Klei Aê Diê Blŭ: Klei Mmuñ Hđăp 119:1-8
Êlan kliăng: “Snăn kâo amâo srăng hêñ ôh, êjai kâo dlăng kơ jih klei Ih mtă.” (Klei Mmuñ Hđăp 119:6)
Klei êmuh ksiêm mĭn: Pô čih Klei Mmuñ Hđăp 119 brei thâo hlei pô mâo klei jăk jĭn? Aê Diê brei kơ drei klei bhiăn Ñu ya pioh ngă? Tơdah mđing mĭn kơ Klei Aê Diê Blŭ, si drei srăng jing? Ya mta klei drei dôk duh êlâo hĭn?
Klei Mmuñ Hđăp 119 jing kdrêč dlông hĭn hlăm Klei Mmuñ Hđăp hŏng akŏ êdah kdlưn hĭn kơ Klei Aê Diê Blŭ. Klei Mmuñ Hđăp bi mbha jing 22 kdrêč klei duê, grăp kdrêč klei duê mâo 8 êlan leh anăn kčưm dơ̆ng hŏng grăp boh hră klei Hêbrơ. Sapăn êlan tal êlâo kčưm hŏng boh hră Aleph, kñăm klei jăk mơak kơ pô kriăng ksiêm dlăng leh anăn djă pioh klei bhiăn Aê Diê.
Kčưm mŭt, pô čih hưn klă mtam “jăk mơak” yơh phung êbat tui hlue klei bhiăn Yêhôwa leh anăn djă pioh klei Ñu hưn (êlan 1-2). Lŏ čuê, pô čih brei thâo “Ih brei leh klei Ih čih kơ hmei, čiăng kơ hmei hur har tui hlue” (êlan 4). “Klei Ih čih” jing Klei Aê Diê Blŭ yơh. Anei jing klei mtă mơ̆ng mphŭn hlăk Aê Diê mkŏ mdơ̆ng phung ƀuôn sang Ñu (Klei Mtô Mñă Klei Bhiăn 6:6-9), leh anăn lŏ mñă wĭt mñă nao lu blư̆ hŏng phung anak ƀuôn sang Aê Diê brei duh kơ klei hriăm Klei Aê Diê Blŭ hruê mlam (Y‑Yôsuê 1:8). Ƀiădah lĕ, phung ƀuôn sang Israel leh anăn phung mtao diñu, hlăm anăn mâo mbĭt hŏng mtao Y‑Đawit mơh, lu blư̆ wơr bĭt hĕ klei bhiăn Aê Diê leh anăn ngă tui si klei pô čiăng. Kyuanăn, hlăm êlan 5 pô čih blŭ klei krao: “Kâo čiăng kơ êlan kâo jing kjăp, êjai gưt klei bhiăn Ih!” Ñu bi êdah klei hƀlŏk, tơdah êlâo dih kâo tui hlue Klei Aê Diê Blŭ snăn ară anei amâo tŭ lu klei knap mñai ôh.
Dơ̆ng mơ̆ng klei bi knal ruă ênguôt anăn, pô čih čuăn: “Snăn kâo amâo srăng hêñ ôh, êjai kâo dlăng kơ jih klei Ih mtă.” (êlan 6). “Kriăng” amâodah “mđing mĭn” mblang jing jih ai tiê mđing mĭn, ksiêm dlăng klei Khua Yang mtă čiăng răng ngă tui hlue snăn amâo srăng tuôm hêñ ôh. Tơdah “êjai hriăm klei Ih phat kđi djŏ,” pô čih hŏng jih ai tiê bi mni kơ Aê Diê (êlan 7). Klei hơ̆k mơak bŏ dlai leh anăn bluh jing klei bi mni kơ Aê Diê tơdah drei êlâo hĭn duh pioh mmông ksiêm hriăm êlan Ñu leh anăn răng ngă hlue čiăng bi knal klei jăk mơak. Ti knhal tuč, pô čih kñăm: “Kâo srăng gưt klei bhiăn Ih; đăm lui hĕ kâo ôh.” (êlan 8). Anei jing klei blŭ čuăn rơ̆ng amâo srăng lui ôh klei gưt djă pioh klei bhiăn Aê Diê čiăng kơ đăm tŭ klei Khua Yang phưi lui hĕ.
Pô čih Klei Mmuñ Hđăp 119 bi knal leh lu lĭn klei dưi hĭn wăt klei dluh lĕ hlăm klei hdĭp kyuanăn yơh ñu pioh sa kdrêč dlông hĭn čiăng kñăm kơ hnơ̆ng yuôm kơ klei mđing mĭn ksiêm hriăm leh anăn gưt ngă hlue Klei Aê Diê Blŭ. Êdei kơ jih jang klei dưi hĭn leh anăn klei lĕ, ñu duah ƀuh klei msĕ snei, knŏng tơdah kriăng ksiêm hriăm leh anăn gưt ngă hlue klei bhiăn Aê Diê kơh dưi mâo klei jăk mơak êbeh dlai. Hruê anei, drei pioh mmông tui duah Khua Yang, hriăm klei Ñu mtă leh anăn gưt ngă hlue, sĭt nik ăt srăng bi knal klei jăk mơak hlăm klei hdĭp drei.
Si ngă grăp hruê drei êlâo hĭn duh kơ klei ksiêm hriăm leh anăn gưt ngă hlue Klei Aê Diê Blŭ mơ̆?
Wal lač: Ơ Khua Yang, akâo kơ Ih đru kâo amâo lŏ duah klei jăk mơak anôk mkăn ôh hĭn kơ klei jăk mơak hlăm Klei Aê Diê Blŭ. Brei kâo êlâo hĭn duh kơ klei ksiêm hriăm Klei Aê Diê Blŭ, mđing mĭn kơ Klei Ih Blŭ čiăng thâo ya klei Ih čiăng leh anăn răng gưt ngă hlue.
Dlăng Klei Aê Diê Blŭ hlăm tlâo thŭn: Y‑Yêrêmi 51:49-64
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
