Mathais 13:24-30
Nqe cim:
“Cia cov nplej thiab cov txhauv nyob ua ke mus txog lub caij hlais tso, kuv mam hais kom cov hlais xub hlais cov txhauv pav ua tej tes thiab muab mus pov hlawv, thiab sau cov nplej los rau hauv kuv lub txhab”(Mathais 13:30).
Lus nug rau sawvdaws xav:
– Hauv zaj lus pivtxwv hais txog nplej thiab txhauv, leejtwg yog tus tseb txhauv rau hauv thaj teb?
– Tus tswv thaj teb muaj tus cwjpwm zoo li cas rau cov nplej thiab txhauv?
– Peb kawm tau yam dabtsi dhau zaj lus pivtxwv no?
Tswv Yexus siv ntau zaj lus pibtxwv los qhia txog Vajtswv lub Tebchaws. Hauv zaj lus pivtxwv hais txog nplej thiab txhauv no, tus Tswv hais txog ib tus tswv uas coj nplej mus tseb rau hauv nws thaj teb, tiamsis muaj ib hnub cov tubtxib pom nyob hauv thaj teb muaj txhauv ntau heev, txhauv yog yam nroj uas thaum nyuam qhuav tuaj ces saib zoo li nplej. Cov tubtxib xav hais tias nyob hauv cov noob nplej uas lawv coj mus tseb muaj noob txhauv, tiamsis tus tswv hais tias, “tej ntawd yog yeebncuab ua xwb” (nqe 28). Tsis yog tus tswv teb tsis ua tiav feem xyuam, tiamsis vim yog yeebncuab txhob txwm nrhiav tswvyim tuaj rhuav nws thaj teb (nqe 25). Thaum paub muaj txhauv, cov tubtxib los thov tus tswv teb cia lawv mus dob pov tseg, tiamsis “nws teb hais tias, tsis txhob mus dob, nyob tsam thaum nej dob cov txhauv, nej yuav dob tau cov nplej thiab” (nqe 29), tus tswv kev txiav txim siab yog “cia cov nplej thiab cov txhauv nyob ua ke mus txog lub caij hlais tso, kuv mam hais kom cov hlais xub hlais cov txhauv pav ua tej tes thiab muab mus pov hlawv, thiab sau cov nplej los rau hauv kuv lub txhab” (nqe 30).
Tswv Yexus txhais zaj lus pivtxwv no lub ntsiab hauv nqe 36-43. Hauv zaj lus no, cov noob nplej zoo yog cov neeg uas yog Vajtswv cov, txhauv yog cov neeg uas yog dab Ntxwgnyoog cov. Vim nyob hauv lub ntiajteb no, yog li muaj txhauv xyaw nyob hauv Pawg Ntseeg, tau txais dej nag thiab tshav ntuj kom tawg paj thiab loj hlob (Mathais 5:45).
Nimno, ntau tus ntseeg Yexus poob siab thiab nug hais tias “vim li cas Pawg Ntseeg tseem muaj cov neeg tsis dawbhuv thiab?”, “vim li cas tus Tswv tseem cia tej ntawd tshwmsim nyob hauv Pawg Ntseeg?”… Zaj lus pivtxwv uas Tswv Yexus hais no qhia paub hauv lub ntiajteb lossis hauv Pawg Ntseeg muaj “txhauv”; tiamsis peb tsis txhob maj ntaus nqis leejtwg yog txhauv thiab leejtwg yog nplej, rau qhov thaum tsis tau txhawv paj, ob yam zoo sib thooj. Peb kuj tsis txhob cia “txhauv” ua hiam peb kev ntseeg thiab kev ua tus Tswv haujlwm. Tus Tswv tsis pub peb dob txhauv, txhais tau hais tias tsis tau cai txiav txim. Tus Tswv yuav ua tes haujlwm ntawd rau lub sijhawm kawg los ntawm qhov tseeb thiab ncaj ncees. Tsis txhob poob siab rau qhov uas muaj txhauv, peb yuav tsum paub meej yus yog nplej, cia li npaj rau tus Tswv tes haujlwm kom peb sab ntsujplig loj hlob thiab tawg paj txi txiv pub rau tus Tswv. Cia li txhawb cov uas qaug zog tsis kam ua tus Tswv haujlwm, vim tus Tswv yuav los, Nws yuav cais nplej thiab txhauv kom nyias nyob nyias.
Thov Vajtswv,
Tus Tswv, thov pab kom nyuam yaus tsis poob siab thaum muaj “txhauv” nyob hauv Pawg Ntseeg, tiamsis zoo siab hlo ua haujlwm rau tus Tswv, vim paub tseeb hais tias tsis ntev xwb tus Tswv yuav cais nplej thiab txhauv nyias nyob nyias. Amees.
Peb puas hmov tshua txog yus lub neej sab ntsujplig kom tawg paj txi txiv rau tus Tswv?
Nyeem Vajluskub hauv peb lub xyoo: Lukas 1:39-80
Kênh Youtube BHKTHN:
