II Kevcai 22:9-12
Nqe cim:
“Yog li ntawd, lub ntiajteb thiaj muaj txhua yam xyoob ntoo nroj tsuag, thiab qoobloo uas txawj tawg paj txi txiv, Vajtswv pom tej uas nws tsim tau los ntawd, mas nws txaus siab heev” (Chivkeeb 1:12).
Lus nug rau sawvdaws xav:
– Muaj txojcai twg rau cov Yixalayees yuav tsum ua raws thaum mus nyob hauv tebchaws Kana-as?
– Vim licas Vajtswv txwv Nws haivneeg ua tej yam no?
– Vajtswv xav kom Nws haivneeg yuav tsum ua lub neej licas nrog cov tsis tau ntseeg?
Ntu Vajluskub hnub no hais tawm plaub txojcai sib txawv. Ob txojcai ntsistxog kev cog qoobloo thiab kev siv tej tsiaj lub zog (nqe 9-10), ob txojcai txuas ntxiv hais txog kev ntos xov thiab kev hnav tsoos tsho (nqe 11-12). Tej zaum peb hnov nyuaj totaub tus Tswv tej kevcai meej ntxaws txog txhua yam me me hauv lub neej. Tiamsis peb yuav tsum totaub cov Yixalayees muaj 40 lub xyoo nyob hauv tiaj suab puam, yog li ntawd thaum mus nyob hauv Tebchaws Coglus Tseg yuav muaj ntau yam txawv txawv rau phaum neeg tshiab. Lawv tsis tau paub cog qoobloo, tsis tau paub siv tej tsiaj los pab ua liaj ua teb. Thaum tus Tswv haivneeg tseem tsis tau paub pib lub neej tshiab, paub tseeb hais tias lawv yuav mus saib thiab kawm lwm haivneeg ibncig tej tswvyim yug tsiaj, cog qoobloo, ntos ntaub xov. Tiamsis tej uas lwm haivneeg ua ibtxwm tsis haum tus Tswv siab, tsis ua raws txojcai uas tus Tswv teeb tseg.
Nyob ntawm no, peb pom qhov sib thooj ntawm tej yam uas tus Tswv txwv, ntawd yog tsis pub muab ob yam sib txawv los sib xyaws ua ke. Nyob hauv Chivkeeb tshooj thawj, thaum tus Tswv tsim tej xyoob ntoo thiab tsiaj txhu, txhua yam puavleej cais nyias muaj nyias yam, tsis muaj kev sib xyaws sib tov. Tshaj ntawd, tej kev sib xyaws no ntau tsawg kuj ntsistxog tej kevcai uas lwm haivneeg ua thaum pehawm lawv tej vajtswv, tshwjxeeb yog cov Iziv. Yog li ntawd, tus Tswv thiaj txwv Nws haivneeg tsis pub kawm xyaum tej haivneeg ibncig, tiamsis yuav tsum muaj kev sib txawv hauv kev ua neej txhua hnub los ntawm qhov uas tswj raws li txojcai tus Tswv teeb tseg thaum tsim ntuj tsim teb los.
Nimno, coob leej hais tias kev siv txuj los ua liaj ua teb zoo tshaj tiam thaum ub lawm. Ib qhov pivtxwv tshwjxeeb yog tibneeg siv txuj los hloov tej noob qoobloo (lossis gen) hauv kev cog qoobloo kom tau tej txiv ntoo tsis muaj noob, tsuas qab xwb tsis qaub, lossis tej txiv loj dua li ibtxwm… Tiamsis ntawm no yog ib tes haujlwm rhuav txojcai tus Tswv teeb tseg. Vim kev ntsuam xyuas ntawm sab ua qoobloo tau tawm lus hais tias, tej txiv ntoo, tej noob lossis tej zaub uas siv txuj los hloov gen puavleej tsis zoo rau tibneeg lubcev, tseem ua rau muaj kev mob kev nkeeg thiab. Muaj tej yam saib cuag li yog tibneeg kev vammeej thiab yog lub tswvyim uas zoo heev rau kev ua neej tiamsis tsis mus raws li txojcai uas tus Tswv teeb tseg, ces tabtom ua rau tus kheej thiab tibneeg raug kev puastsuaj los ntawm tej txujci yuamkev ntawd. Tus ntseeg Vajtswv lawm yuav tsum ua txhua yam rau tus Tswv tau koob meej (I Kauleethaus 10:31).
Thov Vajtswv
Tus Tswv uas tsim ib puas tsavyam. Thov qhia nyuam yaus paub tswj raws txojcai rau txhua yam uas Koj tsim los, vim ntawd yog yam uas Koj ntshaw thiab zoo rau nyuam yaus. Amees.
Peb saib pom tus Tswv yog tus zoo licas dhau ntawm tej txojcai uas Nws muab rau peb?
Nyeem Vajluskub hauv peb lub xyoos: Lukas 23:26-24:12
Kênh Youtube BHKTHN:
