II Xamuyees 17:27-29
Nqe cim:
“Vajtswv twb pub koob hmoov rau nej txhua tus lawm, yog li ntawd nej yuav tsum siv tej koob hmoov uas nej tau ntawd kom muaj nqis rau lwm tus” (I Petus 4:10).
Lus nug rau sawvdaws xav:
– Vajntxwv Daviv tabtom nyob hauv lub tsamthawj zoo licas?
– Saunpis, Makhiles thiab Npaxilais tau ua dabtsi rau vajntxwv?
– Tes haujlwm no qhia paub dabtsi txog lawv?
– Vajtswv tabtom pub yam dabtsi rau nej thiab nej siv licas lawm?
II Xamuyees tshooj 15-19 sau txog zaj uas vajntxwv Daviv tus tub Axaloos ntxeev siab thiab Vajntxwv Daviv tabtom khiav mus kom tsis raug nws tus tub muab tua. Ntu Vajluskub hnub no hais txog thaum Vajntxwv Daviv thiab cov pejxeem twb khiav mus txog lub nroog Mahana-ees tomqab uas taug ib ntu kev khwv heev, lub sijhawm ntawd txhua tus puavleej tshaib plab thiab nkees heev lawm. Nyob rau lub tsamthawj tws kev li no, Vajtswv twb npaj txhij peb tug neeg muab siab npuab vajntxwv uas yog Saunpis, Makhiles thiab Npaxilais. Lawv coj ntau yam zaub mov thiab tej khoom qhov txhia chaw tuaj pub Vajntxwv Daviv thiab nws pab tubrog.
Peb yim hnov xav tsis thoob thaum paub hais tias tus yawg hu ua Saunpis txheeb ze nrog Vajntxwv Hanoos uas kav tebchaws Amoos, yog tus uas tau ua saib tsis taus Vajntxwv Daviv lub siab zoo (II Xamuyees 10:1-5); tshuav tus yawg hu ua Makhiles tej zaum yog tus uas thaum ub tuaj Vajntxwv Xa-ules tog vim nws tau zais Mefinpauses uas yog Yaunathas tus tub (II Xamuyees 9:4); tshuav tus yawg Npaxilais yog ib tug neeg npluanuj tiamsis twb laus lawm (II Xamuyees 19:31-32). Tus Tswv tau npaj cov neeg uas luag tsis tshua ntseeg hais tias yuav pab tau Vajntxwv Daviv nyob rau lub tsamthawj no. Tseeb tiag, Vajtswv yeej tseem tswjkav txhua yam hauv lub neej thiab pab txhua lub sijhawm.
Thaum uas muaj ntau tug tig nraub qaum rau Vajntxwv Daviv zoo li Ahithaufees (II Xamuyees 15:31), lossis fuab luag tug zoo li Xinpas (II Xamuyees 16:1-4), lossis tsawm foom Vajntxwv Daviv zoo li Sime-is (II Xamuyees 16:5-14), tiamsis Saunpis, Makhiles, thiab Npaxilais tau txaus siab pab hlo pab vajntxwv los ntawm lub siab dawb paug thiab tsis ntshaw kom tau pauj rov qab (nqe 28-29). Vim licas peb tug yawg no thiaj paub Vajntxwv Daviv thiab nws pab tubrog cheemtsum tej yam no lawv thiaj coj tuaj? Twb yog vim lawv muab tus kheej piv rau vajntxwv thiab cov pejxeem lub tsamthawj, yog li ntawd lawv kev pab no yog pib hauv lub siab hlub tuaj.
Yog hais tias lub sijhawm no Saunpis, Makhiles, thiab Npaxilais tsis pab cawm Vajntxwv Daviv ces yuav zoo licas? Tus Tswv yeej yuav siv lwm tus los pab tiamsis lawv peb tug no yuav tsis muaj cuabkav koom tes rau Vajtswv kev npaj tseg pab cawm Vajntxwv Daviv lawm. Kuj zoo li poj vajntxwv Exethaws (Exethaws 4:13-14), Vajtswv pub rau Saunpis, Makhiles, thiab Npaxilais muaj kev npluanuj, vammeej tsuas yog los ua tes haujlwm tshwjxeeb no xwb.
Niaj hnub nimno, peb tabtom txais tau yam dabtsi ntawm Vajtswv? Puas yog lub dagzog, sijhawm, kev kawm xyaum, nyiaj txiag, kev txawjntse, tej koob hmoov sab ntsujplig? Cia li ua ib tug tubtxib uas ncaj ncees siv tej yam tus Tswv muab pub rau tus kheej kom muaj nqis.
Thov Vajtswv,
Tus Tswv, nyuam yaus ua Koj tsaug vim tej yam zoo Koj pub rau nyuam yaus. Thov qhia nyuam yaus paub siv tej yam Koj muab pub kom haum Koj siab thiab haum sijhawm kom pab tau thiab txhawb lwm tus lub zog. Amees.
Peb puas yog tus tub txib uas ncaj ncees “siv tej koob hmoov” uas peb tau “kom muaj nqis rau lwm tus” lawm tau?
Nyeem Vajluskub hauv peb lub xyoo: Hanpakus 3
Kênh Youtube BHKTHN:
