Klei Aê Diê Blŭ: Hêbrơ 9:1-10
Êlan kliăng:“Wăt klei bi mguôp tal êlâo mâo klei bhiăn kơ klei kkuh mpŭ leh anăn adŭ doh jăk ti lăn ala… Klei anăn jing rup bi hmô kơ ênuk anei” (Hêbrơ 9:1, 9a)
Klei êmuh ksiêm mĭn: Ya jing bruă yua kơ sang čhiăm hlăm klei phung Yuđa kkuh mpŭ kơ Aê Diê? Ya mnơ̆ng mâo hlăm sang čhiăm leh anăn ya mnơ̆ng anăn djŏ tuôm hŏng phung đăo kơ Krist hruê anei?
Mâo sa cô pô hriăm êlam kơ Klei Aê Diê Blŭ ƀuh mâo sa kdrêč điêt jăk êdimima, kdrêč điêt anăn jing, Hdruôm Hră Klei Aê Diê Blŭ knŏng yua 2 kdrêč pioh čih yăl dliê kơ klei hrih mjing ƀiădah yua 50 kdrêč blŭ djŏ kơ Sang čhiăm. Klei anăn brei ƀuh boh yuôm mơ̆ng Sang čhiăm hlăm klei phung Yuđa kkuh mpŭ kơ Aê Diê. Hlăk ngă klei bi mguôp hŏng phung ƀuôn sang Israel, Aê Diê mtă kơ Y‑Môis brei ngă Sang čhiăm, “Brei diñu ngă kơ Kâo sa anôk doh jăk, čiăng kơ Kâo dưi dôk ti krah diñu” (Klei Kbiă 25:8). Pô čih hră mơĭt kơ phung Hêbrơ lŏ mñă kơ phung dlăng hră ñu mơĭt anei thâo kơ kdrêč đơ điêt mâo hlăm Sang čhiăm hŏng klei ksiêm blŭ snei, “Klei anăn jing rup bi hmô kơ ênuk anei” (Hêbrơ 9:9a).
Hlăm Sang čhiăm mâo dua boh adŭ, Adŭ Doh Jăk leh anăn Adŭ Doh Jăk Hĭn. Hlăm Adŭ Doh Jăk mâo jơ̆ng diăn mâo kjuh ƀĕ adhan amâo tuôm kƀah êa prăi ôh kyuadah knŏng jơ̆ng diăn anăn yơh jing klei mngač hlăm Sang čhiăm. Leh anăn mâo “jhưng leh anăn kpŭng myơr kơ Aê Diê”, mơ̆ng kpŭng anăn arăng ăm 12 klŏ ƀêñ bi ala kơ 12 găp djuê phung ƀuôn sang Israel. Bêñ anăn arăng srăng bi mlih mrâo nanao hlăm grăp hruê Sabat, ƀêñ hđăp srăng ngă mnơ̆ng ƀơ̆ng kơ phung khua ngă yang. Ti anăp čhiăm păng bi kgăn Adŭ Doh Jăk hŏng Adŭ Doh Jăk Hĭn mâo knưl čuh mnơ̆ng ƀâo mngưi. Hlăm Hruê Bi Doh Klei Soh, Khua Ngă Yang Prŏng srăng yua mnơ̆ng ƀâo mngưi anôk anei čiăng čuh ti dlông kđhăp klei pap brei ti dlông Hip Klei Bi Mguôp.
Hlăm Adŭ Doh Jăk Hĭn arăng dưm Hip Klei Bi Mguôp, hlăm lam hip anăn mâo sa boh čeh dưm kpŭng mana čiăng bi hdơr kơ phung ƀuôn sang Israel kơ klei Aê Diê čiêm leh digơ̆, giê dra Y‑Arôn bi mnga čiăng bi êdah kơ klei Aê Diê ruah leh Y‑Arôn leh anăn phung anak êkei gơ̆ jing Khua Ngă Yang Prŏng, leh anăn mdhă boh tâo klei bi mguôp čiăng mñă kơ klei gưt kơ klei bhiăn. Kđhăp Hip Klei Bi Mguôp pia jing kđhăp klei pap brei, guôm hŏng siap dua Čêrubim, bi ala kơ jhưng mtao Aê Diê ti lăn ala.
Sang čhiăm leh anăn jih jang mnơ̆ng lač ti dlông anăn yuôm bhăn snăk, jing anôk phung ƀuôn sang Israel bi tuôm hŏng Aê Diê. Ƀiădah lĕ, anăn jing knŏng “adŭ doh jăk ti lăn ala” mâo kdriêl mâo knhal, amâo djŏ ôh jih jang mnuih dưi mŭt tinăn sơăi leh anăn kăn djŏ lei hbĭl čiăng mŭt dưi sơăi. Pô čih hră mơĭt kơ phung Hêbrơ lač leh mơh ñu amâo dưi mblang bi jih ôh kơ mnơ̆ng anăn (êlan 5). Kyuadah hŏng ñu pô, Sang čhiăm leh anăn jih jang mnơ̆ng hlăm anăn knŏng jing rup bi hmô kơ asei mlei leh anăn bruă Yang Krist ngă. Găn hŏng Khua Yang Yêsu, jih jang hlei pô mâo klei đăo dưi bi tuôm leh anăn kkuh mpŭ kơ Aê Diê sơăi (Y‑Yôhan 14:6). Hruê anei, Yang Krist yơh jing Pô ti krah kơ klei kkuh mpŭ. Klei ênguôt jing mâo đa đa mnuih amâo mâo mpŭ ôh kơ klei brei dưi nao kkuh mpŭ mă ñu pô kơ Aê Diê, jing klei phung Yuđa ênuk đưm čiăng snăk ƀiădah amâo mâo ôh.
Ya mnơ̆ng dôk bi kgăn drei kkuh mpŭ kơ Aê Diê tui si klei kkuh mpŭ năng mâo?
Wah lač: Bi mni kơ Ih, Ơ Khua Yang Yêsu kyuadah Ih mă leh asei mlei mnuih leh anăn hdĭp ti krah phung mnuih čiăng kơ hlei pô thâo kral Ih thâo kral leh Aê Diê Ama, leh anăn dưi nao ñu pô kơ Aê Diê Ama. Đru kâo thâo mpŭ kơ grăp blư̆ mông găl dưi kkuh mpŭ kơ Ih leh anăn kkuh mpŭ nanao hŏng mngăt leh anăn hŏng klei sĭt.
Dlăng Klei Aê Diê Blŭ hlăm tlâo thŭn: Y‑Luk 20:1-26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
