Klei Aê Diê Blŭ: Hêbrơ 6:1-3
Êlan kliăng: “Kyuanăn brei drei lui mta klei hriăm kơ Krist tal êlâo ênưih thâo săng leh anăn ktưn kơ klei klă” (Hêbrơ 6:1a).
Klei êmuh ksiêm mĭn: Ya jing mta klei hriăm ênưih thâo săng kơ Klei Mrâo Mrang Jăk? Ya ngă drei đăm lŏ mdưm ôh mta klei hriăm atur anei? Si drei ngă čiăng ktưn đĭ kơ klei jing khue?
Klei bhiăn hlăm klei mtô bi hriăm kčưm dơ̆ng mơ̆ng đŭt truh kơ dlông, mơ̆ng ênưih êđal truh kơ êlam, anăn yơh jing knhuang êlan đĭ kdlưn hĭn nanao. Si srăng jing tơdah sa čô hđeh hriăm hră adŭ 12 leh, ăt dôk bi trông nanao kơ mta klei hriăm hlăk adŭ gưl sa ƀiădah lui hĕ mta klei hriăm pioh kơ ñu pô? Anăn yơh jing mta klei pô čih hră Hêbrơ dôk lač tinei. Phung đăo Israel thâo săng klă leh klei mtô lač hlăm Klei Bi Mguôp Hđăp, tơdah nao kơ Yang Krist, diñu thâo săng lu leh êlan đăo Klei Mrâo Mrang Jăk, hlăm anăn mâo đa mta klei “ênưih thâo săng” msĕ si: “klei kmhal kơ bruă atăt kơ klei djiê, leh anăn kơ klei đăo kơ Aê Diê, kơ klei mtô kơ klei baptem, kơ klei ênă kngan, kơ klei kbiă lŏ hdĭp mơ̆ng phung djiê, leh anăn kơ klei phat kđi hlŏng lar” (êlan 1b-2).
Mâo 3 êlan đăo lač tinei. Tal sa jing êlan đăo kơ klei kmhal kơ klei soh leh anăn kơ klei đăo. Pô đăo kơ Aê Diê jing pô kmhal kơ klei soh, lui bruă soh atăt kơ klei djiê leh anăn mâo klei yap kpă kyua klei pap Khua Yang amâo djŏ kyua klei ñu pô gĭr ktưn ôh. Tal dua jing êlan đăo kơ klei baptem leh anăn kơ klei ênă kngan. Knăm doh jăk klei ƀaptem bi êdah klei hưn klă klei đăo, tŭ ư kơ klei djiê mbĭt leh anăn kbiă lŏ hdĭp mbĭt hŏng Yang Krist. Klei bhiăn kơ klei ênă kngan tinei năng ai djŏ tuôm hŏng klei myơr mnơ̆ng ngă yang bi tui brei klei soh pô (Bruă Lêwi 1:4). Tal tlâo jing êlan đăo kơ klei kbiă lŏ hdĭp mơ̆ng phung djiê leh anăn kơ klei phat kđi hlŏng lar, ăt jing klei čang hmăng kơ grăp čô phung đăo tơdah čuăn đăo kơ Aê Diê. Sĭt yơh jih klei anei jing êlan đăo yuôm sơăi, ƀiădah amâo djŏ ôh diñu mjưh dôk hĕ tăp anăn ƀiădah brei mơ̆ng atur anei yơh lŏ ktưn hĭn čiăng truh kơ klei thâo săng Khua Yang lu hĭn hlăm êlan đăo mkăn msĕ mơh.
Snăn si ngă čiăng ktưn truh kơ klei jing khue? “Klei anăn yơh drei srăng ngă tơdah Aê Diê brei” (êlan 3). Aê Diê Pô kiă kriê jih jang klei, mkăp thiê brei jih jang mta klei drei kƀah čiăng, atăt gai drei hlăm knhuang êlan tui hlue Ñu. Kyuanăn, čiăng đĭ hriê kơ prŏng hlăm Khua Yang, brei drei knang kluôm dhuôm kơ Ñu hŏng ai tiê klei mĭn čiăng tui duah Khua Yang, răk dlăng, ksiêm hriăm Klei Aê Diê Blŭ leh anăn wah lač grăp hruê.
Mâo đa phung đăo knŏng hmư̆ klei mtô mblang, răk dlăng đơ êlan Klei Aê Diê Blŭ diñu khăp đuč amâo lŏ čiăng hriăm lu hĭn kơ Khua Yang ôh. Knhuang êlan diñu tui hlue Khua Yang knŏng mjưh mir mơ̆ng “dưi mâo klei bi mtlaih djăp leh, amâo lŏ čiăng mđing kơ mta klei mkăn ôh”. Bi phung đăo đĭ hriê kơ prŏng amâo djŏ msĕ snăn ôh ƀiădah diñu tui duah Khua Yang hŏng jih ai tiê, grăp hruê ƀrư̆ thâo kral Khua Yang mrâo mda hĭn êjai leh anăn mâo klei bi mguôp hŏng Khua Yang sŭk suôr hĭn êjai.
Ya mta klei dôk kơ̆ng drei dôk sa anôk hrô kơ klei đĭ hriê kơ prŏng hlăm Khua Yang? Si ngă drei čuăn čiăng ktưn hĭn mơ̆?
Ơ Khua Yang, tăp năng kâo lĕ hlăm klei mplư bi luč hruê mmông hŏng mta klei jăk ƀiădah phưi lui hĕ mta klei jăk hĭn. Akâo Khua Yang đru kâo thâo knang kơ Khua Yang hŏng ai tiê đăo knang, thâo tui duah Khua Yang grăp hruê hŏng klei wah lač leh anăn hriăm Klei Aê Diê Blŭ čiăng dưi dôk giăm leh anăn thâo săng kơ Khua Yang hĭn.
Dlăng Klei Aê Diê Blŭ hlăm tlâo thŭn: Y-Êsêkiêl 30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
