Malakis 3:7-12
Nqe cim:
“Kuv twb foom tsis zoo rau nej txhua tus lawm, rau qhov tagnrho nej haivneeg puavleej qee kuv tug.” (Malakis 3:9)
Lus nug rau sawvdaws xav:
- Vajtswv cem cov Yixalayees yam dabtsi? Vim li cas?
- Tus Tswv nqua hu kom lawv ua dabtsi thiab coglus li cas?
- Peb kawm tau dabtsi hais txog kev fij khoom nyiaj txiag?
Cov neeg Yixalayees raug Vajtswv cem hais tias “qee Vajtswv tug” vim lawv tsis muab ib feem kaum coj mus tso hauv Nws lub Tuamtsev (nqe 8). Ib feem kaum yog hais kom cov neeg Yixalayees muab thaum ub los (Levis Kevcai 27:30; Teev Npe 18:21). Ib feem kaum kuj yog feem uas tseg tshwjxeeb pab rau cov neeg Levis thaum lawv ua haujlwm nyob hauv lub Tuamtsev, vim lawv tsis muaj av nyob (Teev Npe 18:20-24). Txawm yog li ntawd los cov neeg Yixalayees kuj tsis ua raws li tus Tswv hais, “qee Vajtswv” ib feem kaum. Lawv raug foom tsis zoo vim tagnrho lub tebchaws puavleej qee tus Tswv tug (nqe 9). Tus cevlus Malakis nqua hu lawv “cia li tig rov los cuag” tus Tswv (nqe 7) thiab “nqa tej uas nej muaj ib feem kaum tuaj tso rau hauv lub Tuamtsev” (nqe 10). Hauv Tuamtsev muaj qhov chaw rau tej khoom txhua yam uas cov pejxeem coj tuaj fij, kom cov povthawj muaj noj muaj haus. Tu siab kawg nkaus cov Yixalayees tsis ua raws li tus Tswv samhwm thiab tsis fij ib feem kaum, ua rau cov neeg Levis mus nrhiav noj los pab tus kheej.
Tej zaum tus Tswv haivneeg ntshai tsam txomnyem lawv thiaj “qee” ib feem kaum uas yog tus Tswv li rau lawv. Vajtswv hais rau nws haivneeg “nej sim ua raws li kuv hais saib”. Tus Tswv coglus yuav “qhib rooj ntug” thiab “nchuav koob hmoov ntau npluamias los” rau lawv (nqe 10). Thaum tus Tswv haivneeg ua raws li Nws hais, ncaj ncees fij ib feem kaum ces lawv yuav tau txais tej koob hmoov uas tus Tswv pub. Tus Tswv coglus yuav foom koob hmoov rau tej qoobloo uas lawv ua. Thaum ntawd, ntau haivneeg yuav paub hais tias tebchaws Yixalayees yog lub tebchaws tau koob hmoov thiab tau zoo noj tau zoo nyob (nqe 11-12).
Nyob rau tiam Vajluskub Qub, ib feem kaum yog txoj cai uas tus Tswv hais kom Nws haivneeg yuav tsum tau muab xwb. Los txog tiam Vajluskub Tshiab, tus Tswv tsis hais kom muab pestsawg, tiamsis tus Tswv haivneeg yuav tsum zeem paub tus Tswv foom koob hmoov rau peb ntau heev, Nws txib Nws Leej Tub los tuag txhiv peb, yog li peb qhia tawm lub siab ua Nws tsaug los ntawm qhov ncaj ncees fij ib feem kaum zoo li tiam Vajluskub Qub qhia. Tiamsis ntau tus ntseeg Vajtswv tseem pheej tabtom “qee Vajtswv tug”. Ntau tus ntseeg hnyav siab rau qhov uas fij nyiaj txiag. Vajtswv yog tus uas npluanuj, Nws tsis cheemtsum ib feem kaum uas peb fij, tiamsis qhov fij ntawd yog peb qhia tawm lub siab paub ua Nws tsaug thiab hmov tshua txog tus Tswv tes haujlwm. peb yuav tsum ua tus Tswv tsaug vim Nws pub peb muaj cai tau koom tes nrog Nws nthuav tawm Vajtswv lub Tebchaws dhau los ntawm kev fij khoom nyiaj txiag. Thiab tsimnyog peb ua tus Tswv tsaug heev vim Nws coglus hais tias thaum peb ncaj ncees fij rau Nws ces peb yuav tau koob hmoov thiab muaj kev noj qab nyob zoo. Tiamsis yog peb tsis kam fij khoom nyiaj txiag lossis tsis txaus siab fij zoo li tiam Vajluskub Qub qhia ces yog peb tabtom “qee Vajtswv tug” ntag.
Thov Vajtswv,
Vajtswv, ua tsaug Koj cawm nyuam yaus. Thov Koj pab nyuam yaus ncaj ncees fij ib feem kaum rau hauv pawg ntseeg, thiab tsis qee Koj tug. Amees.
Peb puas tseem tabtom “qee” ib feem kaum tej uas yog Vajtswv tug? Puas muaj yam dabtsi cheemtsum hloov thaum kawm dhau zaj kawm hnub no?
Nyeem Vajluskub hauv peb lub xyoos: Yelemis 25:1-31
Kênh Youtube BHKTHN:
