Chivkeeb 2:8-17
Nqe cim:
“Ces tus TSWV uas yog Vajtswv coj tus txivneej uas nws tsim los nyob hauv lub Vaj Edees, kom nws zov thiab tu lub vaj ntawd” (Chivkeeb 2:15).
Lus nug rau sawvdaws xav:
– Vajtswv tso Adas nyob hauv lub vaj Edees ua dabtsi?
– “Zov thiab tu lub vaj” muaj lub ntsiab licas?
– Yog ib tug saib xyuas qhov txhia chaw rau tus Tswv, peb yuav saib xyuas tej uas tus Tswv muab cob zoo li cas?
Chivkeeb tshooj 1 sau txog Vajtswv tsim lub ntuj, lub ntiajteb thiab ib puas tsav yam. Tom qab ntawd, Vajtswv mam li tsim tibneeg. Lub homphiaj yog cia tibneeg kav tas nrho ib puas tsav yam uas Vajtswv tsim thiab tibneeg muaj cai siv txhua yam uas lawv kav ntawd. Nyob hauv Chivkeeb 2:8 mus qhia hais tias, Vajtswv tsim muaj ib lub hu ua vaj Edees thiab nyob hauv muaj ntau yam ntoo zoo nkauj ntxim nyiam thiab tej txiv qab kawg li, muaj ib tug dej txhawv hauv lub vaj Edees ncau faib ua plaub ceg, ntws mus thoob plaws lub vaj thiab ywg txhua yam ntoo hauv lub vaj ntawd. Hauv lub vaj ntawd tseem muaj tej tseem kub, muaj tej roj ntoo tsw qab, muaj tej hlaws muaj nqis thiab yog lub vaj Edees uas zoo nkauj tiag tiag. Tom qab uas Vajtswv tsim txhua yam tiav tas lawm, Vajtswv mam li tsim Adas thiab coj thawj tus txivneej uas Vajtswv tsim mus nyob rau hauv lub vaj Edees, “zov thiab tu lub vaj”. Lo lus “Zov thiab tu” hauv lus Henplais “שׁמר shāmar” (sama) muaj lub ntsiab hais tias “saib xyuas, tiv thaiv thiab tu”. Lub homphiaj uas Vajtswv tso Adas nyob rau hauv lub vaj Edees yog kom nws tu lub vaj thiab ua kom tej txiv ntoo tawg paj txi txiv huam vam ntxiv mus. Qhov ntawd yog lub nra ntawm tus uas zov thiab tu, yuavtsum saib xyuas kom zoo tej cuabtam uas tus Tswv cob rau thiab ua kom tau paj lim rau tus Tswv.
Thaum chivkeeb, Vajtswv twb muab tes haujlwm uas saib xyuas ib puas tsav yam rau tibneeg lawm thiab Vajtswv xav kom tibneeg ua tes haujlwm ntawd kom zoo, ntse ntsuav rau txoj kev siv thiab ua kom tau paj lim ntxiv ntau ntxiv. Lub ntiajteb thiab txhua yam uas nyob rau hauv lub ntiajteb puavleej yog Vajtswv li thiab Vajtswv yog tus Tswv ntawm ib puas tsav yam no (Ntawv Nkauj 24:1; Kaulauxais 1:16-17). Tiamsis Vajtswv muab cob lub nra rau tibneeg ua cov saib xyuas tej uas Nws tsim tim ntsej tim muag ntawm Vajtswv. Vim li ntawd, tibneeg yuavtsum zeem paub tes haujlwm tseemceeb uas Vajtswv muab cob thiab ua kom tiav lub nra ntawd. Txog hnub tus Tswv Yexus rov qab los, txhua tus nyias yuavtsum piav nyias tes haujlwm rau tus Tswv (Ma-thi-ơ 25:23-29).
Niaj hnub nimno, peb txhua tus ntseeg yeej tau Vajtswv muab tes haujlwm saib xyuas txhua yam uas Vajtswv tsim, tej ntawd muaj peb tej nyiaj txiag thiab tej khoom qhov txhia chaw hauv lub cuabyig. Yog ib tug uas saib xyuas tej qhov txhia chaw rau tus Tswv, peb thiab peb tsev neeg yuavtsum ua raws li tus Tswv hais, ua tes haujlwm uas tus Tswv muab cob kom zoo. Qhov tseemceeb tsis yog peb npluanuj lossis pluag, muaj ntau lossis muaj tsawg, tiamsis yam uas Vajtswv xav tau yog kom peb txawj saib xyuas thiab siv yam uas Vajtswv muab cob rau peb mus raws li Vajtswv tus cai xwb. Yog peb tswj tau peb tej nyiaj txiag thiab tej qhov txhia chaw zoo, tsis yog peb tau txais koob hmoov xwb, peb tseem muaj feem fij mus ua Vajtswv haujlwm kom nthuav dav Vajtswv lub Tebchaws nyob rau hauv lub ntiajteb no thiab.
Thov Vajtswv
Vajtswv, thov pab nyuam yaus thiab tsev neeg nco ntsoov hais tias tej qhov txhia chaw uas peb tsev neeg tseem tabtom muaj puavleej yog Koj tug thiab nyuam yaus tsuas yog tus saib xyuas rau Koj xwb. Thov pab nyuam yaus ua tau tiav tes haulwm tswj tej cuabtam uas Koj muab cob rau nyuam yaus. Amees!
Peb ua tes haujlwm saib xyuas txhua yam hauv peb lub cuabyig li cas?
Nyeem Vajluskub hauv peb lub xyoos: Yauhas 17.
Kênh Youtube BHKTHN:
