Klei Aê Diê Blŭ: Klei Mtô Mñă Klei Bhiăn 22:9-22
Êlan kliăng:“Lăn čăt ana kyâo mtâo, rơ̆k mâo mjeh tui si mta diñu, leh anăn ana kyâo mboh mâo mjeh tui si mta diñu. Aê Diê ƀuh klei anăn jing jăk.” (Klei Mphŭn Dơ̆ng 1:12).
Klei êmuh ksiêm mĭn: Ti êlan hdră brei phung Israel ngă djŏ tơdah mŭt dôk hlăm čar Kanaan? Ya ngă Aê Diê kăm amâo brei phung ƀuôn sang Ñu ngă ôh klei anei? Si Aê Diê čiăng phung ƀuôn sang Ñu hdĭp ti krah phung ka thâo kral Ñu ôh?
Trăn Klei Aê Diê Blŭ hruê anei čih kơ pă mta klei bhiăn mdê mdê. Dua klei bhiăn djŏ kơ klei buh pla leh anăn klei yua ai hlô mnơ̆ng rông (êlan 9-10), dua klei bhiăn adôk lač djŏ kơ klei mñam čhiăm ao leh anăn drăp čŭt hơô (êlan 11-12). Năng ai drei dleh thâo săng kơ lu mta klei bhiăn čêč kdrêč mơ̆ng Aê Diê djŏ kơ djăp mta kdrêč đơ điêt hlăm klei hdĭp. Ƀiădah brei drei thâo, phung Israel hiu rưng leh hlăm kdrăn tač pă pluh thŭn, kyuanăn klei mŭt dôk hlăm Lăn Aê Diê Ƀuăn jing amâo mưng ôh hŏng ênuk phung hđeh. Digơ̆ amâo mâo klei bi knal ôh hlăm klei buh pla leh anăn yua hlô mnơ̆ng rông đru hlăm bruă pưk hma. Tơdah phung ƀuôn sang Aê Diê ka mưng ôh hŏng klei hdĭp mrâo, sĭt nik digơ̆ srăng ksiêm dlăng leh anăn tui ngă si phung găp djuê riêng gah rông, pla leh anăn mñam. Ƀiădah jih jang bruă phung tue ngă amâo tuôm bi mơak kơ Aê Diê, amâo djŏ pruê̆ êlan tui si klei Aê Diê hrih mjing ôh.
Drei ƀuh anôk msĕ mơ̆ng klei Aê Diê kăm tinei jing amâo dưi bi mguôp amâodah bi lŭk dua mta mdê mdê mbĭt ôh. Hlăm hdruôm hră Klei Mphŭn Dơ̆ng kdrêč sa, tơdah Aê Diê mjing rơ̆k tơ̆k, kyâo mtâo amâodah hlô mnơ̆ng êbat êban, jih jang bi mbha tui si djuê sơăi, amâo mâo klei bi lŭk ôh. Ƀai hĭn, klei bi lŭk anei ƀiă lu djŏ tuôm hŏng klei bhiăn kkuh mpŭ hlăm klei đăo phung tue, boh nik nak čar Êjip. Kyuanăn Aê Diê kăm phung ƀuôn sang Ñu amâo dưi tui phung tue ôh, ƀiădah brei digơ̆ jing mdê hlăm klei hdĭp grăp hruê hŏng klei djă pioh klei djŏ pruê̆ hlăm klei Aê Diê hrih mjing leh mơ̆ng hruê mphŭn dơ̆ng.
Hruê anei, mâo lu mnuih lač klei yua klei knhâo kơ bruă buh pla ênuk anei đĭ kyar hĭn kơ ênuk mphŭn dô, sa klei bi hmô klă kơ klei anăn jing, anak mnuih yua klei knhâo bi mlih gen mjing boh amâo mâo asăr, boh mmih amâo mâo msăm, amâodah mboh boh prŏng hĭn kơ boh hlăk ka bi mlih gen ôh. Ƀiădah lĕ, anei jing klei bi rai klei djŏ pruê̆ Aê Diê pô mjing leh. Kyuadah bruă knhâo knhăk bi klă leh djăp mta boh kroh, êtak êbai, djam rơ̆k bi mlih gen amâo jăk sơăi hŏng klei suaih pral anak mnuih, tăp năng bi truh klei ruă mơh. Mâo lu bruă mĭndah msĕ si klei đĭ kyar leh anăn thâo mĭn hĭn tơdah anak mnuih ngă bi mklăk hŏng pruê̆ êlan Aê Diê mjing leh, ƀiădah boh sĭt gơ̆ anak mnuih dôk bi rai diñu pô hŏng klei đĭ kyar bŏ hŏng klei soh anăn. Brei phung đăo ngă jih jang klei kyua čiăng bi guh kơang kơ Aê Diê (I Kôrantô 10:31).
Drei ƀuh si Pô Aê Diê jing găn hŏng klei Ñu kruak čua?
Wah lač: Ơ Aê Diê! Pô hrih mjing jih jang mnơ̆ng. Đru kâo thâo êlan djă pioh klei djŏ pruê̆ hlăm lăn adiê tui si Ih pô hrih mjing leh, kyuadah anei jing klei Ih čiăng leh anăn jing klei jăk kơ kâo.
Dlăng Klei Aê Diê Blŭ hlăm tlâo thŭn: Y‑Luk 23:26-24:12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
