II Xwmtxheej 20:33-37
Nqe cim:
“Tsis muaj leejtwg yuav ua qhev tau rau ob tug lospav, rau qhov nws yeej yuav ntxub ib tug nyiam ib tug, lossis yuav npuab ib tug saib tsis taus ib tug. Nej yuav ua Vajtswv li qhev thiab ua nyiaj txiag li qhev ua ke tsis tau” (Mathais 6:24).
Lus nug rau sawvdaws xav:
– Keebkwm sau txog ob tes haujlwm txhaum twg ntawm Vajntxwv Yehausafas ua tsuas kis rau nws cov menyuam thiab tej pejxeem?
– Thaum kawg raug yam dabtsi?
– Tus qauv phem no ceebtoom peb lub neej uas ntseeg tus Tswv licas?
Keebkwm sau txog Vajntxwv Yehausafas hais tias nws yog neeg zoo, ua qauv zoo ntau yam rau lwm tus, tiamsis, keebkwm kuj sau txog tej yam tsis tau zoo ntawm vajntxwv thiab. Nyob hauv lub neej, vajntxwv tau rhuav tej chaw teev dab thiab tus mlom Aselas tawm hauv tebchaws Yudas mus (II Xwmtxheej 17:6; 19:3) tiamsis nws tsis tshem tas, ua rau cov pejxeem tsis tas siab tig los pehawm tus Tswv uas yog lawv cov yawgkoob tus Vajtswv (nqe 33).
Tsis tas li ntawd xwb, thaum tau tus Tswv pub rau vammeej lawm, vim ntshaw kev npluanuj heev, Vajntxwv Yehausafas thiaj ua phoojywg zoo nrog Vajntxwv Ahaxiyas uas yog cov Yixalayees ib tug vajntxwv phem, sib koom tes txua nkoj mus ua luam kub tim Aufiles. Nyob hauv I Vajntxwv 22:48 tau sau tseg hais tias: “Yehausafas txua tau ib co nkoj rau hauv hiavtxwv, siv mus thauj kub tim tebchaws Aufiles; tiamsis cov nkoj ntawd tawg tas rau hauv Exi-oonkenpes lawm, mas lawv yeej tsis tau tsav cov nkoj ntawd li.” Tes haujlwm no tsis haum Vajtswv siab, Nws thiaj txib Tus cevlus Eli-exes tuaj ceebtoom, thiab thaum kawg tus Tswv ua rau vajntxwv tes haujlwm puastsuaj, vajntxwv cov nkoj raug tawg, kev ua lag ua luam thiaj tu lawm (nqe 37).
Qhov uas Vajntxwv Yehausafas rhuav tshem tej chaw teev dab tsis tas, ua rau cov pejxeem ib ke pehawm Vajtswv ib ke pehawm tej mlom. Vajntxwv tus kheej, tej zaum tsis mus pe mlom saum tej roob siab tiamsis nws ho cia tej kub Aufiles ua nws tus mlom. Tsis yog tsuas koom tes nrog tus vajntxwv phem Ahaxiyas ua luam kub xwb, nws tseem rhawv kev neej tsa nrog Vajntxwv Ahaj, uas yog ib tug vajntxwv phem tshajplaws hauv keebkwm cov Yixalayees thiab. Thaum Vajntxwv Axas ua lub neej raws li Vajtswv Txojlus qhia ces nws ua tau tus qauv zoo rau Vajntxwv Yehausafas thiab sawvdaws xyaum hauv cov xyoo thawj, tiamsis txog thaum vammeej lawm ces lub neej pib nqis hav, vajntxwv tus qauv phem ua tsuas kis lwm phaum neeg, nws tus tub hlob Yehaulas sawv hloov nws chaw dhau los ua ib tug vajntxwv phem.
Tswv Yexus qhia hais tias: “Tsis muaj leejtwg yuav ua qhev tau rau ob tug lospav, rau qhov nws yeej yuav ntxub ib tug nyiam ib tug, lossis yuav npuab ib tug saib tsis taus ib tug. Nej yuav ua Vajtswv li qhev thiab ua nyiaj txiag li qhev ua ke tsis tau” (Mathais 6:24). Tibneeg muaj kev txhaum lub neej thiaj tsis zoo txaus. Tsuas yog thaum peb fij tus kheej rau Vajtswv, tas siab tas ntsws hwm Nws, ua raws Vajtswv Txojlus qhia ces peb thiab peb tej xeebntxwv lub neej thiaj tau koob hmoov. Vajntxwv Yehausafas tus qauv tsis zoo ceebtoom peb tsis txhob ua neej sawv nruab nrab ntawm ua zoo thiab ua phem, los ntawm txiav txim siab tsis ua qhev rau ob tug tswv.
Thov Vajtswv
Tus Tswv, thov zam txim rau nyuam yaus vim nyob hauv ntiajteb kev dag ntxias nyuam yaus yooj yim poob mus rau kev ua qhev rau ob tug tswv. Thov kom Vajntxwv Yehausafas lub neej ceebtoom nyuam yaus txiav txim siab nrog Koj mus thiab ua qauv zoo rau tej menyuam xyaum. Amees.
Peb yuav tsum ua lub neej licas thiaj tsis poob rau kev ua qhev rau ob tug tswv?
Nyeem Vajluskub hauv peb lub xyoos: Yauhas 6:25-71
Kênh Youtube BHKTHN:
