Klei Aê Diê Blŭ: II Y‑Samuel 17:27-29
Êlan kliăng: “Tui si grăp čô mă tŭ leh klei brei mơ̆ng Aê Diê, yua klei anăn bi đru hdơ̆ng găp, msĕ si phung dĭng buăl kiă jăk bi mbha klei Aê Diê pap.” (I Y‑Pêtrôs 4:10)
Klei êmuh ksiêm mĭn: Ya klei truh kơ Mtao Y‑Đawit? Ya klei Y‑Sôƀi, Y‑Makir leh anăn Y‑Ƀarsilai ngă leh kơ mtao? Hŏng bruă ngă anei brei thâo si mnuih digơ̆ jing? Ya klei Aê Diê dôk brei kơ diih leh anăn si ngă diih yua klei brei anăn?
II Y‑Samuel kdrêč 15-19 čih yăl dliê kơ klei Y‑Apsalôm anak êkei Mtao Y‑Đawit krŭ kdơ̆ng leh anăn klei Mtao Y‑Đawit êran đuĕ mơ̆ng klei anak êkei ñu pô tiŏ bi mdjiê. Trăn Klei Aê Diê Blŭ hruê anei yăl dliê kơ klei hlăk Mtao Y‑Đawit mbĭt hŏng phung ƀuôn sang leh găn lu klei dleh dlan diñu truh ti ƀuôn Mahanaim, hlăk anăn jih jang mnuih êpa leh anăn êmăn leh sơăi, hlăm klei truh amâo thâo bĭt mjing anei, Aê Diê mprăp leh tlâo čô mnuih sĭt suôr hŏng Mtao jing Y‑Sôƀi, Y‑Makir leh anăn Y‑Ƀarsilai. Digơ̆ djă ba leh kơ Mtao Y‑Đawit wăt kơ phung kahan lu mnơ̆ng ƀơ̆ng huă leh anăn mnơ̆ng yua.
Drei srăng bi kngăr hĭn tơdah thâo kơ Y‑Sôƀi jing găp djuê Y‑Hunan, mtao phung Amôn, pô tuôm mưč leh kơ klei jăk Mtao Y‑Đawit ngă leh anăn ngă klei bi hêñ kơ mtao (II Y‑Samuel 10:1-5); Bi Y‑Makir, năng ai êlâo dih ñu jing pô sa ai hŏng mtao Y‑Sôl kyuadah ñu mdăp leh Y‑Mêphiƀôsêt jing anak êkei Y‑Jônathan (II Y‑Samuel 9:4); bi Y‑Ƀarsilai wăt gơ̆ jing sa čô mnuih mdrŏng dưn, ƀiădah gơ̆ mduôn leh (II Y‑Samuel 19:31-32). Aê Diê mprăp leh phung mnuih aguah tlam ƀiă mnuih mĭn kơ digơ̆ jing phung dưi đru Mtao Y‑Đawit hlăm klei knap mñai msĕ snei. Sĭt nik Aê Diê ăt kiă kriê hlăm djăp mta klei truh kơ klei hdĭp leh anăn Ñu thiăm brei mnơ̆ng čiăng hlăm klei hdĭp djŏ mông.
Êjai mâo lu mnuih wir đuĕ kơ Mtao Y‑Đawit msĕ si Y‑Ahitôpel (II Y‑Samuel 15:31), amâodah bi mjhua hŏng klei truh anăn duah klei tŭ dưn kơ ñu pô msĕ si Y‑Siƀa (II Y‑Samuel 16:1-4), amâodah tăm pah kơ Mtao msĕ si Y‑Simei (II Y‑Samuel 16:5-14), snăn Y‑Sôƀi, Y‑Makir leh anăn Y‑Ƀarsilai đru leh Mtao Y‑Đawit hŏng klei čŏng čiăng leh anăn hŏng klei kmah amâo mâo hŏng klei bi mjhua ôh (êlan 28-29). Si ngă tlâo čô mnuih anei thâo kơ mnơ̆ng Mtao Y‑Đawit hŏng phung kahan čiăng leh anăn djă ba mnơ̆ng anăn kơ digơ̆ lĕ? Ênưih pưih kyuadah digơ̆ mdưm leh digơ̆ pô hlăm klei truh kơ mtao leh anăn phung ƀuôn sang, kyuanăn drei dưi lač klei digơ̆ đru anei kbiă hriê mơ̆ng ai tiê khăp sĭt nik. Bi tơdah êjai mông ară anei hin Y‑Sôƀi, Y‑Makir leh anăn Y‑Ƀarsilai amâo đru ôh mtao Y‑ Đawit si ngă? Sĭt nik Aê Diê srăng yua mnuih mkăn ƀiădah tlâo čô mnuih anei srăng luč kluôm dhuôm klei myun đru kjư hlăm hdră Aê Diê bi mtlaih pioh kơ Mtao Y‑Đawit, ăt msĕ si Mtao mniê H’Êster mơh (H’Êster 4:13-14), Aê Diê brei klei mdrŏng sah, klei đĭ kyar kơ Y‑Sôƀi, Y‑Makir, leh anăn Y‑Ƀarsilai knŏng pioh kơ mông găl yuôm bhăn anei.
Hruê anei, ya mnơ̆ng drei dôk mă tŭ mơ̆ng Aê Diê? Djŏ mơ̆ anăn jing klei suaih pral, mông, klei myun pioh ksiêm hriăm, dŏ ngăn, klei thâo, klei brei hlăm klei hdĭp myang…? Brei drei jing sa čô pô kiă sĭt suôr yua bi jăk klei Aê Diê brei leh kơ drei.
Djŏ mơ̆ drei jing “phung dĭng buăl kiă jăk klei brei mơ̆ng Aê Diê” pioh “bi đru hdơ̆ng găp”?
Wah lač: Ơ Khua Yang, kâo lač jăk kơ Ih kyua jih klei jăk Ih brei leh kơ kâo. Bi hriăm kâo thâo yua jih klei Ih brei pioh bi mơak kơ Ih leh anăn yua djŏ mông kăp đru dŏng leh anăn bi mđĭ ai mnuih mkăn.
Dlăng Klei Aê Diê Blŭ hlăm tlâo thŭn: Y‑Haƀakuk 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
