Klei Aê Diê Blŭ: I Y‑Timôthê 6:6-10
Êlan kliăng: “Hlei pô khăp kơ prăk amâo srăng hrăp hŏng prăk ôh, kăn pô khăp kơ klei mdrŏng srăng hrăp hŏng klei čăt đĭ rei; klei anăn msĕ mơh jing klei hơăi mang.” (Khua Pô Mtô 5:10)
Klei êmuh ksiêm mĭn: Si khua ƀĭng kna Y‑Pôl mtă mtăn kơ Y‑Timôthê klei kơ prăk? Ya jing boh jhat mơ̆ng klei khăp kơ prăk? Si knhuah hŏng prăk brei phung anak Aê Diê bi mâo?
Anak mnuih dôk hdĭp ti rŏng lăn ala khăng lĕ hlăm klei mơ̆ng prăk kăk bi mmăt ală mta leh anăn ngă lu klei soh wê. Mơ̆ng đưm truh kơ ară anei, klei khăp kơ prăk amâo tuôm mdei ôh ti lăn ala anei. Kyuanăn, tơdah čih hră mơĭt kơ Y‑Timôthê, khua ƀĭng kna Y‑Pôl amâo wơr bĭt ôh mtă mtăn klei kơ prăk kăk. Kčưm dơ̆ng ñu lač klă: “Mâo lu klei tŭ dưn mơ̆ng klei mpŭ kơ Aê Diê mbĭt hŏng ai tiê mơak” (êlan 6). Phung ƀĭng kna Khua Yang mâo klei hdĭp mpŭ kơ Aê Diê mbĭt hŏng ai tiê mơak srăng mă tŭ klei tŭ dưn hlăm mngăt prŏng snăk, kyuadah diñu amâo kpăk gun kyua prăk kăk ngăn drăp ôh. Hdĭp mơak hŏng ya mnơ̆ng mâo jing sa mta êa drao tloh ênoh pioh mdrao klei ruă knan knăk. Khua ƀĭng kna Y‑Pôl mblang snei, drei hriê ti lăn ala anei dua kngan hŏng, wăt tơdah jih klei hdĭp mkăm pioh ngăn drăp dưn, hruê lui lăn ala ăt kăn dưi ba mbĭt ya mta mnơ̆ng rei. Kyuanăn, brei drei mơak hŏng ya mta mnơ̆ng Aê Diê brei kơ drei grăp hruê (êlan 7-8). Hdĭp mơak hŏng mnơ̆ng Aê Diê brei, drei amâo srăng tui tiŏ mnơ̆ng mnuă čiăng bi hrăp klei tluh leh anăn amâo srăng lĕ hlăm klei mplư ôh.
Khua ƀĭng kna Y‑Pôl mñă mơh snei, klei mplư leh anăn kđông ƀêč kăp dôk lua mă hlei pô tluh kơ mnơ̆ng mnuă, khăp čiăng klei mdrŏng sah, kăp bi dluh kram pô anăn hlăm klei rai luč (êlan 9). Prăk kăp jing mta mnơ̆ng pioh yua kơ klei hdĭp kyuanăn amâo jhat ôh, ƀiădah knŏng klei khăp kơ prăk yơh jing klei jhat, kyuadah ñu jing “agha kơ jih jang klei jhat” (êlan 10). Lu mnuih kyuadah klei khăp kơ prăk, duah djăp hdră êlan tui tiŏ leh anăn lui wir klei đăo (Y‑Markôs 10:23-25). Khua Yang Yêsu mtô leh amâo dưi ôh wăt khăp kơ Aê Diê wăt khăp kơ prăk (Y‑Mathiơ 6:24-25). Mtao Y‑Salômôn brei thâo msĕ mơh, hlei pô khăp kơ prăk amâo tuôm thâo hrăp kơ prăk ôh, diñu čiăng mâo lu hĭn lŏ lu hĭn nanao, ti knhal tuč jih jang klei ăt jih hơăi mang sơăi (Khua Pô Mtô 5:10).
Drei yua prăk pioh mă bruă kơ klei hdĭp drei, klei anăn amâo jing soh ôh, ƀiădah dưm brei prăk gĭt gai klei hdĭp drei yơh atăt kơ klei huĭ hyưt leh anăn klei jhat. Phung đăo kơ Krist brei djă pioh snei, prăk leh anăn ngăn drăp jing mnơ̆ng Aê Diê jao brei drei kiă kriê msĕ si mnơ̆ng yua pioh mă bruă kơ drei leh anăn pioh ba klei guh kơang kơ Aê Diê. Si knhuah drei hŏng prăk ăt snăn mơh drei čuăn kơ hdră êlan drei kiă kriê leh anăn yua prăk. Brei drei hdơr, drei knŏng jing dĭng buăl kiă kriê kơ Aê Diê, đăm khăp kơ prăk čiăng mkăm pioh kơ pô ôh. Brei drei mơak hŏng mnơ̆ng Aê Diê brei leh anăn mâo knhuah hdĭp djŏ hŏng klei yua prăk snăn kơh drei dưi mâo lu klei tŭ dưn prŏng mơ̆ng Aê Diê brei.
Si ngă drei dôk dlăng kơ prăk msĕ si khua drei amâodah dĭng buăl kơ drei? Si ngă čiăng drei dôk răng kơ klei “khăp kơ prăk”?
Wah lač: Ơ Khua Yang, akâo kơ Ih mñă brei kâo hdơr nanao, klei khăp kơ prăk jing agha kơ jih jang klei jhat. Akâo Khua Yang đru kâo hdĭp mơak hŏng ya mta mnơ̆ng Khua Yang brei, leh anăn sĭt suôr hŏng bruă jao ti anăp Khua Yang.
Dlăng Klei Aê Diê Blŭ hlăm tlâo thŭn: Y‑Yôhan 16:5-33
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
