Lukas 1:46-55
Nqe cim:
“Kuv lub siab cia li qhuas tus Tswv; Vajtswv uas yog kuv tus Cawmseej, nws ua rau kuv zoo siab kawg li.” (Lukas 1:46-47).
Lus nug rau sawvdaws xav:
- Vim li cas Malis tsa suab qhuas tus Tswv?
- Yam twg Malis hais txog hauv nws zaj lus qhuas tus Tswv?
- Vim li cas peb txhua tus qhuas tus Tswv rau lub koobtsheej nco txog Yexus los yug xyoo no?
Tom qab uas timtswv los qhia rau Malis paub hais tias nws yuav xeeb tub thiab tus tub ntawd yog “Vajtswv tus Tub” (nqe 32, 35), Malis teb hais tias, “thov kom muaj raws li koj hais ko rau kuv.” (Lukas 1:38). Thaum hnov Elixanpes qhia tej uas timtswv hais, ces Malis zoo siab kawg li. Txojkev zoo siab ua rau Malis cia li tsa suab qhuas tus Tswv thiab sau tseg los txog niaj hnub no, muaj lub npe hu ua zaj Magnificat. Yam dabtsis ua rau Malis zoo siab qhuas tus Tswv?
Tim ib, Malis qhuas tus Tswv vim paub hais tias nws yog tus “tau koob hmoov” (nqe 48). Ua ntej ntawd, timtswv Khali-ees los hais ob zaug rau Malis hais tias “twb foom koob hmoov” (Lukas 1:28, 30), thiab Elixanpes hais ob zaug hais tias Malis “tau koob hmoov” (nqe 42, 45), tiamsis ntawm no yog thawj zaug Malis lees paub nws yog tus tau koob hmoov, vim “kuv yog nws ib tug ntxhais qhev uas tsis tseemceeb los nws tseem nco txog kuv thiab!” thiab “Vajtswv tus uas muaj hwjchim loj kawg nkaus tau ua rau kuv lawm.” (nqe 48-49). Txawm yog Malis paub tias nws tabtom ua ib tes haujlwm rau tus Tswv, los nws qhuas tus Tswv vim tus Tswv yog tus uas ua tej haujlwm loj rau Malis. Malis zoo siab vim Vajtswv hlub nws thiab siv ib tug ntxhais zoo li nws. Tus Tswv muaj cai xaiv ib tug neeg twg tseemceeb dua Malis, tiamsis Nws pom zoo siv Malis, ib tug ntxhais tsis muaj dabtsi tseemceeb. Zeem paub meej txog tus kheej, ua rau Malis qhuas tus Tswv vim tej uas “Vajtswv ua”rau nws, tsis yog qhuas tus Tswv vim “Malis ua tau”. Tim ob, Malis qhuas tus Tswv vim Nws tsis yog hlub thiab foom koob hmoov rau nws tsevneeg xwb, Nws tseem hlub thiab tuaj cov neeg pluag, neeg tsis muaj suab npe, raug ntiab tawm tebchaws tog (nqe 50-53). Lub sijthawm thaum ntawd kuj zoo li nimno, tus neeg npluanuj thiab muaj meejmom thiaj yog cov uas coob tus tibneeg nyiam. Cov neeg pluag, tsis muaj suab npe tsis muaj leejtwg “ntsia”. Malis ntsia pom nws kev ua neej thiab paub tias tus Tswv hlub txhua tus tibneeg. Peb tsuas ua zoo rau qee tus tibneeg xwb tiamsis tus Tswv yog tus hlub, ua siab ntev thiab tuaj txhua tus tog, vim kev hlub yog tus Tswv tus yamntxwv. Tim peb, Malis qhuas tus Tswv vim Nws hlub thiab pab ib tiam dhau ib tiam. Nws ua zoo rau Anplahas li cas, Nws kuj yuav niaj hnub ua zoo li ntawd rau Anplahas cov xeebntxwv thiab (nqe 54-55). Tus Tswv yog tus uas muaj kev hlub.
Lub caij ua koobtsheej nco txog Tswv Yexus los yug xyoo no, cia li ua tib zoo tu lub siab, ntsia tej haujlwm tus Tswv ua rau yus thiab tsa suab qhuas peb tus Cawmseej.
Thov Vajtswv,
Tus Tswv muaj kev hlub, lub koobtsheej nco txog Koj los yug xyoo no, thov Koj qhia nyuam yaus zeem paub lub meejmom Koj pub, tej haujlwm Koj ua, thiab qhuas Koj vim nyuam yaus tau koob hmoov. Amees.
Peb puas zeem paub hais tias yus “tau koob hmoov” vim yog tus Tswv hlub?
Nyeem Vajluskub hauv peb lub xyoos: Yelemis 44:7-30
Kênh Youtube BHKTHN:
