II Kevcai 22:6-7
Nqe cim:
“Nej muab tau cov menyuam, tiamsis nej yuav tsum tso tus maum mus, yog nej ua li ntawd nej thiaj noj qab nyob zoo thiab muaj sia nyob ntev” (II Kevcai 22:7).
Lus nug rau sawvdaws xav:
– Tej kevcai no txwv tsis pub tus Tswv haivneeg ua dabtsi thaum pom ib zes menyuam noog lossis ib zes qe noog?
– Tej kevcai no txhais tau li cas?
– Cov ntseeg Yexus cheemtsum ua yam dabtsi kom qhia tawm lub neej muaj feem xyuam rau tej uas tus Tswv tsim?
Tagnrho tshooj 22 yog tej kevcai, thiab nrog rau tej yam hauv kev ua neej txhua hnub uas tus Tswv qhia rau Nws haivneeg yuav tsum ua raws. Ob nqe Vajluskub hnub no hais txog txojcai tiv thaiv noog. Tus Tswv txojcai qhia hais tias thaum pom ib zes noog, txawm yog nyob rau qhov twg, Nws haivneeg tsuas tau cai muab cov qe lossis ntes cov menyuam noog los ua zaub noj xwb, tsis pub ntes tus poj noog lossis tua tus poj noog, yuav tsum tso tus poj noog mus. Tus Tswv haivneeg yuav tsum tso tus poj noog mus kom nws rov qab nteg qe ua menyuam kom tsis tu noob. Txojcai no tsis yog tsuas qhia tiv thaiv noog xwb, tiamsis tseem qhia thaum mus nyob hauv tebchaws, yuav tsum saib xyuas tej uas tus Tswv tsim, kom txhua yam tsiaj tsis tu noob.
Thaum tsim lub ntiajteb, Vajtswv tsim txhua yam, tsim tibneeg thiab tsa tibneeg kav txhua yam (Chivkeeb 1:28). Yog li ntawd, tiv thaiv tej uas nyob hauv ntiajteb yog ib feem xyuam uas tibneeg yuav tsum tau ua kom tiav pub rau tus Tswv. Vajtswv txoj kevcai tsis yog qhia rau Nws haivneeg hlub Nws, muaj feem rau lwm tus xwb, tiamsis kuj qhia rau tus Tswv haivneeg ua neej muaj feem xyuam rau tej uas tus Tswv tsim pub rau neeg nyob hauv ntiajteb no.
Lub ntiajteb tamsim no tabtom raug qhov teebmeem tej huab cua hloov pauv. Qhov teebmeem no yog tibneeg ntov hav zoov, khawb tej uas tus Tswv tsim tsis txuag, ua tej chaw tsim txhua yam… Twb yog qhov uas tsis txuag tej uas tus Tswv tsim ntawd thiaj ua rau huab cua hloov pauv sai, ua rau tej av qias, dej tsis huv, thiab tej pa huab pa cua tsis zoo. Tej no ua hiam tibneeg lub dag zog. Tibneeg ntiajteb tam sim no thiaj muaj mob plawv, mob ntsws, mob ntshav qab zib thiab mob ntau yam heev. Thaum tibneeg tsis txuag tej uas nyob hauv ntiajteb no, ces tibneeg yog cov uas yuav raug them nuj nqis rau tej uas lawv ua ntawd hnyav heev.
Cov ntseeg Yexus yog cov uas tau tus Tswv cawm dim, peb txhua tus cheemtsum paub qhov uas tiv thaiv lub ntiajteb uas tus Tswv tsim tseg los ntawm ntau seem. Peb yuav tau siv zog cog ntoo kom lim tau tej huab cua zoo, tseg tsis txhob siv tej khoom yas, hnab yas, siv tej cuabyeej vammeej uas tsis tau cheemtsum kom muaj nrim, tsis txhob lam pov khoom liamsim qhov ub qhov no… Twb txog caij peb hloov thiab ua yus feem xyuam rau tej uas tus Tswv tsim tseg lawm.
Thov Vajtswv,
Tus Tswv, thov Koj zam txim vim nyuam yaus tsis ua tiav feem xyuam rau lub ntiajteb no. Thov Koj pab nyuam yaus ua tiav feem xyuam ntawd rau tej uas Koj tsim tseg. Amees.
Nimno peb ua dabtsi rau tes haujlwm pab tiv thaiv tej uas tus Tswv tsim tseg?
Nyeem Vajluskub hauv peb lub xyoo: Malakaus 15:42-16:20
Kênh Youtube BHKTHN:
