Henplais 6:1-3
Nqe cim:
“Yog li ntawd, peb tsis txhob pheej niaj hnub kawm Yexus Khetos txoj kevcai lub hauvpaus xwb, peb yuav tsum kawm ntxiv lawm tom ntej thiab” (Henplais 6:1a).
Lus nug rau sawvdaws xav:
- Yexus Khetos txoj kevcai lub hauvpaus yog licas?
- Vim licas thiaj tsis pub peb pheej kawm tej uas yog lub hauvpaus xwb?
- Yuav ua cas thiaj ua tau lubneej yog tus ntseeg uas kheev hlob?
Tus cai ntawm kev cobqhia yog pib ntawm qis mus rau siab, ntawm yam yoojyim mus rau yam debdav thiab yog tes haujlwm ua mus ntxiv tsis tseg. Yuav zoo licas yog ib tug tub kawm qib 12 lawm pheej rov los tham txog tej uas hnub thaud kawm hauv theem qis, uas tsis quavntsej kawm tej uas cheemtsum rau nws? Ntawd yog qhov teebmeem uas tus sau phau Henplais tabtom hais hauv ntu Vajluskub no ntag. Cov Yudais uas los ntseeg Yexus lawv yeej paub zoo Vajtswv Txojlus hauv Phau Qub, thaum los ntseeg Yexus, lawv twb kawm tau ntau yam kev cai ntseeg tshwjxeeb hauv Txojmoo Zoo uas yog: “txhob rov pib qab ua dua, tsis hais tso tej uas tsis muaj nqis tseg ntseeg Vajtswv, lossis kevcai ntxuav kevcai tsa tes, zaj uas neeg tuag sawv hauv qhov tuag rov qab los, thiab zaj uas neeg raug txim mus ibtxhis” (nqe 1b-2).
Muaj peb yam tau hais txog hauv no: Tim ib yog kevcai qhia txog tso kev txhaum tseg thiab kev ntseeg. Tus ntseeg Yexus yog tus tso kev txhaum tseg lawm yuav tsis raug kev puastsuaj thiab tau Vajtswv suav yog neeg ncajncees yog los ntawm Vajtswv kev hlub pub dawb tsis yog siv dag zog ua tau. Tim ob yog kevcai raus dej thiab kevcai tsa tes. Kevcai raus dej yog ua qhia tshwm txog kev ntseeg, lees hais tias koom nrog Yexus Khetos tuag ua ke. Kevcai tsa tes yog hais txog tes haujlwm uas tsa tes rau saum yam koom fij uas daws yus kev txhaum (Levis Kevcai 1:4). Tim peb yog kevcai qhia txog sawv hauv qhov tuag rov qab los txais txojsia lossis raug txiav txim mus ibtxhis, ntawd kuj yog qhov uas tus ntseeg Yexus lawm kev cia siab. Tej uas hais no puavleej yog yam kevcai tseemceeb tiamsis tsis xav kom cov ntseeg pheej nyob qhov ntawd uas tsis xav kawm kev paub tus Tswv ntau ntxiv.
Yuav ua cas thiaj ua tau lubneej kheev hlob tsis tseg? “Yog Vajtswv pom zoo peb yeej yuav ua li ntawd” (nqe 3). Vajtswv yog tus tswjkav txhua yam, muab txhua yam uas peb cheemtsum rau peb, yog tus coj peb txoj haukev hauv lubneej ntseeg Nws. Yog li ntawd, kom kheev hlob tsis tseg hauv tus Tswv, peb los tso siab plhuav rau tus Tswv, nrhiav Nws dej siab, nyeem, kawm Vajluskub thiab thov Vajtswv txhua hnub.
Ib txhia ntseeg tsuas xav mloog tej zaj qhia, nyeem tej nqe Vajluskub uas tus kheej nyiam xwb tsis xav kawm ntxiv txog tus Tswv. Lawv txojkev raws tus Tswv qab tsuas nres ntawm qhov uas “tau cawmdim txaus lawm, tsis quavntsej txog lwm yam ntxiv”. Tus ntseeg uas hlob tiav yuav tsis zoo li ntawd, tiamsis yuav tas siab nrhiav tus Tswv, kawm paub yam tshiab txog Nws txhua hnub thiab yim hnub yim muaj kev sibraug zoo nrog tus Tswv.
Thov Vajtswv,
Tus Tswv, tej zaum nyuam yaus raug dag poob sijhawm ntau rau tej yam tsis zoo, tseg tsis ua tej yam uas zoo. Thov pab kom nyuam yaus paub los tso siab rau Koj los ntawm nyeem, kawm xyaum Vajluskub thiab thov Koj txhua hnub kom tau nyob ze tus Tswv Koj heev ntxiv. Amees.
Yam dabtsi tuav peb, ua rau peb tsis kheev hlob hauv tus Tswv? peb yuav txiav txim siab licas rau tej ntawd?
Nyeem Vajluskub hauv peb lub xyoo: Exekees 30
Kênh Youtube BHKTHN:
