Klei Aê Diê Blŭ: Klei Mtô Mñă Klei Bhiăn 22:6-7
Êlan kliăng: “Brei diih lui ana đuĕ, ƀiădah diih dưi mă êđai kơ diih pô, čiăng kơ jih klei truh kơ diih jing jăk leh anăn diih dưi dôk hdĭp sui” (Klei Mtô Mñă Klei Bhiăn 22:7)
Klei êmuh ksiêm mĭn: Ya klei bhiăn anei kăm phung ƀuôn sang Aê Diê ngă tơdah ƀuh sa hruh čĭm mâo boh amâodah êđai? Ya klei bhiăn kăm anei čiăng lač? Ya klei brei phung đăo ngă čiăng bi êdah knhuah hdĭp thâo uêñ kơ lăn adiê?
Jih kdrêč 22 čih kơ lu mta klei bhiăn mdê mdê hlăm klei hdĭp grăp hruê Aê Diê mtă brei phung ƀuôn sang Ñu gưt. Dua êlan Klei Aê Diê Blŭ hruê anei lač djŏ kơ klei bhiăn răng mgang čĭm čap. Klei bhiăn Aê Diê mtă tơdah ƀuh sa hruh čĭm ti kyâo, phung ƀuôn sang Aê Diê dưi mă knŏng boh amâodah êđai pioh ngă mnơ̆ng ƀơ̆ng, amâo dưi mă amâodah bi mdjiê čĭm ana ôh ƀiădah lui čĭm ana đuĕ. Phung ƀuôn sang Aê Diê lui čĭm ana hdĭp čiăng kơ gơ̆ lŏ kčeh mđai djă pioh djuê ana gơ̆. Klei bhiăn anei amâo djŏ čiăng lač knŏng kơ klei răng mgang čĭm čap ôh, ƀiădah wăt čiăng bi hriăm phung ƀuôn sang Aê Diê tơdah mŭt dôk leh hlăm čar, brei digơ̆ uêñ mĭn mơh kơ klei răng kriê lăn adiê, čư̆ êa, djă pioh klei hdĭp kơ jih jang mnơ̆ng.
Mơ̆ng mphŭn hrih lăn ala, Aê Diê hrih mjing leh jih jang mnơ̆ng, leh anăn Ñu jao bruă răng kriê jih jang mnơ̆ng kơ anak mnuih. (Klei Mphŭn Dơ̆ng 1:28). Kyuanăn, răng mgang jih jang mnơ̆ng jing sa kdrêč hlăm bruă klam brei anak mnuih ngă bi leh ti anăp Aê Diê. Klei bhiăn Aê Diê amâo djŏ mtô mă phung ƀuôn sang knŏng khăp kơ Aê Diê, thâo uêñ kơ jih jang mnuih ôh, ƀiădah wăt mtô digơ̆ hdĭp thâo uêñ mơh kơ lăn adiê siam sĭn Aê Diê hrih mjing leh, leh anăn brei leh kơ anak mnuih.
Hruê anei lăn ala dôk tlă anăp hŏng klei bi mlih adiê kjham êdimima. Anei jing boh jhat mơ̆ng klei bi rai kmrơ̆ng dliê, mă yua mnơ̆ng mơ̆ng kmrơ̆ng dliê, čư̆ êa tui si čiăng, mdơ̆ng sang măi tuh tia mkra mjing bi čhŏ lăn ala…lu klei mkăn đa đa…Kyua mơ̆ng bruă ngă hŏng klei amâo thâo răng kơ lăn adiê msĕ snăn yơh atăt truh kơ klei bi mlih adiê, bi čhŏ akŏ êa, bi čhŏ lăn, angĭn bi êwa ƀrư̆ hruê ƀrư̆ čhŏ hĭn êjai. Jih jang klei anei bi hmăi kơ klei suaih pral anak mnuih. Mphŭn dô anak mnuih ka tuôm găn ôh klei ruă tiê boh aruăt êrah, mơiêk ƀêñ hra, biăm jhat lu msĕ si ênuk anei. Tơdah anak mnuih hdĭp amâo thâo răng kriê lăn adiê ôh snăn anak mnuih pô yơh srăng gui lu boh jhat êlâo hĭn.
Phung đăo jing phung Khua Yang bi mtlaih leh, brei grăp čô drei bi mđĭ klei thâo săng hlăm bruă răng mgang lăn adiê hŏng lu êlan mdê mdê. Brei drei pla ana kyâo bi lu čiăng kar angĭn bi êwa, kria yua mnơ̆ng dhơ̆ng ngă hŏng ksu, hruh ksu, kria bi mlih nanao mnơ̆ng dhơ̆ng yua hŏng pui kmlă tơdah klei anăn amâo yuôm ôh, amâo tuh djah pliă plia ôh…Truh leh mông drei ngă bruă hŏng klei jăk leh anăn thâo răng kriê jih jang mnơ̆ng Aê Diê brei leh kơ drei.
Ya bruă klă drei ngă čiăng đru răng mgang lăn adiê hruê anei?
Wah lač: Ơ Khua Yang pap brei kơ klei soh kâo kyua bruă kâo ngă hŏng klei amâo thâo răng kơ boh lăn siam sĭn Ih brei leh. Đru kâo hdĭp thâo răng bi jăk jih jang mnơ̆ng ih mdưm leh jŭm gah găn anôk kâo hdĭp.
Dlăng Klei Aê Diê Blŭ hlăm tlâo thŭn: Y-Markôs 15:42-16:20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
