng hưn mdah bruă klam kiă kriê Aê Diê jao kơ drei (Y‑Mathiơ 25:23-29).
Hruê anei, grăp čô phung đăo kơ Krist mâo sơăi bruă klam Aê Diê jao brei kiă kriê jih jang mnơ̆ng Aê Diê brei, hlăm anăn mâo prăk kăk, ngăn drăp gŏ sang drei pô. Brei drei knang kơ Khua Yang čiăng thâo kiă kriê jăk jih jang mnơ̆ng Aê Diê jao djŏ tui si hdră êlan Klei Aê Diê Blŭ mtô mtă. Jing sa čô pô kiă ngăn kơ Khua Yang, brei drei pô mbĭt hŏng phung hlăm sang drei gưt ngă klei Khua drei mtă leh anăn ngă bi jăk bruă klam Khua drei jao. Mta phŭn yuôm amâo djŏ ôh kyua klei ƀun ƀin amâodah mdrŏng sah, amâo djŏ ôh dŭm lu drei mkăm pioh ƀiădah Khua Yang čiăng kơ drei thâo kiă kriê ngăn drăp drei bi djŏ tui si hdră êlan Aê Diê, yua bi djŏ leh anăn hŏng klei thâo mĭn jih jang mnơ̆ng Aê Diê jao brei. Thâo kiă kriê jăk đru kơ drei pô leh anăn phung hlăm sang drei dưi dưn boh mnga tŭ jing Aê Diê brei wăt dưi bi mguôp mbĭt hlăm bruă mkŏ mjing leh anăn bi mđĭ ƀuôn ala mtao Aê Diê ti lăn ala anei hlăm klei myơr hŏng klei kmah ngăn dŏ drei dôk kiă kriê.
Si ngă drei ngă bi leh mơ̆ bruă klam kiă kriê Aê Diê jao kơ drei hlăm klei kiă kriê ngăn dŏ gŏ sang drei?
Wah lač: Ơ Khua Yang, akâo Ih đru kâo leh anăn phung hlăm sang kâo hdơr nanao jih jang ngăn drăp hmei mâo jing dŏ Khua Yang sơăi, leh anăn hmei knŏng jing pô kiă kriê dŏ Khua Yang. Akâo kơ Khua Yang đru kâo bi leh bruă jao kiă kriê ngăn dŏ Khua Yang jao.
Dlăng Klei Aê Diê Blŭ hlăm tlâo thŭn: Y‑Yôhan 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
